ଭୁବନେଶ୍ୱର,୧୬।୨(ବ୍ୟୁରୋ): ପଞ୍ଚାୟତ ନିର୍ବାଚନ ପାଇଁ ଗ୍ରାମାଞ୍ଚଳ ଉଠୁଛି ପଡୁଛି। ପ୍ରାର୍ଥୀମାନେ ଘର ଘର ବୁଲି ମତଦାତାଙ୍କୁ ମନାଇବାରେ ଲାଗିଛନ୍ତି। ଦଳୀୟ ନେତା, କର୍ମୀମାନେ ନିଜ ଦଳର ସମର୍ଥତ୍ତ ପ୍ରାର୍ଥୀଙ୍କୁ ବିଜୟୀ କରିବାକୁ ସମସ୍ତ ପ୍ରକାର ରଣକୌଶଳ ଆପଣାଇଛନ୍ତି। ଟଙ୍କା ପଇସା, ଭୋଜିଭାତ ସାଙ୍ଗକୁ ମଦ ପାଣିରେ ଗାଁଗଣ୍ଡା ଭାସୁଛି। ଯୁବ ମତଦାତାଙ୍କୁ ଆକୃଷ୍ଟ କରିବା ଲାଗି ପ୍ରାର୍ଥୀ ଓ ସେମାନଙ୍କ ସମର୍ଥକ ମଦ ଦେବାକୁ ପଛାଉ ନାହାନ୍ତି। ଫଳରେ ଗ୍ରାମାଞ୍ଚଳରେ ମଦ କାରବାର ବହୁ ପରିମାଣରେ ବଢ଼ିଯାଇଛି। ନିର୍ବାଚନ ଆଚରଣବିଧି ଲାଗୁହେବା ପରଠାରୁ ଗଁାଗଣ୍ଡାରେ ଟଙ୍କା ପଇସା ଉଡୁଛି। ମଦବେପାରୀମାନେ ସହର ଅପେକ୍ଷା ଗଁା ଉପରେ ଅଧିକ ଫୋକସ କରୁଛନ୍ତି। ଚୋରାମଦ କାରବାର ବହୁମାତ୍ରାରେ ବଢ଼ିଯାଇଛି। ଅସାଧୁ ବ୍ୟବସାୟୀମାନେ ନିଜର ବେପାର ଲକ୍ଷ୍ୟ ହାସଲ କରିବାକୁ ଗଁାରେ ଡେରା ପକାଇଛନ୍ତି। ଗାଁଗଣ୍ଡାରେ ଥିବା ବିଭିନ୍ନ ଦୋକାନରେ ଚୋରାରେ ମଦ ବିକ୍ରି କରାଯାଉଛି। ନିର୍ବାଚନ ଋତୁ ଚାଲିଥିବାରୁ ପ୍ରାର୍ଥୀମାନେ ଚୋରାମଦ କିଣି ଯୋଗାଇବାକୁ ଏକ ସହଜ ଉପାୟ ଧରି ନେଇଛନ୍ତି। ରାଜ୍ୟ ନିର୍ବାଚନ କମିଶନଙ୍କ କାର୍ଯ୍ୟାଳୟରୁ ମିଳିଥିବା ସୂଚନା ମୁତାବକ ଜାନୁୟାରୀ ୧୯ରୁ ଏ ପର୍ଯ୍ୟନ୍ତ ପୋଲିସ ଓ ଅବକାରୀ ବିଭାଗ ଚଢ଼ାଉ କରି ପଞ୍ଚାୟତଗୁଡ଼ିକରୁ ୩୮୩୩୪୩.୨୬୨ ଲିଟର ମଦ ଜବତ କରିଛନ୍ତି। ବାଲେଶ୍ୱର ଜିଲାରେ ସର୍ବାଧିକ ୨୧୪୫୪୪.୬୫୫ ଲିଟର ମଦ ଜବତ ହୋଇଥିବା ବେଳେ ଗଞ୍ଜାମ ଜିଲାରେ ୨୫,୭୩୫ ଲିଟର, ଯାଜପୁର ୧୩,୩୫୮ ଲିଟର, କଳାହାଣ୍ଡି ୧୯,୩୪୨.୪୪ ଲିଟର, ମୟୂରଭଞ୍ଜ ୧୨,୩୨୦.୬୯୮ ଲିଟର, ମାଲକାନଗିରି ୨,୦୨୦.୪୩୫ ଲିଟର, ରାୟଗଡ଼ା ୪,୩୧୧.୧୨୫ ଲିଟର, ସୁନ୍ଦରଗଡ଼ରେ ୩୨୨୯.୫୨୫ ଲିଟର ମଦ ଜବତ କରାଯାଇଛି। ସେହିପରି ବିଭିନ୍ନ ଜିଲାରୁ ୧୭୯୪.୮୩ ଗ୍ରାମ୍ ଡ୍ରଗ୍ସ ଜବତ କରାଯାଇଛି। ୪୩,୦୯୪ ଜଣଙ୍କ ବିରୋଧରେ ଓ୍ବାରେଣ୍ଟ ଜାରି କରାଯାଇଛି।