ବ୍ରହ୍ମପୁର ଅଫିସ/ଗୋପାଳପୁର,୨ା୧୦(ଡି.ଏନ.ଏ.): ଗଞ୍ଜାମ ଜିଲା ବ୍ରହ୍ମପୁରରେ ସୁନା ଓ ରୁପା ଚୋରା ଚାଲାଣ ବଢ଼ିବାରେ ଲାଗିଛି। ବିଭିନ୍ନ ସମୟରେ ବାହାର ରାଜ୍ୟରୁ ଟିକସ ଫାଙ୍କି ସୁନାଗହଣା ଓ ରୁପା ଚାଲାଣ ହେଉଥିବା ଦେଖିବାକୁ ମିଳିଛି। ଦଶହରା ଯୋଗୁ ରବିବାର ଗୋଳନ୍ଥରା ଥାନା ପୋଲିସ ପକ୍ଷରୁ ସୋରଳ ଛକରେ ଭୋର ସାଢ଼େ ୫ଟାରେ ନାକାବନ୍ଦୀ କରାଯାଇଥିଲା। ଏହି ସମୟରେ ତାମିଲନାଡୁର ସେଲମ୍ ସହରରୁ ଏକ କାର୍(ନଂ. କେଏ୦୧ଏମ୍ଆର୧୫୪୫)ରେ ୪ ଜଣ ଯୁବକ ବିପୁଳ ପରିମାଣର ସୁନା ଓ ରୁପା ଅଳଙ୍କାର ଧରି ବ୍ରହ୍ମପୁର ଅଭିମୁଖେ ଦ୍ରୁତ ଗତିରେ ଆସୁଥିଲେ। ସନ୍ଦେହହେବାରୁ ଚେକିଂରେ ଥିବା ଥାନା ଅଧିକାରୀ ବିବେକାନନ୍ଦ ମହନ୍ତ ଓ ଅନ୍ୟ ପୋଲିସ କର୍ମଚାରୀ ଉକ୍ତ କାରକୁ ଅଟକାଇ ଥିଲେ। କାର୍ର ପଛସିଟ୍ ଯାଞ୍ଚ ବେଳେ ସିକ୍ରେଟ୍ ଚାମ୍ବର ଭିତରେ ବିପୁଳ ପରିମାଣର ସୁନା ଅଳଙ୍କାର ଓ ରୁପା ରହିଥିବା ଦେଖିବାକୁ ପାଇଥିଲେ। କାର୍ରେ ଥିବା ବ୍ୟକ୍ତିମାନେ କୌଣସି ସନ୍ତୋଷଜନକ ଉତ୍ତର ଦେଇପାରି ନ ଥିଲେ। ପରେ କାର ଓ ଉକ୍ତ ୪ଜଣ ବ୍ୟକ୍ତିଙ୍କୁ ପୋଲିସ ଗୋଳନ୍ଥରା ଥାନାକୁ ନେଇଥିଲା। ସେଠାରେ ସୁନା ଅଳଙ୍କାର ଓଜନ ବେଳେ ତାହା ୪ କେଜି ୬୬୪ ଗ୍ରାମ୍ ଓ ରୁପା ୧୮୫ କେଜି ୫୦୦ ଗ୍ରାମ ହୋଇଥିଲା। ଏହାର ବଜାର ମୂଲ୍ୟ ପ୍ରାୟ ୩ କୋଟି ୧୦ ଲକ୍ଷ ହେବ ବୋଲି ବ୍ରହ୍ମପୁର ଏସ୍ପି ସର୍ବଣ ବିବେକ୍ ଏମ୍. ସୂଚନା ଦେଇଛନ୍ତି।
