ଭୁବନେଶ୍ୱର,୧ା୧୧(ବ୍ୟୁରୋ):ଓଡ଼ିଶା ଗ୍ରାମୀଣ ଗୃହ ଉନ୍ନୟନ ନିଗମ (ଓଆର୍ଏଚ୍ଡିସି) ଦ୍ୱାରା ଷ୍ଟେଟ୍ ଫେଡେରେଶନ ଲେବର ଆଣ୍ଡ୍ କନ୍ଷ୍ଟ୍ରକ୍ଶନ କୋଅପରେଟିଭ୍ ଲିଃ (ଏସ୍ଏଫ୍ଏଲ୍ସିସି)କୁ ଅନୁଚିତ ଅନୁଗ୍ରହ ଦେଖାଇ ୮.୮୦ ଲକ୍ଷ ଟଙ୍କାର ଋଣ ଦେବା ମାମଲାର ରାୟ ସୋମବାର ପ୍ରକାଶ ପାଇଛି। ବହିଷ୍କୃତ ଆଇଏଏସ୍ ଅଫିସର ତଥା ଓଆର୍ଏଚ୍ଡିସିର ତତ୍କାଳୀନ ପରିଚାଳନା ନିର୍ଦ୍ଦେଶକ (ଏମ୍ଡି) ବିନୋଦ କୁମାରଙ୍କ ସମେତ ୩ ଜଣଙ୍କୁ ୩ ବର୍ଷ ଲେଖାଏ ଜେଲଦଣ୍ଡ ହୋଇଛି। ଅନ୍ୟ ଅଭିଯୁକ୍ତଦ୍ୱୟ ହେଲେ ଓଆର୍ଏଚ୍ଡିସିର ତତ୍କାଳୀନ ଆସିଷ୍ଟାଣ୍ଟ ମ୍ୟାନେଜର ଏ. ଆନନ୍ଦ ରାଓ ଓ ଏସ୍ଏଫ୍ଏଲ୍ସିସିର ଏମ୍ଡି ରାଧା ରଞ୍ଜନ ପଟ୍ଟନାୟକ। ଏଥିସହ ୩ ଅଭିଯୁକ୍ତଙ୍କୁ ୫୦ହଜାର ଲେଖାଏ ଅର୍ଥଦଣ୍ଡରେ ମଧ୍ୟ ଦଣ୍ଡିତ କରାଯାଇଛି। ଜରିମାନା ଅନାଦାୟ ଅଧିକ ୬ମାସ ଜେଲଦଣ୍ଡ ଭୋଗିବାକୁ ଭୁବନେଶ୍ୱର ସ୍ବତନ୍ତ୍ର ଭିଜିଲାନ୍ସ କୋର୍ଟର ବିଚାରପତି ସତ୍ୟ ନାରାୟଣ ଷଡ଼ଙ୍ଗୀ ତାଙ୍କ ରାୟରେ ଉଲ୍ଲେଖ କରିଛନ୍ତି।
ବିବରଣୀ ଅନୁଯାୟୀ, ବିନୋଦ କୁମାର ୨୦୦୦ ଜାନୁୟାରୀ ୪ରୁ ୨୦୦୧ ଏପ୍ରିଲ ୧୫ ପର୍ଯ୍ୟନ୍ତ ଓଆର୍ଏଚ୍ଡିସିର ଏମ୍ଡି ଥିଲେ। ସେହି ସମୟରେ ଏ. ଆନନ୍ଦ ରାଓ ମଧ୍ୟ କମ୍ପାନୀର କର୍ପୋରେଟ୍ ଲୋନ୍ ସେକ୍ସନ୍ରେ ଆସିଷ୍ଟାଣ୍ଟ ମ୍ୟାନେଜର ଭାବେ କାର୍ଯ୍ୟରତ ଥିଲେ। ଏସ୍ଏଫ୍ଏଲ୍ସିସିର ଏମ୍ଡି ରାଧାରଞ୍ଜନ ତାଙ୍କ କମ୍ପାନୀର ୨୦ଜଣ କର୍ମଚାରୀଙ୍କ ପାଇଁ ଗୃହ ଋଣ ଆବେଦନ କରିଥିଲେ। ତେବେ ଏହି ଗୃହ ଋଣ ୧୯୯୯ ମହାବାତ୍ୟାରେ ପ୍ରଭାବିତ ଜିଲାଗୁଡିକରେ କାର୍ଯ୍ୟରତ ସରକାରୀ ଓ ଅର୍ଦ୍ଧ ସରକାରୀ କର୍ମଚାରୀ ଏବଂ ସରକାରୀ କମ୍ପାନୀର କର୍ମଚାରୀଙ୍କ ପାଇଁ ବ୍ୟବସ୍ଥା ଥିଲା। ହେଲେ ଏହି ନିୟମକୁ ଉଲ୍ଲଂଘନ କରାଯାଇ ୨୦ ଜଣଙ୍କ ଜାଲ ଦସ୍ତାବିଜ୍ ଆଧାରରେ ବିନୋଦ କୁମାର ଏସ୍ଏଫ୍ଏଲ୍ସିସିକୁ ୮ ଲକ୍ଷ ୮୦ ହଜାର ଟଙ୍କାର ଗୃହ ଋଣ ଦେଇଥିଲେ। ଫଳରେ ରାଜ୍ୟ ସରକାରଙ୍କୁ ଆର୍ଥିକ କ୍ଷତି ସହିବାକୁ ପଡ଼ିଥିଲା। ଏହା ଜଣାପଡ଼ିବା ପରେ ରାଜ୍ୟ ସରକାର ଭିଜିଲାନ୍ସ ନିକଟରେ ୨୦୦୫ରେ ଅଭିଯୋଗ କରିଥିଲେ। ଭୁବନେଶ୍ୱର ଭିଜିଲାନ୍ସ ଥାନାରେ ୨୦୦୯ ଜୁନ୍ ୧ରେ ଏକ ମାମଲା(ନଂ.୧୬/୦୯) ରୁଜୁ କରାଯାଇ ଘଟଣା ସଂକ୍ରାନ୍ତରେ ତଦନ୍ତ ଆରମ୍ଭ ହୋଇଥିଲା। ତେବେ ୨୦ଜଣଙ୍କ ସାକ୍ଷ୍ୟ ଓ ଅନ୍ୟାନ୍ୟ ଦସ୍ତାବିଜ ଆଧାରରେ ଦୁର୍ନୀତି ସଂକ୍ରାନ୍ତ ପ୍ରମାଣ ପାଇବା ପରେ କୋର୍ଟ ରାୟ ପ୍ରକାଶ କରିଥିଲେ। ସରକାରଙ୍କ ପକ୍ଷରୁ ସ୍ବତନ୍ତ୍ର ସରକାରୀ ଓକିଲ ହେମନ୍ତ କୁମାର ସ୍ବାଇଁ ମାମଲା ପରିଚାଳନା କରୁଥିଲେ।
ଅନ୍ୟପକ୍ଷରେ ଦୋଷୀ ସାବ୍ୟସ୍ତ ହୋଇଥିବା ପୂର୍ବତନ ଆଇଏଏସ୍ ଅଫିସର ବିନୋଦଙ୍କ ବିରୋଧରେ ରାଜ୍ୟ ସରକାର ମୋଟ ୨୭ଟି ଭିଜିଲାନ୍ସ ମାମଲା କରିଥିବାବେଳେ ପୂର୍ବରୁ ୩ଟିରେ ଦୋଷୀ ସାବ୍ୟସ୍ତ ହୋଇଛନ୍ତି। ଏଥିସହ ଗତ ଫେବୃୟାରୀ ୨ରେ ତାଙ୍କୁ ଚାକିରିରୁ ମଧ୍ୟ ବିଦା କରାଯାଇଛି।
