କାଳିଆପାଣି,୧୩ା୪(ଡି.ଏନ.ଏ.): ଯାଜପୁର ଜିଲାରେ କର୍ମଚାରୀ ଓ ଶ୍ରମିକଙ୍କୁ ଶୋଷଣ କରିବା କେତେଜଣ ଖଣି ମାଲିକଙ୍କ ନିତିଦିନିଆ ଘଟଣାରେ ପରିଣତ ହୋଇଛି । ଦରମା ପରେ ଏବେ କର୍ମଚାରୀ ଓ ଶ୍ରମିକଙ୍କ ଭବିଷ୍ୟତ ନିଧି ଟଙ୍କା ଆତ୍ମସାତ୍ କରାଯାଉଛି ବୋଲି ଅଭିଯୋଗ ହୋଇଛି ା
୨୦୦୧ରେ ସୁକିନ୍ଦା ଖଣି ଅଞ୍ଚଳରେ ୪ ନୂତନ ଖଣି କାର୍ଯ୍ୟାରମ୍ଭ କଲା । ସେଥିମଧ୍ୟରୁ ବାଲେଶ୍ବର ଆଲଏଜ୍ କାରଖାନାକୁ ସୁକିନ୍ଦାର କାଳିଆପାଣି କ୍ରୋମାଇଟ ଖଣି ଲିଜ୍ ଆକାରରେ ରାଜ୍ୟ ସରକାର ଦେଇଥିଲେ । ସେହି ଖଣି ଖୋଲା ହେବା ପରେ ଅଞ୍ଚଳବାସୀ ନିଜ ସହିତ ପରିବାରର ଉଜ୍ଜ୍ୱଳ ଭବିଷ୍ୟତ ପାଇଁ ଆଶା ରଖି ଖଣିରେ କାମ କରିଥିଲେ । ବାଲେଶ୍ବର ଆଲଏଜ ଖଣିରେ ସ୍ଥାୟୀ ଓ ଠିକାଦାରଙ୍କ ପାଖରେ କାମ କରୁଥିବା ୬ଶହରୁ ଊର୍ଦ୍ଧ୍ୱ କର୍ମଚାରୀ, ଶ୍ରମିକଙ୍କ କାମ କରିଥିଲେ । ୬୫ ହେକ୍ଟର ପରିମିତ ଲିଜ୍ ଜମିରେ ଖଣି ଖୋଳିବା ସହ କମ୍ପାନୀ ଡମ୍ଫ ଓ କ୍ରୋମାଇଟ ପ୍ଲଟ କରିଥିଲା । ସେ ସମୟରେ କମ୍ପାନୀର ଏକ ନିଜସ୍ବ ଠିକାଦାର କେଡେନସିଆଲ (କ୍ରେଡେନସିଆଲ ଲୋଜେଷ୍ଟିକ ) କର୍ମଚାରୀମାନଙ୍କୁ ନିଯୁକ୍ତି ଦେଇଥିଲା । ଗତ ୨୦୧୭ରେ କମ୍ପାନୀ ନିଜ ଖଣି କାମ ସଙ୍କୁଚିତ କରିବା ଆରମ୍ଭ କରିଥିଲା । ସେବେଠାରୁ ଠିକାଦାରଙ୍କ ଲାଇସେନ୍ସ ଅଚଳ ହୋଇଗଲା । ପରବର୍ତ୍ତୀ ସମୟରେ କରୋନା ମହାମାରୀ ଯୋଗୁ ଖଣି କାମ ପ୍ରଭାବିତ ହୋଇଥିଲା । ସେ ସମୟରେ ଖଣି ମାଲିକ କର୍ମଚାରୀମାନଙ୍କୁ ଦରମା ଦେବା ବନ୍ଦ କରିଦେଇଥିଲେ । ୨୦୧୭ରୁ ଇପିଏଫ୍ (ଭବିଷ୍ୟତ ନିଧି) ଟଙ୍କା କର୍ମଚାରୀଙ୍କଠାରୁ କାଟି ରଖି ଜମା କରି ନ ଥିଲେ । ୨୦୨୨ରେ କମ୍ପାନୀର ୨୧୦ ଜଣ ସ୍ଥାୟୀ କର୍ମଚାରୀଙ୍କ କଟାଯାଇଥିବା ଟଙ୍କା ଜମା କରିଥିବା ବେଳେ କମ୍ପାନୀ ପକ୍ଷରୁ ଜମା କରିବାକୁ ଥିବା ଟଙ୍କା ଜମା କରାଯାଇ ନ ଥିଲା। ଏହାକୁ ନେଇ କର୍ମଚାରୀମାନେ ଆସିଷ୍ଟାଣ୍ଡ ଲେବର କମିଶନଙ୍କ ନିକଟରେ ଅଭିଯୋଗ କରିଥିଲେ ା ହେଲେ ସେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରିବାରୁ କର୍ମଚାରୀମାନେ ହତାଶ ହୋଇଥିଲେ। କମ୍ପାନୀର ସମସ୍ତ ସ୍ଥାୟୀ ଓ ଅସ୍ଥାୟୀ କର୍ମଚାରୀଙ୍କ ଭବିଷ୍ୟତ ନିଧି ହିସାବ କଲେ ଆନୁମାନିକ ୫ କୋଟି ଟଙ୍କା ହେବ ବୋଲି ବହୁ କର୍ମଚାରୀ ଅଭିଯୋଗ କରିଛନ୍ତି । ୨୦୧୭ରୁ କମ୍ପାନୀ ଦରମା ଦେବା ବନ୍ଦ କରିବା ସହ ଅନ୍ୟାନ୍ୟ ସମସ୍ତ ଦେୟ ଓ ଭବିଷ୍ୟତନିଧି ପାଣ୍ଠିରେ ଜମା କରିବା ବନ୍ଦ କରିଦେଇଥିଲା। ଫଳରେ କର୍ମଚାରୀମାନେ ଦରମା ନ ପାଇ ଆର୍ଥିକ ଅନଟନ ମଧ୍ୟରେ ଦିନ କାଟିଥିଲେ ା ଶେଷରେ ପରିବାର ପ୍ରତିପୋଷଣ ପାଇଁ ସେମାନେ ଅନ୍ୟ ରାଜ୍ୟକୁ ଦାଦନ ଖଟିବାକୁ ଯାଇଥିଲେ ା ଏବେ ବହୁ କର୍ମଚାରୀ ବିଭିନ୍ନ ରାଜ୍ୟରେ ଦାଦନ ଖଟୁଛନ୍ତି ା ସେମାନେ ଇପିଏଫ୍ ସମ୍ପର୍କରେ କମ୍ପାନୀ ଅଧିକାରୀଙ୍କଠାରୁ କୌଣସି ଉତ୍ତର ପାଉନାହାଁନ୍ତି । ଏ ନେଇ କମ୍ପାନୀର ଖଣି ମହାପ୍ରବନ୍ଧକ ପତିତ ବାରିକଙ୍କୁ ଯୋଗାଯୋଗ କରାଯାଇଥିଲା। ହେଲେ ସେ ଫୋନ ନ ଉଠାଇବାରୁ ତାଙ୍କ ମତାମତ ମିଳିପାରି ନାହିଁ ା
