ନୂଆଦିଲ୍ଲୀ,୧୮ା୩ : ଆଧାର କାର୍ଡ ନ ଥିଲେ ମଧ୍ୟ କୌଣସି ଶିଶୁଙ୍କୁ ଜାତୀୟ ଖାଦ୍ୟ ସୁରକ୍ଷା ଆଇନ (ଏନ୍ଏଫ୍ଏସ୍ଏ) ବଳରେ ସୁବିଧାରୁ ବଞ୍ଚତ୍ତ କରାଯାଇପାରିବ ନାହିଁ ବୋଲି ୨୦୧୮ରେ ସୁପ୍ରିମକୋର୍ଟ ସ୍ପଷ୍ଟ କରିଥିଲେ। ଏହା ସତ୍ତ୍ୱେ ଆଧାର କାର୍ଡ ସହ ରାଶନ କାର୍ଡ ସଂଯୋଗ ହୋଇ ନ ଥିଲେ ଜିଲା ଯୋଗାଣ ଅଧିକାରୀ ଓ ସ୍ଥାନୀୟ କର୍ତ୍ତୃପକ୍ଷ ସମ୍ପୃକ୍ତ ହିତାଧିକାରୀଙ୍କୁ ଜରୁରୀ ସାମଗ୍ରୀ ଦେଉ ନାହାନ୍ତି। ଜରୁରୀ ସାମଗ୍ରୀ ନ ପାଇ ଅନେକ ସ୍ଥାନରେ ଅନାହାର ମୃତ୍ୟୁ ଘଟୁଛି। ଏଭଳି ଅଭିଯୋଗଗୁଡ଼ିକୁ ନେଇ ୨୦୧୯ ଡିସେମ୍ବର ୯ରେ ସୁପ୍ରିମକୋର୍ଟ ସମସ୍ତ ରାଜ୍ୟକୁ ଜବାବ ମାଗିଥିଲେ। ହେଲେ ଅଦ୍ୟାବଧି ଏହି ସମସ୍ୟା ଦୂର ହୋଇନାହିଁ।
ଆଧାର କାର୍ଡ ସହ ସଂଯୋଗ ହୋଇ ନ ଥିବା ଦର୍ଶାଇ ୩ କୋଟି ରାଶନ କାର୍ଡକୁ କେନ୍ଦ୍ର ସରକାର ରଦ୍ଦ କରିଦେଇଛନ୍ତି। ଫଳରେ ଦେଶରେ ଅନାହାରରେ ପଡ଼ି ଲୋକଙ୍କ ମୃତ୍ୟୁ ଘଟୁଥିବା ଦର୍ଶାଇ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ଜଣେ ମହିଳା, ଯିଏକି ଅନୁରୂପ କାରଣରୁ ନିଜ ଝିଅକୁ ହରାଇଛନ୍ତି। ସର୍ବୋଚ୍ଚ ଅଦାଲତ ଏହାକୁ ନେଇ ବୁଧବାର ଗଭୀର ଚିନ୍ତାବ୍ୟକ୍ତ କରିଛନ୍ତି। ଏହା ଏକ ଅତି ଗମ୍ଭୀର ବିଷୟ ହୋଇଥିବାରୁ କେନ୍ଦ୍ର ସମେତ ସମସ୍ତ ରାଜ୍ୟ ସରକାରଙ୍କୁ ଏ ସମ୍ପର୍କରେ ଜବାବ ମାଗିଛନ୍ତି।
ଭାରତର ପ୍ରଧାନ ବିଚାରପତି (ସିଜେଆଇ) ଏସ୍.ଏ. ବୋବ୍ଡେଙ୍କ ଅଧ୍ୟକ୍ଷତାରେ ତଥା ଜଷ୍ଟିସ୍ ଏ.ଏସ୍. ବୋପାନ୍ନା ଏବଂ ଭି. ରାମାସୁବ୍ରମଣ୍ୟମ୍ଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, ଏହା ଏକ ଗମ୍ଭୀର ପ୍ରସଙ୍ଗ। ଏହାକୁ ବିରୋଧାମତ୍କ ରୂପେ ବିବେଚନା କରାଯିବା ଅନୁଚିତ। ଏହାକୁ ଚୂଡ଼ାନ୍ତ ଶୁଣାଣି ପାଇଁ ରଖାଯିବ। ଆବେଦନକାରୀ କୋଇଲି ଦେବୀଙ୍କ ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ କୋଲିନ୍ ଗୋନ୍ସାଲଭେସ୍ ଶୁଣାଣି ବେଳେ କହିଥିଲେ, ଏହି ପିଟିଶନ ବୃହତ୍ତର ପ୍ରସଙ୍ଗକୁ ନେଇ ଦାଖଲ କରାଯାଇଛି। କେନ୍ଦ୍ର ସରକାର ପ୍ରାୟ ୩ କୋଟି ଆଧାର କାର୍ଡକୁ ରଦ୍ଦ କରିଦେଇଛନ୍ତି। ଲୋକେ ଖାଇବାକୁ ନ ପାଇ ମରୁଛନ୍ତି। ତେଣୁ ଏହା ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ବୋଲି ସେ ଯୁକ୍ତି ବାଢ଼ିଥିଲେ। ଅନ୍ୟପକ୍ଷେ ଅତିରିକ୍ତ ସଲିସିଟର ଜେନେରାଲ ଅମନ ଲେଖି କହିଥିଲେ, କେନ୍ଦ୍ର ସରକାର ରାଶନ କାର୍ଡଗୁଡ଼ିକୁ ରଦ୍ଦ କରିଦେଇଛନ୍ତି ବୋଲି କହିବା ଭୁଲ୍।
ଉଭୟ ପକ୍ଷଙ୍କ ଯୁକ୍ତି ଶୁଣିବା ପରେ ସିଜେଆଇ ବୋବ୍ଡେ କହିଥିଲେ, ଏଥିରେ ଥିବା ସମସ୍ୟାକୁ ଆମେ ଦେଖୁଛୁ। ବମ୍ବେ ହାଇକୋର୍ଟରେ ଏଭଳି ଅନେକ ପ୍ରସଙ୍ଗକୁ ନେଇ ମୁଁ ଶୁଣାଣି କରିଛି। ତେଣୁ ଏହି ପ୍ରସଙ୍ଗରେ ସମ୍ପୃକ୍ତ ହାଇକୋର୍ଟରେ ଶୁଣାଣି ପାଇଁ ଆବେଦନ କରାଯିବା ଉଚିତ। ଗୋନ୍ସାଲଭେସ୍ଙ୍କୁ ଖଣ୍ଡପୀଠ କହିଥିଲେ, ସେ ବିଭିନ୍ନ ବିଷୟ ସମାବିଷ୍ଟ ଥିବା ଆବେଦନରେ ଆଶ୍ୱସ୍ତି ଦାବି କରି ପ୍ରସଙ୍ଗର ପରିସରକୁ ବିସ୍ତୃତ କରିଦେଇଛନ୍ତି। ଏହା ଆଧାର ପ୍ରସଙ୍ଗ ହୋଇଥିବାରୁ କେନ୍ଦ୍ର ସମେତ ରାଜ୍ୟ ସରକାରଗୁଡ଼ିକୁ ମଧ୍ୟ ନୋଟିସ କରାଯାଉ। ସରକାରମାନେ ଜାତୀୟ ଖାଦ୍ୟ ସୁରକ୍ଷା ଆଇନ, ୨୦୧୩ର ଧାରା ୧୪,୧୫ ଓ ୧୬ ଅନୁସାରେ ଲୋକଙ୍କ ଅଭିଯୋଗର ଶୁଣାଣି କରି କ’ଣ ସବୁ ପଦକ୍ଷେପ ନେଇଛନ୍ତି ସେନେଇ କେନ୍ଦ୍ର ଓ ରାଜ୍ୟଗୁଡ଼ିକ ୪ ସପ୍ତାହ ମଧ୍ୟରେ ଜବାବ ଦାଖଲ କରନ୍ତୁ।
ଆଧାର ଆଳରେ ରାଶନ ବନ୍ଦ
ଜଗତ୍ସିଂପୁର ଜିଲା ନୂଆଗାଁ ବ୍ଲକ ଦବାର ଗ୍ରାମର କାମିନୀ ସେଠୀ ଦୁଇ ସନ୍ତାନଙ୍କ ମା’। ରାଶନ କାର୍ଡ ଥାଇ ମଧ୍ୟ ସେ ଏନ୍ଏସ୍ଏଫ୍ଏ ଅଧୀନରେ ସୁବିଧା ପାଉ ନ ଥିବାରୁ ପିଲାଙ୍କୁ ଖୁଆଇବା କଷ୍ଟକର ହୋଇପଡ଼ିଛି। ସେହି ଗ୍ରାମର ପପିତା ବେହେରା ମଧ୍ୟ ରାଶନ କାର୍ଡକୁ ଆଧାର କାର୍ଡ ସହ ଲିଙ୍କ୍ କରାଇପାରି ନ ଥିବାରୁ ଜରୁରୀ ସାମଗ୍ରୀ ପାଇବାରୁ ବଞ୍ଚତ୍ତ ହୋଇଛନ୍ତି। ଏହା କେବଳ କାମିନୀ କି ପପିତାଙ୍କ କ୍ଷେତ୍ରରେ ନୁହେଁ, ବରଂ ଓଡ଼ିଶା ସମେତ ସାରା ଦେଶର କୋଟି କୋଟି ହିତାଧିକାରୀଙ୍କୁ ଅନୁରୂପ କାରଣରୁ ସୁବିଧା ମିଳୁନାହିଁ। ୨୦୧୮ ସେପ୍ଟେମ୍ବର ୨୮ରେ ଝାଡ଼ଖଣ୍ଡର ସିମ୍ଡେଗା ଜିଲା ନିବାସୀ କୋଇଲି ଦେବୀଙ୍କ ୧୧ ବର୍ଷୀୟା ଝିଅ ସନ୍ତୋଷୀ ଅନାହାରରେ ପଡ଼ି ଆଖି ବୁଜି ଦେଇଥିଲେ। କାରଣ ଆଧାର ଲିଙ୍କ୍ ନ ଥିବାରୁ ସ୍ଥାନୀୟ ଅଧିକାରୀମାନେ ଏହି ଗରିବ ଦଳିତ ପରିବାରର ରାଶନ କାର୍ଡ ରଦ୍ଦ କରିଦେଇଥିଲେ। ୨୦୧୭ ମାର୍ଚ୍ଚରୁ ଜରୁରୀ ସାମଗ୍ରୀ ମିଳିବା ବନ୍ଦ ହୋଇଯାଇଥିଲା। ଫଳରେ ପୂରା ପରିବାର ଭୋକ ଉପାସରେ ରହିଥିଲେ। ଏପରି କି ସନ୍ତୋଷୀଙ୍କ ମୃତ୍ୟୁ ଦିନ ମା’ କୋଇଲି ଦେବୀ ତାଙ୍କୁ କେବଳ ଚା’ରେ ଲୁଣ ପକାଇ ପିଇବାକୁ ଦେଇଥିଲେ। ସେହି ରାତିରେ ସନ୍ତୋଷୀଙ୍କ ମୃତ୍ୟୁ ଘଟିଥିଲା।
