ବାଲୁଗଁ।/ବାଣପୁର, ୨୨।୧୦(ଡି.ଏନ୍.ଏ.): ଖୋର୍ଦ୍ଧା ଜିଲାରେ ଅଣ ପଞ୍ଜୀକୃତ ଠିକାଦାରଙ୍କ ସଂଖ୍ୟା ବଢ଼ିବାରେ ଲାଗିଛି। ଏମାନେ ବାହାର ରାଜ୍ୟ କମ୍ପାନୀର ଏଜେଣ୍ଟ ଭାବେ କାର୍ଯ୍ୟ କରୁଛନ୍ତି। ନିଜକୁ ପଞ୍ଜୀକୃତ ଠିକାଦାର ବୋଲି ପରିଚୟ ଦେଇ ଗରିବ ଲୋକଙ୍କୁ ଅଧିକ ଟଙ୍କା ରୋଜଗାର ଆଶା ଦେଖାଇ ବାହାର ରାଜ୍ୟକୁ ନେଉଛନ୍ତି। ସେଠାରେ ସେମାନେ କମ୍ପାନୀରେ ନିମ୍ନ ମଜୁରି ସହ ନିର୍ଯାତନାର ଶିକାର ହେଉଛନ୍ତି। ଏହିକ୍ରମରେ ଖୋର୍ଦ୍ଧା ଜିଲା ବାଣପୁର ଅଞ୍ଚଳର ୫ ଓ ଗଞ୍ଜାମ ଜିଲାର ୩ଜଣ ଶ୍ରମିକ ଓମାନର ମସ୍କାଟ ସହରରେ ନିର୍ଯାତିତ ହେଉଛନ୍ତି। ସେମାନଙ୍କୁ ସେଠାରୁ ଆଣିବା ପାଇଁ ପରିବାରଲୋକ ବାଲୁଗଁ। ସହକାରୀ ଶ୍ରମ-ଅଧିକାରୀଙ୍କୁ ନିବେଦନ କରିବା ସହ ଅଭିଯୋଗ ପତ୍ର ପ୍ରଦାନ କରିଛନ୍ତି।
ଅଭିଯୋଗ ମୁତାବକ, ଅଧିକ ରୋଜଗାର ଆଶାରେ ବାଣପୁର ବ୍ଲକ ଅଞ୍ଚଳର ଜଣେ ଏଜେଣ୍ଟଙ୍କ ମାଧ୍ୟମରେ ୪ବର୍ଷ ପୂର୍ବେ ଓମାନର ମସ୍କାଟ ସହରସ୍ଥିତ ଏକ କମ୍ପାନୀରେ କାମ କରିବା ପାଇଁ ଚନ୍ଦନ ବେହେରା, ଅଶୋକ କୁମାର ବେହେରା, ସନ୍ତୋଷ କୁମାର ଦଳାଇ, ସୁରେଶ ପ୍ରଧାନ, ଅଲେଖ ପରିମାଣିକ, କାଳୁ ଚରଣ ଜେନା, ଜଗନ୍ନାଥ ପଲାଇ ଓ ବୁଲୁ ନାୟକ ଯାଇଥିଲେ। ଦୀର୍ଘ ୧୧ମାସ ହେବ ଉକ୍ତ କମ୍ପାନୀ କର୍ତ୍ତୃପକ୍ଷ ଶ୍ରମିକଙ୍କ କାର୍ଯ୍ୟ ସହ ପାରିଶ୍ରମିକ ବନ୍ଦ କରିଦେଇଥିଲେ। ଏପରିକି ସେମାନଙ୍କୁ ଖାଇବାକୁ ମଧ୍ୟ ଦିଆଯାଉ ନାହିଁ। କମ୍ପାନୀ କର୍ତ୍ତୃପକ୍ଷଙ୍କ ବିରୋଧରେ ସ୍ବର ଉତ୍ତୋଳନ କଲେ ମିଳୁଛି ଅକଥନୀୟ ନିର୍ଯାତନା। ଫଳରେ ସେମାନଙ୍କ ନିକଟରେ ଥିବା ସଞ୍ଚିତ ଅର୍ଥ ସରିଯିବାରୁ ଭୋକଉପାସରେ ସେଠାରେ ଦିନ କାଟୁଛନ୍ତି। ସେମାନଙ୍କୁ ସେଠାରୁ ଉଦ୍ଧାର କରିବା ପାଇଁ ମୋବାଇଲରେ ଭିଡିିଓ କଲ କରି ନିଜ ପରିବାରଲୋକଙ୍କୁ ଗୁହାରି କରିଛନ୍ତି। ବହୁ ଚେଷ୍ଟା ସତ୍ତ୍ୱେ ପୁଅକୁ ଫେରାଇ ଆଣିବା ପାଇଁ ବିଫଳ ହେବା ପରେ ଆୟତ୍ତପୁର ଗ୍ରାମର ଚନ୍ଦନଙ୍କ ମା’ ପଞ୍ଚେଇ ବେହେରା ଗତ ସୋମବାର ବାଲୁଗଁ। ସହକାରୀ ଶ୍ରମ-ଅଧିକାରୀଙ୍କ ଦ୍ୱାରସ୍ଥ ହୋଇଥିଲେ। ତୁରନ୍ତ ସେମାନଙ୍କୁ ସ୍ବଦେଶ ଫେରାଇ ଆଣିବା ଲାଗି ନିବେଦନ କରିଛନ୍ତି। ଏ ସମ୍ପର୍କରେ ସହକାରୀ ଶ୍ରମ ଅଧିକାରୀ ଚନ୍ଦନ ମାଝୀ କହିଛନ୍ତି, ଅଭିଯୋଗ ସମ୍ପର୍କରେ ଖୋର୍ଦ୍ଧା ଜିଲାପାଳ ଏବଂ ରାଜ୍ୟ ଶ୍ରମ କମିଶନରଙ୍କୁ ଅବଗତ କରାଯାଇଛି। ତୁରନ୍ତ ୮ ଶ୍ରମିକଙ୍କୁ ଗ୍ରାମକୁ ଫେରାଇ ଆଣିବା ପାଇଁ ଚେଷ୍ଟା ଜାରି ରହିଛି ବୋଲି ସେ କହିଛନ୍ତି।
