ନୋଏଡା,୩।୯: ଇ-କମର୍ସ କମ୍ପାନୀ ଆମାଜନ୍କୁ ଲକ୍ଷାଧିକ ଟଙ୍କାର ଚୁନା ଲଗାଇ ଗିରଫ ହୋଇଛନ୍ତି ହରିୟାଣାର ୩ ଯୁବକ। ସେମାନଙ୍କ ମଧ୍ୟରୁ ଦୁଇ ଜଣ ଫତେହାବାଦ ଓ ଜଣେ ହିସାର ଅଞ୍ଚଳର ବୋଲି ଉତ୍ତରପ୍ରଦେଶ ସାଇବର ପୋଲିସ ପକ୍ଷରୁ କୁହାଯାଇଛି।
ଅଭିଯୁକ୍ତମାନେ ଆମାଜନ ଓ୍ବେବସାଇଟ୍ରେ ମିଛ ପରିଚୟପତ୍ର ଦେଇ ବହୁ ନାମରେ ଆକାଉଣ୍ଟ ଖୋଲିଥିଲେ। ଏହି ଆକାଉଣ୍ଟରୁ ବହୁ ସମୟରେ ବିଭିନ୍ନ ପ୍ରଡକ୍ଟ ମଗାଉଥିଲେ। ସବୁ ବେଳେ ଆଗୁଆ ପେମେଣ୍ଟ କରୁଥିଲେ। ଅର୍ଡର ରିସିଭ ପରେ ସେମାନେ ଆମାଜନକୁ ଯୋଗାଯୋଗ କରି ପ୍ରଡକ୍ଟରେ ସମସ୍ୟା ଥିବା ଦର୍ଶାଇ ରିଫଣ୍ଡ୍ ପାଇଁ ଦାବି କରୁଥିଲେ। ଏଭଳି କରି ହରିୟାଣାର ୩ ଯୁବକ ଆମାଜନକୁ ଲକ୍ଷାଧିକ ଟଙ୍କାର ଚୁନା ଲଗାଇଥିବା ପୋଲିସ ପକ୍ଷରୁ କୁହାଯାଇଛି।
ଆମାଜନର ପଲିସି ଅନୁଯାୟୀ, କୌଣସି ୟୁଜର ରିଫଣ୍ଡ ଦାବି କଲେ କମ୍ପାନୀ ପକ୍ଷରୁ ୟୁଜରଙ୍କ ନିକଟକୁ ଏଜେଣ୍ଟ (ଡେଲିଭରି ବୟ) ପଠାଯାଏ। ଡେଲିଭରି ବୟ ଗ୍ରାହକଙ୍କ ଠାରୁ ଡିଫେକ୍ଟିଭ ପ୍ରଡକ୍ଟ ଫେରାଇ ନିଅନ୍ତି। ସେମାନେ ଅର୍ଡରକୁ ଡାଟାବେସରେ ‘ପିକ୍ଡ ଅପ୍’ ଦର୍ଶାଇବା ପରେ ୟୁଜରଙ୍କ ଆକାଉଣ୍ଟ ସହ ଯୋଡ଼ା ହୋଇଥିବା ବ୍ୟାଙ୍କ ଆକାଉଣ୍ଟକୁ ଟଙ୍କା ଫେରିଆସେ।
କିନ୍ତୁ ଏହି ମାମଲାରେ ଅଭିଯୁକ୍ତମାନେ ଏଜେଣ୍ଟଙ୍କୁ ମଧ୍ୟ ତାଙ୍କ ଯୋଜନାରେ ସାମିଲ କରିଥିଲେ। ଏଜେଣ୍ଟ ମିଛରେ ଡାଟାବେସ୍ରେ ‘ପିକ୍ଡ ଅପ୍’ ଦର୍ଶାଉଥିଲେ। ଯାହା ଫଳରେ ଟଙ୍କା ୟୁଜରଙ୍କ ଆକାଉଣ୍ଟକୁ ଆସୁଥିଲା। ଆଉ ପ୍ରଡକ୍ଟକୁ ଦିଲ୍ଲୀର ଏନ୍ସିଆର ମାର୍କେଟରେ ଶସ୍ତାରେ ବିକି ଆହୁରି ଟଙ୍କା ଆୟ କରୁଥିଲେ।
