ସୋନପୁର,୧୪।୨(ନି.ପ୍ର.): ସୁବର୍ଣ୍ଣପୁର ଜିଲାର ଲାଇଫଲାଇନ କୁହାଯାଉଥିବା ଅର୍ଜୁନପୁର-ବିନିକା-ରାମପୁର-ଡୁଙ୍ଗୁରପାଲି ମେଜର ଡିଷ୍ଟ୍ରିକ୍ଟ ରୋଡ(ଏମଡିଆର) ଓସାରିଆ ହେବ। ଅର୍ଜୁନପୁରରୁ ଡୁଙ୍ଗୁରିପାଲି ୫୪.୨୦୦ କିଲୋମିଟର ବିଶିଷ୍ଟ ଏହି ରାସ୍ତା ପାଇଁ ଦୁଇଟି ପର୍ଯ୍ୟାୟରେ ପ୍ରାୟ ୧୪୫ କୋଟି ଟଙ୍କାର ଟେଣ୍ଡର ଆହ୍ବାନ ହୋଇଛି। ୨ ଥାକିଆ ରାସ୍ତା କାମ ଏବେ ଜୋରସୋରରେ ଚାଲିଛି। ଏଥିପାଇଁ ରାସ୍ତାର ଉଭୟ ପାର୍ଶ୍ୱରେ ଥିବା ୩୧୫୮ ଗଛ କଟାଯିବା ପାଇଁ ଚିହ୍ନଟ କରାଯାଇଛି। କଟା ହେବାକୁ ଥିବା ଶତାଧିକ ଗଛ ବହୁ ବର୍ଷର ପୁରୁଣା । ଏଗୁଡିକ ରାଜାରାଜୁଡା ଅମଳରୁ ଲଗା ଯାଇଥିଲା। ଓଡିଶା ବନ ଉନ୍ନୟନ ନିଗମ ଏବେ ସେହି ଗଛ ଗୁଡିକୁ ମେସିନ ଦ୍ୱାରା କାଟିବା ଆରମ୍ଭ କରିଛି । ପରେ ଏହି ରାସ୍ତା ୪ ଥାକିଆ ହେବାର ଯୋଜନା ରହିଛି। ଫଳରେ ଏହି ଗୁରୁତ୍ୱପୂର୍ଣ୍ଣ ରାସ୍ତାର ଉଭୟ ପାର୍ଶ୍ୱ ଆଉ କିଛି ଦିନ ପରେ ବୃକ୍ଷ ଶୂନ୍ୟ ହେବ। ଉତ୍ତାପ ଆହୁରି ବୃଦ୍ଧି ପାଇବ । ଏହା ଜିଲାର ବୁଦ୍ଧିଜୀବୀ ଓ ପରିବେଶବିତଙ୍କ ଚିନ୍ତା ବଢାଇଛି।
ସୁବର୍ଣ୍ଣପୁର ବନଖଣ୍ଡ ଅନ୍ତର୍ଗତ ସୋନପୁର ବନକ୍ଷେତ୍ର ଅଞ୍ଚଳର ଅର୍ଜୁନପୁରରୁ ଅଙ୍ଗନଦୀ ବ୍ରିଜ୍ ପର୍ଯ୍ୟନ୍ତ ରାସ୍ତାର ଉଭୟପାର୍ଶ୍ୱରେ ଥିବା ୯୦୬ ଗଛ କଟିବ। ସେହିପରି ବିନିକା ବନକ୍ଷେତ୍ର ଅଞ୍ଚଳର ଅଙ୍ଗନଦୀ ବ୍ରିଜ୍ରୁ ବିନିକା-ରାମପୁର-ଡୁଙ୍ଗୁରିପାଲି ପର୍ଯ୍ୟନ୍ତ ରାସ୍ତାର ଉଭୟ ପାର୍ଶ୍ୱରେ ୨୨୫୨ ଗଛ ବଳି ପଡିବ। ବନ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ ରାସ୍ତା ପ୍ରଶସ୍ତୀକରଣ ପାଇଁ ବର, ଅଶ୍ୱତଥ୍, ଶାଳ, ତେନ୍ତୁଳି, ଅର୍ଜୁନ, ମହୁଲ, ଶାଗୁଆନ, ମହୁଲ, କୁମ୍ଭି, ଚାର, ଛେନା, ସୀମାରୁଆ, ନୀଳଗିରି, ଚାକୁଣ୍ଡା, ସାହାଜ, ନିମ୍ବ, ଆମ୍ବ, କରଞ୍ଜ, ଛତିଆନ ଓ ଜାମୁ ଆଦି ବଡ ଗଛ କଟାଯିବ। ଏହି ପୁରୁଣା ଗଛ ଗୁଡିକ ଯୋଗୁଁ ବାଟୋଇଙ୍କୁ ଛାଇ ମିଳିବା ସହିତ, ସୁନ୍ଦର ସବୁଜିମା ପରିବେଶ ସୃଷ୍ଟି ହୋଇଥିଲା।
ସୁବର୍ଣ୍ଣପୁର ଏକ ଉତ୍ତପ୍ତ ଜିଲା ଭାବେ ପରିଚିତ। କିଛି ବର୍ଷ ଧରି ରାଜ୍ୟର ସବୁଠୁ ଉତ୍ତପ୍ତ ସହର ପାଲଟିଥିବା ସୁବର୍ଣ୍ଣପୁର ୨୦୨୨ରେ ଦେଶର ସବୁଠୁ ଉତ୍ତପ୍ତ ସହରଭାବେ ରେକର୍ଡ ହୋଇ ଚର୍ଚ୍ଚାକୁ ଆସିଥିଲା। ଏହି ଜିଲାରେ ୪୨୮.୭୫ ବର୍ଗ କିଲୋମିଟର ଜଙ୍ଗଲ ରହିଛି। ଯାହା ଜିଲା ଆୟତନର ମାତ୍ର ୧୮.୩୪%। ଗତ କିଛି ବର୍ଷ ଧରି ପୁରାତନ ଜଙ୍ଗଲର ସୁରକ୍ଷା, ନୂତନ ଜଙ୍ଗଲ ସୃଷ୍ଟି, ଗ୍ରୀନ୍ ମହାନଦୀ ମିଶନ, ସହରୀ ବନୀକରଣ ଓ ପଥପାର୍ଶ୍ୱ ବନୀକରଣ ପାଇଁ ଉଦ୍ୟମ ହୋଇଥିଲା। ତେବେ ଏହି ଗ୍ରୀନ୍ ସୁବର୍ଣ୍ଣପୁର ଯୋଜନାକୁ ବିଶେଷ ସଫଳତା ମିଳିପାରିନି। ସଚେତନତା ଅଭାବରୁ ଲୋକେ ଜଙ୍ଗଲରେ ନିଆଁ ଲଗାଉଛନ୍ତି। ପ୍ରତିବର୍ଷ ନିଆଁ ଲାଗିବା ଦ୍ୱାରା ବୃକ୍ଷଲତା ପୋଡି ପାଉଁଶ ହୋଇଯାଉଛି। ପଥପାର୍ଶ୍ୱ ବନୀକରଣ ଯୋଜନାରେ ଯେଉଁ ଗଛ ଲଗାଯାଉଛି, ସେଗୁଡିକର ଠିକ୍ ଭାବେ ଯତ୍ନ ନିଆଯାଉନି । ଯେଉଁ ଅଳ୍ପ କିଛି ଗଛ ବଞ୍ଚତ୍ ରହୁଛି ରାସ୍ତା ପ୍ରଶସ୍ତୀକରଣରେ ପୁଣି କଟାଯାଉଛି। ଗଛ ଲଗାଇବା ଓ ତାକୁ ସୁରକ୍ଷା ଦେବାରେ ସଫଳତା ମିଳୁନି। ଏଭଳି ସ୍ଥିତିରେ ଗଛ କାଟିବାକୁ ବିଶେଷ ତତ୍ପରତା ଦେଖିବାକୁ ମିଳୁଛି। ବଡ ଗଛଗୁଡିକୁ ନ କାଟି ମେଶିନ ଦ୍ୱାରା ଟ୍ରାନ୍ସଲୋକେସନ(ଜୀବନ୍ତ ସ୍ଥାନାନ୍ତରଣ) ପଦ୍ଧତିରେ ଅନ୍ୟତ୍ର ଲଗାଇବା ପାଇଁ ବନ ବିଭାଗ କିମ୍ବା ପୂର୍ତ୍ତ ବିଭାଗର ଆନ୍ତରିକତା ନାହିଁ । ଏଥିପାଇଁ ଜନଅସନ୍ତୋଷ ସୃଷ୍ଟି ହେବାରେ ଲାଗିଛି ।
