ଶ୍ରୀନଗର,୨୪।୨ : ଜମ୍ମୁ-କଶ୍ମୀରର ବାରମୁଳା ଏବଂ ଶୋପିଆନ ଜିଲାରୁ ଲଶ୍କର-ଇ-ତୋଏବା ଆତଙ୍କବାଦୀଙ୍କ ଚାରିଜଣ ସହାୟକଙ୍କୁ ସୁରକ୍ଷା ବାହିନୀ ଗିରଫ କରିଛନ୍ତିି। ପୋଲିସ ମୁଖପାତ୍ର କହିଛନ୍ତି ଯେ ବାରମୁଳା ଠାରୁ ନିଷିଦ୍ଧ ଆତଙ୍କବାଦୀ ସଂଗଠନ ଲଶ୍କର ସହ ଜଡିତ ଆତଙ୍କବାଦୀଙ୍କ ଦୁଇଜଣ ସହାୟକଙ୍କୁ ମିଳିତ ସୁରକ୍ଷା ବାହିନୀ ଗିରଫ କରିଛନ୍ତି। ସେମାନଙ୍କ ନିକଟରୁ ଗୁଳିଗୋଳା ସମେତ ଅନ୍ୟାନ୍ୟ ସାମଗ୍ରୀ ଉଦ୍ଧାର କରାଯାଇଛି ବୋଲି ସେ କହିଛନ୍ତି।
ମୁଖପାତ୍ର କହିଛନ୍ତି ଯେ ବାରମୁଳା ଅଞ୍ଚଳରେ ପୋଲିସ ତଥା ଅନ୍ୟ ସୁରକ୍ଷା ବାହିନୀ ବିରୁଦ୍ଧରେ ଶାନ୍ତି ତଥା ଆଇନ ଶୃଙ୍ଖଳା ଭଙ୍ଗ କରିବା ପାଇଁ ଖାଚଦାରୀ ଜେହାନପୋରାର ଅଜ୍ଞାତ ଆତଙ୍କବାଦୀ ଗୋଷ୍ଠୀ ବେଆଇନ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ସହିତ ସକ୍ରିୟ ରହିଥିବାର ଗୁପ୍ତ ସୂଚନା ମିଳିଥିଲା।
ସୂଚନା ଅନୁସାରେ, ସୁରକ୍ଷା ବାହିନୀ ଜେହାନପୋରା-ଖଦନିଆର ଲିଙ୍କ ରୋଡ ସମେତ ଅନେକ ସ୍ଥାନରେ ଅବରୋଧ କରିଥିଲେ। ଅନୁସନ୍ଧାନ ବେଳେ ଜେହାନପୋରା ପଟୁୁ ଦୁଇଜଣ ଲୋକ ସ୍କୁଟିରେ ଆସୁଥିଲେ। ସେମାନଙ୍କର ହାବଭାବ ସନ୍ଦେହଜନକ ଜଣାପଡୁଥିଲା। ଅବରୋଧ ଦେଖି ସେମାନେ ଦୌଡ଼ି ପଳାଇବାକୁ ଚେଷ୍ଟା କରିଥିଲେ ମଧ୍ୟ ସତର୍କ ପୋଲିସ ଦଳ ଉଭୟଙ୍କୁ ଧରିଥିଲା। ସେମାନଙ୍କ ନିକଟରୁ ୪୦ ରାଉଣ୍ଡ ଗୁଳି ଏବଂ ଏକେ-୪୭ ରାଇଫଲ ଜବତ କରାଯାଇଛି।
ସେହିପରି ଶୋପିଆନ୍ରୁ ଲଶ୍କର ଆତଙ୍କବାଦୀଙ୍କ ଦୁଇ ସହାୟକଙ୍କୁ ମଧ୍ୟ ପୋଲିସ ଗିରଫ କରିଛି। ମୁଖପାତ୍ର କହିଛନ୍ତି ଯେ ଏକ ମାମଲାର ତଦନ୍ତ ବେଳେ ଦୁଇ ଆତଙ୍କବାଦୀଙ୍କ ସହଯୋଗୀଙ୍କ ଆକିବ ମୁଶତାକ ଲୋନ ଏବଂ ଆମୀର ଆମିନ ସୋଫିଙ୍କୁ ପୋଲିସ ଅଧିକାରୀମାନେ ଗିରଫ କରିଛନ୍ତି। ଉଭୟ ଶାଦଚେକ ଅଞ୍ଚଳର ବାସିନ୍ଦା।
