ବୁଗୁଡ଼ା, ୨୬ା୧୦(ଡି.ଏନ୍.ଏ.)- ବୁଗୁଡ଼ା ପୋଲିସ ରବିବାର ରାତିରେ ବିଭିନ୍ନ ସ୍ଥାନରେ ଚଢ଼ାଉ କରି ୨୭ ଜଣ ଜୁଆଡିଙ୍କୁ ଗିରଫ କରିଛି। ସୋମବାର ସମସ୍ତ ଅଭିଯୁକ୍ତଙ୍କୁ ଜାମିନରେ ଛଡ଼ାଯାଇଥିବା ସୂଚନା ମିଳିଛି। ଆଇଆଇସି ଚିତ୍ତରଞ୍ଜନ ବେହେରାଙ୍କ ନିର୍ଦ୍ଦେଶରେ ପୋଲିସ ଉକ୍ତ ଥାନା ତାକରଡ଼ା ବଡଦାଣ୍ଡରେ ଚାଲିଥିବା ଜୁଆ ଆଡାରୁ ୫୩୫୫ ଟଙ୍କା ଜବତ କରିବା ସହ ୧୦ ଜଣଙ୍କୁ ଗିରଫ କରିଥିଲା। ସେହିପରି ବୁଗୁଡା ସହର ତଳଓଡ଼ିଆ କୋଠଘର ବାରଣ୍ଡାରୁ ୯ ଜଣ ଜୁଆଡ଼ିଙ୍କୁ ଏବଂ ନିମପଦର ଗ୍ରାମର ପୋଖରୀ ହୁଡ଼ାରେ ଚାଲିଥିବା ଜୁଆଆଡ଼ାରେ ଚଢାଉ କରି ୮ ଜଣଙ୍କୁ ଗିରଫ କରିବା ସହ ୪୨୫୦ ଟଙ୍କା ଜବତ କରିଛି। ଏ ନେଇ ନଂ. ୩୧୧, ୩୧୨, ୩୧୩/୨୦ରେ ୩ଟି ପୃଥକ୍ ମାମଲା ରୁଜୁ ହୋଇଛି।
