ଭୁବନେଶ୍ୱର,୧୭।୭(ବ୍ୟୁରୋ): ବିଲ୍ଡର କୃଷ୍ଣଚନ୍ଦ୍ର ନାୟକ ହତ୍ୟା ମାମଲାର ରାୟ ଶନିବାର ପ୍ରକାଶ ପାଇଛି। ଭୁବନେଶ୍ୱର ଅତିରିକ୍ତ ଜିଲା ଦୌରା ଜଜ୍-୩ (ଏଡିଜେ-୩) ହତ୍ୟାରେ ସମ୍ପୃକ୍ତ ଥିବା ୪ଜଣଙ୍କୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡାଦେଶରେ ଦଣ୍ଡିତ କରିଛନ୍ତି। ଏଥିସହ ପ୍ରତ୍ୟେକଙ୍କୁ ୧୦ହଜାର ଟଙ୍କା ଲେଖାଏ ଜରିମାନା ନିର୍ଦ୍ଦେଶ ଦେଇଛନ୍ତି। ଅଭିଯୁକ୍ତମାନେ ହେଲେ ସଲିଲ୍ ଓରଫ୍ ତାରିଣୀ ପଟ୍ଟନାୟକ, ନେପୁ ଓରଫ୍ ସୁରଜ୍ ଶର୍ମା, ପିଣ୍ଟୁ ଓରଫ୍ ରାଜେଶ କୁମାର ବାରିକ ଓ ନାନା ଓରଫ ସନ୍ତୋଷ ପଢିଆରୀ। ସମସ୍ତ ସାକ୍ଷ୍ୟ ଓ ପ୍ରମାଣକୁ ଭିତ୍ତିକରି ଏଡିଜେ-୩ ବିଚାରପତି ସସ୍ମିତା ପରହି ଏହି ଦଣ୍ଡାଦେଶ ଶୁଣାଇଛନ୍ତି। ପିପି ସାରଦା ଚନ୍ଦ୍ର ସାମନ୍ତ ମାମଲା ପରିଚାଳନା କରୁଥିଲେ।
ଯେ, ବ୍ୟବସାୟିକ ଶତ୍ରୁତାକୁ କେନ୍ଦ୍ର କରି ୨୦୧୩ ଅଗଷ୍ଟ ୧୨ ସକାଳ ୧୦ଟା ୧୫ରେ ନୟାପଲ୍ଲୀ ଥାନା ଅନ୍ତର୍ଗତ ଆଇଆର୍ସି ଭିଲେଜ୍ ନିକଟରେ କଳିଙ୍ଗପୁତ୍ର ବିଲ୍ଡର୍ସର ମାଲିକ କୃଷ୍ଣଚନ୍ଦ୍ର ନାୟକଙ୍କୁ ଆଇଆରସି ଭିଲେଜ୍ ପୋଷ୍ଟ ଅଫିସ ସାମ୍ନାରେ ମୁଖ୍ୟ ଅଭିଯୁକ୍ତ ସଲିଲ୍ ୩ ସହଯୋଗୀ ସୁରଜ, ରାଜେଶ ଓ ସନ୍ତୋଷଙ୍କ ସହ ମିଶି ଗୁଳି କରିଥିଲେ। ଘଟଣାସ୍ଥଳରେ ହିଁ କୃଷ୍ଣଚନ୍ଦ୍ରଙ୍କର ମୃତ୍ୟୁ ହୋଇଥିଲା। ଏ ନେଇ କୃଷ୍ଣଚନ୍ଦ୍ରଙ୍କ ପୁଅ ଧନଞ୍ଜୟ ନାୟକ ନୟାପଲ୍ଲୀ ଥାନାରେ ହତ୍ୟା ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ପୋଲିସ ମାମଲା ରୁଜୁ କରି ଘଟଣାର ତଦନ୍ତ କରିଥିଲା। ତତ୍କାଳୀନ ଆଇଆଇସି ଅନୁପ କୁମାର କାନୁନ୍ଗୋ ଘଟଣାରେ ସମ୍ପୃକ୍ତ ୪ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ। ଏଥିସହ ସେମାନଙ୍କ ବିରୋଧରେ ସମସ୍ତ ପ୍ରମାଣ ଯୋଗାଡ଼ କରି ଚାର୍ଜଶିଟ୍ ଦାଖଲ କରିଥିଲେ।
