ଝାରସୁଗୁଡା, ୩୦।୧୨(ଆଶିଷ ରଞ୍ଜନ ଦାଶ): ଝାରସୁଗୁଡା ଜିଲା ଲଖନପୁର ବ୍ଲକ ଉବୁଡା ଗ୍ରାମର ଜଣେ ୨୫ ବର୍ଷୀୟ ଯୁବକଙ୍କ ସୋମବାର ଆତ୍ମହତ୍ୟା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି। ବନ୍ଧବାହାଲସ୍ଥିତ ଲଖନପୁର ଏମସିଏଲ ହସ୍ପିଟାଲରେ ଦୀର୍ଘ ୧୭ ଘଣ୍ଟାରୁ ଅଧିକ ସମୟ ଧରି ମୃତଦେହକୁ ରଖି ସ୍ଥାନୀୟ ଲୋକମାନେ ଓ ମୃତକଙ୍କ ପରିବାର ବିକ୍ଷୋଭ କରିଛନ୍ତି। ମୃତ ଯୁବକ ଜଣକ ୨୫ ବର୍ଷୀୟ ସୁଜିତ ଦିଶିର। ଉବୁଡାରେ ସୁଜିତଙ୍କ ପୈତୃକ ଜମିକୁ ଏମସିଏଲ ପକ୍ଷରୁ ଅଧିଗ୍ରହଣକୁ ସୁଜିତଙ୍କ ପରିବାର ଲୋକେ ବିରୋଧ ସତ୍ତ୍ୱେ ଏମସିଏଲ ଓ ପୋଲିସ ପକ୍ଷରୁ ଚାପ ପ୍ରୟୋଗ କରାଯାଇଥିଲା ଏବଂ ଜୋର ଜବରଦସ୍ତ ଜମି ଅଧିଗ୍ରହଣ କରାଯାଇଥିଲା ବୋଲି ସୁଜିତଙ୍କ ପରିବାର ଲୋକେ ଅଭିଯୋଗ କରିଛନ୍ତି। ନିଯୁକ୍ତି କ୍ଷତିପୂରଣ ନ ଦେଇ ଏମସିଏଲର ଜମି ଅଧିଗ୍ରହଣକୁ ସହି ନ ପାରି ସୁଜିତ ଆତ୍ମହତ୍ୟା କରିଥିବା ପରିବାର ଲୋକେ ଅଭିଯୋଗ କରିବା ସହ ନ୍ୟାୟ ଦାବି କରିଛନ୍ତି । ଅନ୍ୟପଟେ ଏମସିଏଲ ଏହାକୁ ଖଣ୍ଡନ କରିବା ସହ ଅଧିଗ୍ରହଣ ହେଉଥିବା ଜମି ପରିବର୍ତ୍ତେ ପର୍ଯ୍ୟାୟ କ୍ରମେ ନିଯୁକ୍ତି ଏବଂ କ୍ଷତିପୂରଣ ଦିଆଯାଉଥିବା ପ୍ରକାଶ କରିଛନ୍ତି ।
