ବଲାଙ୍ଗୀର ଅଫିସ, ୧ା୧୦: ଛତିଶଗଡର ଭିଲାଇ ନିକଟ ଏକ ଫାର୍ମହାଉସରେ ବଲାଙ୍ଗୀର ଜିଲାର ଗୋଟିଏ ଦାଦନ ଶ୍ରମିକ ପରିବାରର ୪ ଜଣ ସଦସ୍ୟଙ୍କୁ ହତ୍ୟା କରାଯାଇଥିବା ଜଣାପଡିଛି। ଏହି ଘଟଣା ଛତିଶଗଡ଼ ଏବଂ ଓଡ଼ିଶାରେ ଚାଞ୍ଚଲ୍ୟ ଖେଳାଇ ଦେଇଛି। ମୃତକମାନେ ହେଲେ ବଲାଙ୍ଗୀର ଜିଲା ସିନ୍ଧେକେଲା ଥାନା ଦେଢ଼ଗାଁ ଗ୍ରାମ ପଞ୍ଚାୟତ ଡେଙ୍ଗପଦର ଗ୍ରାମର ଭୋଲାନାଥ ଯାଦବ (୩୫), ସ୍ତ୍ରୀ ନୈନା (୩୦),ପୁଅ ପ୍ରମୋଦ (୧୨) ଓ ଝିଅ ମୁକ୍ତା (୭)। ଛତିଶଗଡ଼ ପୋଲିସ ଏହି ଘଟଣାରେ ମୃତକଙ୍କ ସାନଭାଇ ସମେତ ୩ ଜଣଙ୍କୁ ଗିରଫ କରିଛି। ସାନଭାଇଙ୍କ ପାଖରୁ ପୋଲିସ ୫ ଲକ୍ଷ ଜବତ କରିଥିବାରୁ ଅନୈତିକ କାର୍ଯ୍ୟ ଓ ଟଙ୍କା ନେଣଦେଣ ନେଇ ଏହି ହତ୍ୟାକାଣ୍ଡ ଘଟିଥିବା ପୋଲିସ ସନ୍ଦେହ କରୁଛି।
ମିଳିଥିବା ସୂଚନା ମୁତାବକ, ପ୍ରାୟ ୧୨ ବର୍ଷ ତଳେ ଡେଙ୍ଗପଦର ଗ୍ରାମର ଭୋଲାନାଥ ଯାଦବ କାମ ଅନ୍ବେଷଣରେ ଛତିଶଗଡ଼ର ଭିଲାଇ ନିକଟ କପସଦା-ଓକୋଲା ରୋଡ୍ଠାରେ ଥିବା ଏକ ଫାର୍ମ ହାଉସରେ କାମ କରିବାକୁ ଯାଇଥିଲେ। ପରେ ସ୍ତ୍ରୀ, ପୁଅ ଓ ଝିଅଙ୍କୁ ସେଠାକୁ ନେଇଥିଲେ। ସେଠାରେ ରହୁଥିବା ଭୋଲାନାଥଙ୍କ ଘରେ ବୁଧବାର କେହି ଦୁର୍ବୃତ୍ତ ପଶି ଭୋଲାନାଥଙ୍କ ସହ ତାଙ୍କ ସ୍ତ୍ରୀ, ପୁଅ ଓ ଝିଅଙ୍କୁ ହତ୍ୟା କରି ଫେରାର ହୋଇଯାଇଥିଲେ। ଭୋଲାନାଥ ଓ ସ୍ତ୍ରୀ ନୈନାଙ୍କ ମୃତଦେହ ଗୁରୁବାର ଫାର୍ମହାଉସ ବାହାରେ ପଡ଼ିଥିବା ଦେଖି କୁମ୍ଭାରୀ ଥାନା ପୋଲିସକୁ ଖବର ଦିଆଯାଇଥିଲା। କୁମ୍ଭାରୀ ଏବଂ ଦୁର୍ଗ ପୋଲିସ ପହଞ୍ଚତ୍ ତଦନ୍ତ ଆରମ୍ଭ କରିଥିଲା। ଡଗ୍ ସ୍କ୍ବାଡ୍ ଏବଂ ସାଇଣ୍ଟିଫିକ୍ ଟିମ୍ ସହ ପୋଲିସ ତଦନ୍ତ ଆରମ୍ଭ କରିଥିଲା। ପୋଲିସ ପାରିପାର୍ଶ୍ୱିକ ସ୍ଥିତି ଅନୁଧ୍ୟାନ କରି କେହି ଜଣେ ନିଜ ଲୋକ ହତ୍ୟାକାଣ୍ଡ ଘଟାଇଥିବା ସନ୍ଦେହ କରିଥିଲା। ଏହାପରେ ଅଧିକ ତଦନ୍ତ କରିବାରୁ ଘଟଣାଦିନ ଭୋଲାନାଥଙ୍କ ଜଣେ ସାନଭାଇ ସେଠାକୁ ଯାଇଥିବା ଜଣାପଡ଼ିଥିଲା। ପରେ ସେ ଦିଗରେ ତଦନ୍ତ କରାଯାଇଥିଲା। ଛତିଶଗଡ଼ ପୋଲିସର ଏକ ଟିମ୍ ସିନ୍ଧେକେଲା ଥାନା ଅଞ୍ଚଳକୁ ଆସି ତଦନ୍ତ କରିଥିଲେ। ପରେ ଛତିଶଗଡ଼ ପୋଲିସ ଏହି ହତ୍ୟା ଘଟଣାରେ ମୃତ ଭୋଲାନାଥଙ୍କ ଭାଇ ଏବଂ ତାଙ୍କର ଅନ୍ୟ ଦୁଇଜଣ ସହଯୋଗୀଙ୍କୁ ଗିରଫ କରିଥିବା ଜଣାପଡ଼ିଛି। ଉକ୍ତ ଫାର୍ମହାଉସଠାରେ ଅନୈତିକ କାର୍ଯ୍ୟ ଚାଲିଥିବା ଏବଂ ସେଠାରେ ଲକ୍ଷାଧିକ ଟଙ୍କା କାରବାର ହେଉଥିବା ପୋଲିସ ଜାଣିବା ପରେ ଛାନବିନ୍ କରିଥିଲା। ଗିରଫ ଭୋଲାନାଥଙ୍କ ଭାଇ ଘରୁ ପୋଲିସ ୫ ଲକ୍ଷ ଟଙ୍କା ଜବତ କରିଥିବା ଜଣାପଡିଛି। ଏତେ ଟଙ୍କା ଜବତ ହେବା ପରେ ଉକ୍ତ ଫାର୍ମହାଉସ ଠାରେ କିଭଳିଆ ଅନୈତିକ କାର୍ଯ୍ୟ ଚାଲିଥିଲା ଏବଂ ଏକ ଦାଦନ ପରିବାର ପାଖକୁ ଏତେ ଟଙ୍କା କିଭଳି ଆସୁଥିଲା ତାହା ପୋଲିସକୁ ବିସ୍ମିତ କରିଛି। ଛତିଶଗଡରେ ମୃତ ଭୋଲାନାଥ, ତାଙ୍କ ସ୍ତ୍ରୀ, ପୁଅ ଓ ଝିଅଙ୍କ ଅନ୍ତିମ ସଂସ୍କାର କରାଯାଇଥିବା ଜାଣିବାକୁ ମିଳିଛି।
