ଅମରପାଲି, ୯।୮ (ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକର ଉପାନ୍ତ ତଥା ରେଢ଼ାଖୋଲ ବ୍ଲକ ସୀମାବର୍ତ୍ତୀ ଅଞ୍ଚଳରେ ଲଘୁଚାପଜନିତ ବର୍ଷା ଯୋଗୁ ବିଭିନ୍ନ ଜୋର ଓ ନାଳରେ ବନ୍ୟାଜଳ ପ୍ରବାହିତ ହେଉଛି। ଏହାର ପ୍ରଭାବରେ ଖଣ୍ଡହତା-ସାହାଜଲଥା ରାସ୍ତାରେ ଥିବା ଦଲକି ନାଳ ପୋଲ ଉପରେ ପ୍ରାୟ ୪ ଫୁଟ୍ ଉଚ୍ଚର ବନ୍ୟାଜଳ ପ୍ରବାହିତ ହେଉଛି। ଫଳରେ ରବିବାର ଭୋରରୁ ଏହି ରାସ୍ତାରେ ଯାତାୟାତ ବିଚ୍ଛିନ୍ନ ହୋଇପଡ଼ିଛି।
ସୂଚନା ଅନୁସାରେ, ଉପରମୁଣ୍ଡରେ ଗତରାତି ପ୍ରବଳ ବର୍ଷା ହେବାରୁ ଅଞ୍ଚଳ ଦେଇ ପ୍ରବାହିତ ସୁରବାଲି ଜୋରରେ ବନ୍ୟାଜଳ ଆସିଛି। ଦଲକି ନାଳ ସାହାଜଲଥା ନିକଟରେ ସୁରବାଲି ଜୋରରେ ମିଶିଥିବାରୁ ସୁରବାଲି ଜୋରରେ ଅଧିକ ପାଣି ଆସିବା ଯୋଗୁ ଦଲକି ନାଳର ଜଳ ନିଷ୍କାସନରେ ବାଧା ସୃଷ୍ଟି ହୋଇଛି। ଫଳରେ ପୋଲ ଉପରେ ବନ୍ୟାଜଳର ଉଚ୍ଚତା ବଢ଼ି ପ୍ରାୟ ୪ ଫୁଟ୍ରେ ପହଞ୍ଚିଛି।
ପୋଲ ଉପରେ ବନ୍ୟାଜଳ ପ୍ରବାହିତ ହେଉଥିବାରୁ ଖଣ୍ଡହତା ଓ ସାହାଜଲଥା ମଧ୍ୟରେ ଯାତାୟାତ ବନ୍ଦ ରହିଛି। ଏହାର ପ୍ରଭାବରେ ସାହାଜଲଥା ସମେତ ବୀରମହାରାଜପୁର ଉପରେ ନିର୍ଭରଶୀଳ ରେଢ଼ାଖୋଲ ବ୍ଲକର ଭରତାପୁର ପଞ୍ଚାୟତ ଅଧୀନ ଭତରା, ସରୁଆଝୁଲି, ସରଗିପାଲ, ଆରଖକୁଦ, ତେନ୍ତେଲାଖୋଲ, ବଡ଼ଖୋଲ ଓ ଭୀମମୁଣ୍ଡା ଆଦି ଗ୍ରାମର ଲୋକେ ଯାତାୟାତରେ ଅସୁବିଧା ଭୋଗୁଛନ୍ତି। ଖଣ୍ଡହତା ଅଞ୍ଚଳରୁ ରେଢ଼ାଖୋଲକୁ ଯୋଗାଯୋଗ ମଧ୍ୟ ବିଚ୍ଛିନ୍ନ ହୋଇଛି। ଲଗାଣ ବର୍ଷା ଜାରି ରହିଲେ ଜଳସ୍ତର ଆହୁରି ବୃଦ୍ଧି ପାଇବାର ଆଶଙ୍କା ଥିବାରୁ ଲୋକଙ୍କ ମଧ୍ୟରେ ଚିନ୍ତା ପ୍ରକାଶ ପାଇଛି।
