ବଲାଙ୍ଗୀର ଅଫିସ, ୨୮ା୧: ପ୍ରଧାନମନ୍ତ୍ରୀ ଆବାସ ଯୋଜନା କାର୍ଯ୍ୟକାରୀ କରାଯିବାକୁ ବଲାଙ୍ଗୀର ଜିଲାର ୩୧୭ ଗ୍ରାମ ପଞ୍ଚାୟତରେ ସର୍ଭେ କରାଯାଇଥିଲା। ଏହାର ନୂଆ ତାଲିକା ପ୍ରସ୍ତୁତ ହୋଇଛି। ଏହାକୁ ଗ୍ରାମସଭାରେ ଅନୁମୋଦନ କରାଯିବା କଥା। ତେବେ ପ୍ରସ୍ତୁତ ହୋଇଥିତ୍ବା ତାଲିକାରେ ଅନେକ ବିସଙ୍ଗତି ରହିଥିବା ଏବଂ ତାଲିକା ପ୍ରସ୍ତୁତିରେ ସରପଞ୍ଚମାନଙ୍କ କୌଣସି ମତ ନିଆଯାଇ ନ ଥିବାରୁ ଏହା ଗ୍ରହଣଯୋଗ୍ୟ ନୁହେଁ ବୋଲି ଜିଲାର ସରପଞ୍ଚମାନେ କହିଛନ୍ତି। ଅନ୍ୟପକ୍ଷେ ତାଲିକା ଗ୍ରାମସଭାରେ ଅନୁମୋଦନ ହୋଇ ନ ଥିବାରୁ ହିତାଧିକାରୀମାନେ ଆବାସ ଯୋଜନାରେ ଘର ପାଇବା ବିଳମ୍ବ ହେଉଛି।
ଜାନୁୟାରୀ ୨୬ ତାରିଖ ସାଧାରଣତନ୍ତ୍ର ଦିବସରେ ଜିଲାରେ ସ୍ବତନ୍ତ୍ର ଗ୍ରାମସଭା ଅନୁଷ୍ଠିତ ହେବା କଥା। ଏହି ଗ୍ରାମସଭାରେ ଆବାସ ଯୋଜନା ତାଲିକା ଅନୁମୋଦନ କରିବାକୁ ପ୍ରଶାସନ ତରଫରୁ ନିର୍ଦ୍ଦେଶ ଦିଆଯାଇଥିଲା। ଏହାକୁ ସରପଞ୍ଚମାନେ ଅସ୍ବୀକାର କରି ଗ୍ରାମସଭା ବର୍ଜନ କରିଛନ୍ତି। ଫଳରେ ଜିଲାର ୩୧୭ ଗ୍ରାମ ପଞ୍ଚାୟତରେ ଗ୍ରାମସଭା ହୋଇପାରି ନ ଥିବା ଜଣାପଡିଛି। ଜିଲା ସରପଞ୍ଚ ସଂଘ ସଭାପତି ବୀରଭଦ୍ର ସାହୁ କାର୍ଯ୍ୟକାରୀ ସଭାପତି ବଳଦେବ ସାହୁ ଏବଂ ଉପସଭାପତି ସଞ୍ଜୟ ଗଡତିଆ ଜିଲାରେ ସ୍ବତନ୍ତ୍ର ଗ୍ରାମସଭା ବର୍ଜନ କରାଯାଇଥିତ୍ବା ସୂଚନା ଦେଇଛନ୍ତି। କାର୍ଯ୍ୟକାରୀ ସଭାପତି ସାହୁ କହିଛନ୍ତି ଯେ, ଆବାସ ଯୋଜନା ପାଇଁ ଯେଉଁ ତାଲିକା ପ୍ରସ୍ତୁତ କରାଯାଇଛି ସେଥିରେ ଅନେକ ବିସଙ୍ଗତି ରହିଛି। ସେ ତାଲିକା କିଏ ପ୍ରସ୍ତୁତ କରିଛି ଜଣାପଡୁନାହିଁ। ଏଭଳିକି ପୂର୍ବତନ ସରପଞ୍ଚମାନେ ମଧ୍ୟ ଆବାସ ଯୋଜନା ସର୍ଭେ ସମ୍ପର୍କରେ ଜାଣି ନ ଥିବା କହିଛନ୍ତି। ଏଭଳି ସ୍ଥିତିରେ ଏହି ତାଲିକା କାର୍ଯ୍ୟକାରୀ କଲେ ଅଡୁଆ ପରିସ୍ଥିତି ସୃଷ୍ଟି ହେବ। ବହୁ ପ୍ରକୃତ ହିତାଧିକାରୀ ଏବେବି ଘର ପାଇବା ତାଲିକାରେ ନାହାନ୍ତି ବୋଲି ସେ କହିଛନ୍ତି। ଉପସଭାପତି ଗଡତ୍ୟା କହିଛନ୍ତି ଯେ, ଯେଉଁ ତାଲିକାରେ ହିତାଧିକାରୀମାନଙ୍କ ନାମ ଅନୁମୋଦନ କରିବାକୁ କୁହାଯାଉଛି ସେଥିରେ ଅନେକ ତ୍ରୁଟି ରହିଛି। ସରପଞ୍ଚମାନଙ୍କୁ କୌଣସି କଥା ପଚରା ଯାଉନାହିଁ। କେବଳ ଅନୁମୋଦନ କରିବାକୁ ଗ୍ରାମସଭାରେ ଚାପ ସୃଷ୍ଟି କରାଯାଉଛି। ଏଣୁ ଗ୍ରାମସଭା ବର୍ଜନ କରାଯାଇଛି ବୋଲି ସେ କହିଛନ୍ତି। ଏନେଇ ଜିଲା ଗ୍ରାମପଞ୍ଚାୟତ ଅଧିକାରୀ ପ୍ରଶାନ୍ତ ଶତପଥୀଙ୍କୁ ପଚାରିିବାରୁ ଜିଲାର କେଉଁ ଗ୍ରାମପଞ୍ଚାୟତରେ ଗ୍ରାମସଭା ହୋଇଛି ଓ କେଉଁଠି ହୋଇନାହିଁ ତାଙ୍କ ପାଖକୁ ସୂଚନା ଆସିନାହିଁ ବୋଲି କହିଛନ୍ତି। ଆସନ୍ତା ୩୦ ତାରିଖରେ ଡିପିଆରସି କକ୍ଷରେ ଗ୍ରାମସଭା ନେଇ ସରପଞ୍ଚଙ୍କ ବୈଠକ ହେବ। ଏଠାରେ ମଧ୍ୟ ଗ୍ରାମସଭା ବର୍ଜନ କରାଯିବ ବୋଲି ସରପଞ୍ଚ ସଂଘ ନିଷ୍ପତ୍ତି ନେଇଥିବା କାର୍ଯ୍ୟକାରୀ ସଭାପତି ସାହୁ ସୂଚନା ଦେଇଛନ୍ତି।
