ନବରଙ୍ଗପୁର, ୨୨।୫(ବି.ପ୍ର.): ସ୍ବାଧୀନତାର ୭୩ ବର୍ଷ ପରେ ମଧ୍ୟ ନବରଙ୍ଗପୁର ଜିଲାର ୩୧୫ଟି ଗାଁକୁ ଏଯାଏ ବିଦ୍ୟୁତ୍ ସଂଯୋଗ ହୋଇପାରିନାହିଁ। ରାଜ୍ୟ ଓ କେନ୍ଦ୍ର ସରକାର ପ୍ରତ୍ୟେକ ଗାଁ ଓ ଘରକୁ ବିଦ୍ୟୁତ୍ ସଂଯୋଗ ପାଇଁ ବ୍ୟାପକ ଅନୁଦାନ ଖର୍ଚ୍ଚ କରୁଛନ୍ତି। ମାତ୍ର ବିଭାଗୀୟ ଅବହେଳା ଲାଗି ୩୧୫ଟି ଗାଁର ଲୋକ ଅନ୍ଧାରରେ ଜୀବନ ବିତାଉଛନ୍ତି। ଦୁର୍ଗମ ଓ ଅଗମ୍ୟ ଅଞ୍ଚଳ ତଥା ଅନୁନ୍ନତ ଜିଲାରେ ମୌଳିକ ଯୋଜନା କିଭଳି କାମ କରୁଛି, ତାହା ଏଥିରୁ ଅନୁମେୟ।
ସମସ୍ତ ଯୋଜନା କିଭଳି ଲୋକାଭିମୁଖୀ ହେବ ସେଥିପାଇଁ ପ୍ରଶାସନ ଓ ଲୋକ ପ୍ରତିନିଧିମାନେ ତତ୍ପର ରହିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ତଥାପି ମୌଳିକ ସମସ୍ୟା ଭଳି ବିଦ୍ୟୁତ୍କରଣ ଯୋଜନା ଜିଲାର ୩୧୫ ଗାଁକୁ ପହଞ୍ଚତ୍ ପାରିନାହିଁ। ଜିଲାରେ ଥିବା ୮୯୧ ଗାଁ ମଧ୍ୟରୁ ୩୧୫ ଗାଁ ଏବେ ବି ଅନ୍ଧକାର ରହିବା ବିଡ଼ମ୍ବନାର ବିଷୟ। ରାଜୀବ ଗାନ୍ଧୀ ବିଦ୍ୟୁତ୍କରଣ ଯୋଜନା ପରବର୍ତ୍ତୀ ସମୟରେ ବିଜୁ ଗ୍ରାମୀଣ ଜ୍ୟୋତି ଯୋଜନା ଓ ଏବେ କେନ୍ଦ୍ରରେ ଭାଜପା ସରକାର ଆସିବା ପରେ ସୌଭାଗ୍ୟ ଯୋଜନା-୧ ଅବଧି ସରିବା ପରେ ଯୋଜନା-୨ ଆରମ୍ଭ ହୋଇଛି। ତଥାପି ଗାଁ ଲୋକଙ୍କୁ ବିଦ୍ୟୁତ୍ ସଂଯୋଗ ମିଳିନି। ବିଦ୍ୟୁତ୍ ବିଭାଗକୁ ସରକାର ପର୍ଯ୍ୟାୟକ୍ରମେ ଘରୋଇ ସଂସ୍ଥା ହାତକୁ ଟେକି ଦେଉଥିବାରୁ ଯୋଜନାଗୁଡ଼ିକ ସଫଳ ରୂପାୟନ ହୋଇପାରୁନାହିଁ ବୋଲି ଅଭିଯୋଗ ହେଉଛି। ସମସ୍ତ ରାଜସ୍ବ ଗାଁକୁ ବିଦ୍ୟୁତ୍କରଣ କରାଯାଇଛି। ବିଭିନ୍ନ କାରଣ ହେତୁ ଜିଲାର ବକେୟା ରହିଥିବା ୩୧୫ଟି ପଡ଼ାଗ୍ରାମକୁ ବିଜୁ ଗ୍ରାମୀଣ ଜ୍ୟୋତି ଯୋଜନା (୨୦୨୨-୨୩) ଓ ସୌଭାଗ୍ୟ ଯୋଜନା-୨ରେ ସାମିଲ କରାଯିବ ବୋଲି ବିଭାଗ ପକ୍ଷରୁ ସୂଚନା ମିଳିଛି। ଗମନାଗମନ ଅସୁବିଧା ନ ଥିବା ଗାଁଗୁଡିକରେ ସରକାର ଓରିଡା ସଂସ୍ଥାକୁ ନିୟୋଜିତ କରି ସୋଲାର ସିଷ୍ଟମ ଦ୍ୱାରା ବିଦ୍ୟୁତ୍କରଣ କରିବେ ବୋଲି ବିଭାଗ ଜିଲା ପରିଷଦ ତଥା ଜିଲା ଉନ୍ନୟନ ସଂସ୍ଥାକୁ ଲିଖିତ ଭାବରେ ମେ’ ୪ରେ ହୋଇଥିବା ଜିଲା ପରିଷଦ ବୈଠକରେ ଏକ ରିପୋର୍ଟ ଉପସ୍ଥାପନ କରିଛନ୍ତି। ଆଉ କେତେବର୍ଷ ପରେ ବିଭାଗ ଓ ଘରୋଇ ଠିକାସଂସ୍ଥା ୩୧୫ ଗାଁକୁ ବିଦ୍ୟୁତ୍କରଣ କରୁଛନ୍ତି ତାହା ଦେଖିବାକୁ ବାକି ରହିଲା।
