ଭୁବନେଶ୍ୱର,୧୪।୯(ବ୍ୟୁରୋ): ଶନିବାର ରାତିରେ ଜଣେ ଡେଲିଭରି ବୟଙ୍କୁ ଦୁର୍ବୃତ୍ତମାନେ ଅପହରଣ କରିନେଇଥିବା ଧଉଳି ଥାନାରେ ଅଭିଯୋଗ ହୋଇଥିଲା। ପୋଲିସ ମାମଲା ରୁଜୁ କରି ତଦନ୍ତ କରୁଥିବା ବେଳେ ଘଟଣାକୁ ୪୮ ଘଣ୍ଟା ବିତିଛି। ହେଲେ ଅପହରଣ ହୋଇଥିବା ପତିତପାବନ ପୃଷ୍ଟିଙ୍କୁ ପୋଲିସ ଖୋଜି ପାଇନାହିଁ। ତେବେ ଏନେଇ ଜୋନ୍-୨ ଏସିପି ବିଷ୍ଣୁ ପ୍ରସାଦ ପାତ୍ରଙ୍କ କହିବା କଥା, ଏହି ଘଟଣାରେ ୪ଟି ଟିମ୍ ଗଠନ କରାଯାଇଛି। ତଥ୍ୟ ପ୍ରମାଣ ଆଧାରରେ ବିଭିନ୍ନ ଦିଗକୁ ନେଇ ତଦନ୍ତ କରାଯାଉଥିବା ସେ କହିଛନ୍ତି। ଅନ୍ୟପଟେ ପୋଲିସ ଗୁରୁତ୍ୱର ସହ ନେଇ ଖୋଜୁ ନ ଥିବା ପତିତପାବନଙ୍କ ବଡଭାଇ ପୁରୁଷୋତ୍ତମ ପୃଷ୍ଟି ଅଭିଯୋଗ କରିଛନ୍ତି। ତେବେ ଏହି ଘଟଣାରେ ପରିବାରଲୋକଙ୍କ ସମ୍ପୃକ୍ତି ଥିବା ମଧ୍ୟ ପୋଲିସ ସନ୍ଦେହ କରୁଛି। ଏସମ୍ପର୍କରେ ପତିତପାବନଙ୍କ ପତ୍ନୀ ଅହଲ୍ୟା ପୃଷ୍ଟିଙ୍କୁ କହିଛନ୍ତି, ସ୍ବାମୀଙ୍କ ନିଖୋଜ ହେବାର ୪୮ଘଣ୍ଟା ବିତିଲାଣି। ତାଙ୍କ ଦେହରେ ଛୁରି ଭୁସା ଯାଇଥିଲା। ସେ ଏବେ କେମିତି ଅଛନ୍ତି, କିଭଳି ଅବସ୍ଥାରେ ଅଛନ୍ତି, ତାଙ୍କ ସହ କ’ଣ ଘଟିଛି କିଛି ଜଣାପଡୁନାହିଁ। । ପୋଲିସକୁ ପଚାରିବାରୁ ସନ୍ଧାନ ମିଳିଲେ ଖବର ଦିଆଯିବ ବୋଲି କହୁଛନ୍ତି। ତେବେ ଘଟଣା ଉପରେ ରହସ୍ୟ ଉଠି ନ ଥିବା ବେଳେ ଏହାକୁ ନେଇ ଚର୍ଚ୍ଚା ଲାଗି ରହିଛି।
ସୂଚନାଯୋଗ୍ୟ, ପତିତପାବନ ତାଙ୍କ ପତ୍ନୀ ଓ ବଡ଼ଭାଇଙ୍କ ସହ ସ୍ଥାନୀୟ ଥାନା ନୂଆଗାଁ ବିଜୟ ବିହାରରେ ଘର ଭଡ଼ା ନେଇ ରହୁଥିଲେ। । ପତିତପାବନ ଏକ ଖାଦ୍ୟ ଡେଲିଭରି ସଂସ୍ଥାରେ କାମ କରୁଥିଲେ। ଶନିବାର ସା ପ୍ରାୟ ୬ଟାରେ ଖାଦ୍ୟ ଅର୍ଡର ପାଇଁ ଯିବା ସହ ନୂଆ ଗ୍ୟାରେଜ ପାଇଁ କିଛି ଉପକରଣ କିଣିବାକୁ କହି ସାଙ୍ଗରେ ୩୦ ହଜାର ଟଙ୍କା ନେଇ ଘରୁ ବାହାରିଥିଲେ। ତେବେ ରାତି ପ୍ରାୟ ୯ଟା ୪୫ରେ ସେ ତାଙ୍କ ସ୍ତ୍ରୀ ଅହଲ୍ୟାଙ୍କୁ ଫୋନ୍ କରି କହିଥିଲେ, ସୁନ୍ଦରପଦା ଓ ସାମନ୍ତରାପୁର ମଝି କପିଳେଶ୍ୱର କେନାଲ ବନ୍ଧରେ ତାଙ୍କ ଗାଡ଼ି ଖରାପ ହୋଇଯାଇଥିବାରୁ ମୁଁ ଯାଇପାରୁନି। ପଛପଟେ ମଦୁଆ ୪ରୁ ୫ଜଣ ଅଛନ୍ତି। ପାଖରେ ଟଙ୍କା ଥିବାରୁ ଭୟ ଲାଗୁଥିବା କହିଥିଲେ। ତେବେ ପରେ ତାଙ୍କ ସ୍ତ୍ରୀଙ୍କୁ ହ୍ବାଟ୍ସଆପ୍ରେ ଅତି ଭୟଭୀତ ହୋଇ ଏକ ଭଏସ୍ ମେସେଜ ପଠାଇ ତାଙ୍କୁ କିଛି ଲୋକ ଛୁରୀ ଭୁସି ଡାଲା ଅଟୋରେ ପକାଇ ନେଇଯାଉଛନ୍ତି। ବଡଭାଇକୁ ଇତ୍ତରାଠି ଆସିବା ପାଇଁ କହିଥିଲେ। ଏହାପରେ ପରିବାର ଲୋକେ ଖୋଜାଖୋଜି କରି ତାଙ୍କୁ ନ ପାଇବାରୁ ଶେଷରେ ରାତି ପ୍ରାୟ ୨ଟାରେ ସେମାନେ ଧଉଳି ଥାନାରେ ଅଭିଯୋଗ କରିଥିଲେ। ରବିବାର ସକାଳ ପ୍ରାୟ ୮ଟାରେ ଲିଙ୍ଗିପୁର ନଦୀ ବନ୍ଧ ନିକଟରେ ପୋଲିସ ଓ ପରିବାର ଲୋକେ ଖୋଜାଖୋଜିବେଳେ ପତିତପାବନଙ୍କର ଚପଲ, ଖାଦ୍ୟ ଯୋଗାଣକାରୀ ସଂସ୍ଥାର ବ୍ୟାଗ୍, ଟି-ଶାର୍ଟ, ଖାଲି ପର୍ସ ଓ ନିକଟରେ ପୋତାଯାଇଥିବା ଏକ ଛୁରି ମିଳିଥିଲା।
