ନୀଳଗିରି, ୨୪।୭ (ପ୍ରଶାନ୍ତ କୁମାର ବିଶ୍ୱାଳ): କୁଳଡିହା ଅଭୟାରଣ୍ୟ ନିକଟରେ ବାଘ ଆକ୍ରମଣରେ ଜଣେ ଯୁବକ ଗୁରୁତର ହୋଇଛନ୍ତି। ପ୍ରଥମେ ତାଙ୍କୁ ନୀଳଗିରି ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ପରେ ଅବସ୍ଥା ସଙ୍କଟାପନ୍ନ ହେବାରୁ ଫକୀରମୋହନ ମେଡିକାଲ କଲେଜ ଓ ହସ୍ପିଟାଲ, ବାଲେଶ୍ୱରକୁ ସ୍ଥାନାନ୍ତର କରାଯାଇଛି।
ସୂଚନା ଅନୁଯାୟୀ, ବରହମପୁର ଥାନା ଅନ୍ତର୍ଗତ କେସିପୁର ପଞ୍ଚାୟତର ବାଲିଆନାଳ ନଟାପଡ଼ା ଗ୍ରାମର ନାରଣ ସିଂଙ୍କ ପୁଅ ସୁନୀଲ କୁମାର ସିଂ (୨୬) ଚାଷ କାମ ପାଇଁ ହଳ ଓ ବଳଦ ନେଇ ନିକଟସ୍ଥ ବିଲକୁ ଯାଇଥିଲେ। ଚାଷ କାମ ଆରମ୍ଭ ପୂର୍ବରୁ ସେ ବଳଦ ଦୁଇଟିକୁ ଚରିବା ପାଇଁ ଛାଡ଼ି ଦେଇ ଖାଇବାକୁ ବସିଥିଲେ।
ଏହି ସମୟରେ ବଳଦ ଦୁଇଟି ଚରିଚରି ନିକଟସ୍ଥ କୁଳଡିହା ଜଙ୍ଗଲ ମଧ୍ୟକୁ ପଶିଯାଇଥିଲା। ଅପରାହ୍ନ ପ୍ରାୟ ୧୨.୩୦ଟା ସମୟରେ ସୁନୀଲ ବଳଦ ଖୋଜିବା ପାଇଁ ଜଙ୍ଗଲ ମଧ୍ୟକୁ ଯାଇଥିବା ବେଳେ ହଠାତ୍ ଏକ ବାଘ ତାଙ୍କୁ ଆକ୍ରମଣ କରିଥିଲା। ବାଘ ଓ ସୁନୀଲଙ୍କ ମଧ୍ୟରେ କିଛି ସମୟ ଧରି ସଂଘର୍ଷ ଚାଲିଥିଲା।
ପାଖରେ ଚାଷ କାମ କରୁଥିବା ଚାଷୀମାନେ ସୁନୀଲଙ୍କ ଚିତ୍କାର ଶୁଣି ଘଟଣାସ୍ଥଳକୁ ଦୌଡ଼ି ଆସିଥିଲେ। ଲୋକଙ୍କ ଗହଳି ଦେଖି ବାଘଟି ଜଙ୍ଗଲ ମଧ୍ୟକୁ ପଳାଇଯାଇଥିଲା। ପରେ ସ୍ଥାନୀୟ ଲୋକେ ସୁନୀଲଙ୍କୁ ଉଦ୍ଧାର କରି ପ୍ରଥମେ ନୀଳଗିରି ଉପଖଣ୍ଡ ଚିକିତ୍ସାଳୟକୁ ନେଇଥିଲେ। ସେଠାରେ ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଫକୀରମୋହନ ମେଡିକାଲ କଲେଜ ଓ ହସ୍ପିଟାଲ, ବାଲେଶ୍ୱରକୁ ସ୍ଥାନାନ୍ତର କରାଯାଇଛି।
ଏହି ଘଟଣା ପରେ କୁଳଡିହା ଅଭୟାରଣ୍ୟ ନିକଟବର୍ତ୍ତୀ ଗ୍ରାମଗୁଡ଼ିକରେ ଭୟର ପରିବେଶ ସୃଷ୍ଟି ହୋଇଛି। ବନ ବିଭାଗ ପକ୍ଷରୁ ଲୋକମାନଙ୍କୁ ଜଙ୍ଗଲ ନିକଟକୁ ଏକାକୀ ନ ଯିବା ଏବଂ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି।
