ନୂଆଦିଲ୍ଲୀ,୧୮।୪: ଦେଶରେ କରୋନା ସଂକ୍ରମଣ ପୁଣି ବଢ଼ିବାରେ ଲାଗିଛି। ସ୍ବାସ୍ଥ୍ୟମନ୍ତ୍ରଣାଳୟ ପକ୍ଷରୁ ଜାରି କରାଯାଇଥିବା ବୁଲେଟିନ୍ ଅନୁଯାୟୀ ଗତ ୨୪ ଘଣ୍ଟାରେ ସାରା ଦେଶରେ ୭,୬୩୩ ନୂଆ କରୋନା ମାମଲା ସାମ୍ନାକୁ ଆସିଛି। ଏତଦ୍ ବ୍ୟତୀତ କରୋନାଜନିତ ୧୧ଜଣଙ୍କ ମୃତ୍ୟୁ ହୋଇଛି। ବର୍ତ୍ତମାନ ଦେଶରେ ପଜିଟିଭିଟି ରେଟ୍ ୩.୬୨ପ୍ରତିଶତରେ ପହଞ୍ଚିଛି। ସର୍ବାଧିକ ୧,୫୨୮ ସଂକ୍ରମିତ କେରଳରେ ଚିହ୍ନଟ ହୋଇଛନ୍ତି। ଏହାପରେ ଦିଲ୍ଲୀ ରହିଛି, ଯେଉଁଠାରେ ୧,୦୧୭ ମାମଲା ସାମ୍ନାକୁ ଆସିଛି। ସେହିପରି ହରିୟାଣାରେ ୮୯୮, ତାମିଲନାଡୁରେ ୫୨୧ ଏବଂ ମହାରାଷ୍ଟ୍ରରେ ୫୦୫ଜଣ ସଂକ୍ରମିତ ହୋଇଛନ୍ତିି। ଅର୍ଥାତ୍ ୨୪ଘଣ୍ଟା ମଧ୍ୟରେ ଦେଶରେ ରିପୋର୍ଟ ହୋଇଥିବା ମୋଟ ମାମଲା ମଧ୍ୟରୁ ୫୮ପ୍ରତିଶତରୁ ଊର୍ଦ୍ଧ୍ୱ ରୋଗୀ କେବଳ ଏହି ୫ରାଜ୍ୟରୁ ଚିହ୍ନଟ ହୋଇଛି। ଅନ୍ୟପକ୍ଷେ ଦିଲ୍ଲୀରେ ବର୍ତ୍ତମାନ ପଜିଟିଭିଟି ରେଟ୍ ୩୨.୨୫ ପ୍ରତିଶତ ବୃଦ୍ଧି ପାଇଛି। ଅର୍ଥାତ୍ ପ୍ରତି ୧୦୦ଟେଷ୍ଟରେ ୩୨ରୁ ଊର୍ଦ୍ଧ୍ୱ ପଜିଟିଭ୍ ମାମଲା ଚିହ୍ନଟ ହେଉଛି। ଦିଲ୍ଲୀର ଏହି ପଜିଟିଭିଟି ରେଟ୍ ଗତ ୧୫ମାସରୁ ସବୁଠାରୁ ଅଧିକ ରହିଛି ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି। ସୋମବାର ଦିଲ୍ଲୀରେ ୧,୦୧୭ନୂଆ କରୋନା ମାମଲା ଚିହ୍ନଟ ହୋଇଥିବା ବେଳେ ୪ଜଣଙ୍କ ମୃତ୍ୟୁ ହୋଇଛି। ରାଜ୍ୟର ହସ୍ପିଟାଲରେ କରୋନା ରୋଗୀଙ୍କ ପାଇଁ ୭,୯୫୪ ଶଯ୍ୟା ସଂରକ୍ଷିତ ରଖାଯାଇଛି। ସେଥିମଧ୍ୟରୁ ୩୨୫ରୋଗୀ ଭର୍ତ୍ତି ହୋଇଥିବା ବେଳେ ୩,୬୪୩ ଜଣ ହୋମ ଆଇସୋଲେଶନ୍ରେ ରହିଛନ୍ତି। ସୂଚନା ମୁତାବକ କରୋନା ଉପରେ ନଜର ରଖିଥିବା ଆଇଏନ୍ଏସ୍ଏସିଓଜି ଅନୁଯାୟୀ ଦେଶରେ ଏପର୍ଯ୍ୟନ୍ତ ଏକ୍ସବିବି.୧.୧୬.୧ର ୪୩୬ ମାମଲା ସାମ୍ନାକୁ ଆସିଛି। ଏହି ମାମଲା ମହାରାଷ୍ଟ୍ର, ଗୁଜରାଟ, ଦିଲ୍ଲୀ, ହରିୟାଣା ସମେତ ୧୮ଟି ରାଜ୍ୟରେ ଏହି ମାମଲା ସାମ୍ନାକୁ ଆସିଛି।
