ନୂଆଦିଲ୍ଲୀ,୨୯ା୯: କେନ୍ଦ୍ର ସରକାର ଅକ୍ଟୋବର ୧ରୁ ଅନ୍ଲାଇନ ଗେମିଂ ଉପରେ ୨୮ ପ୍ରତିଶତ ଦ୍ରବ୍ୟ ଓ ସେବା ଟିକସ (ଜିଏସ୍ଟି) ଲାଗୁ କରିବା ପାଇଁ ପ୍ରସ୍ତୁତ ଅଛନ୍ତି। କେନ୍ଦ୍ରୀୟ ପରୋକ୍ଷ ଟିକସ ଓ ସୀମାଶୁଳ୍କ (ସିବିଆଇସି) ଅଧ୍ୟକ୍ଷ ସଞ୍ଜୟ ଅଗ୍ରଓ୍ବାଲ ଏହା ଘୋଷଣା କରିଛନ୍ତି। ବିଭିନ୍ନ ସେକ୍ଟରକୁ ଜିଏସ୍ଟି ପରିସରକୁ ଆଣି ଟିକସ ସଂଗ୍ରହ ବଢ଼ାଇବା ପାଇଁ ସରକାର ଉଦ୍ୟମ ଚଳାଇଥିବାବେଳେ ଅନ୍ଲାଇନ ଗେମିଂ ଉପରେ ଜିଏସ୍ଟି ଲାଗୁ କରିବା ସେଥିରୁ ଅନ୍ୟତମ। ସବୁ ରାଜ୍ୟଙ୍କ ସହମତି ଏବଂ ଲୋକ ସଭାରେ ଜିଏସ୍ଟି ଆଇନ ସଂଶୋଧନ ବିଲ୍ ଗୃହୀତ ହେବା ପରେ ଉପରୋକ୍ତ ପଦକ୍ଷେପ ନିଆଯାଇଛି। ରାଜ୍ୟଗୁଡ଼ିକର ବିଧାନସଭାରେ ଅନ୍ଲାଇନ ଗେମିଂ ଉପରେ ଜିଏସ୍ଟି ହାର ପାଇଁ ଆଇନ ଆଣିବାକୁ ହେବ। କେତେକ ଅନ୍ଲାଇନ୍ ଗେମିଂ କମ୍ପାନୀକୁ କାରଣ ଦର୍ଶାଅ ନୋଟିସ୍ ଆଇନଗତ ପ୍ରକ୍ରିୟା ବୋଲି ସିବିଆଇସି ଅଧ୍ୟକ୍ଷ କହିଛନ୍ତି।
