କଟକ ଅଫିସ,୫ା୧୧: ୬ ଟଙ୍କାର କ୍ୟାରିବ୍ୟାଗ୍ ପାଇଁ କଟକ ବକ୍ସିବଜାରସ୍ଥିତ ବଜାର କୋଲକାତା ଶପିଂ ମଲ ତଣ୍ଡ ଗଣିବ। ଉକ୍ତ ଶପିଂ ମଲ୍କୁ ଜିଲା ଖାଉଟି ଅଦାଲତ ଏଭଳି ଦଣ୍ଡିତ କରିଛନ୍ତି। ଜଣେ ଗ୍ରାହକଙ୍କୁ ନ ଜଣାଇ କ୍ୟାରି ବ୍ୟାଗ ପାଇଁ ୬ ଟଙ୍କା ନେବା ଅଭିଯୋଗର ଶୁଣାଣି କରି ଅଦାଲତ ୨୫ ହଜାର ଟଙ୍କା ଅର୍ଥଦଣ୍ଡ ୩୦ ଦିନ ମଧ୍ୟରେ ପ୍ରଦାନ କରିବାକୁ ଆଦେଶ ଦେଇଛନ୍ତି। ବିଚାରପତି ଦେବାଶିଷ ନାୟକ ଓ ଶିବାନନ୍ଦ ମହାନ୍ତିଙ୍କ ଖଣ୍ଡପୀଠ ଗତ ୧୯ ତାରିଖରେ ଏହି ରାୟ ଶୁଣାଇଛନ୍ତି।
ପୁରୀଘାଟ ଥାନା ଅନ୍ତର୍ଗତ ହରିପୁର ମୂଳିଆସାହିର ପଦ୍ମଲୋଚନ ରାଉତ ବକ୍ସିବଜାରସ୍ଥିତ ବଜାର କୋଲକାତାରୁ ୨୦୨୦ ଡିସେମ୍ବର ୨୮ରେ ଏକ ଟି-ଶାର୍ଟ କିଣିଥିଲେ। ଏ ବାବଦରେ ୨୪୯ ଟଙ୍କା ଦେବାକୁ ସେ କାଉଣ୍ଟରରେ ଉପସ୍ଥିତ ଥିବାବେଳେ ତାଙ୍କୁ କ୍ୟାରିବ୍ୟାଗ୍ ଦରକାର କି ବୋଲି ପଚରାଯାଇଥିଲା। ସେ ହଁ କହିବାରୁ ତାଙ୍କୁ ଗୋଟାଏ କ୍ୟାରି ବ୍ୟାଗ ଦିଆଯାଇଥିଲା। ମାତ୍ର ସେ କାର୍ଡ ମାଧ୍ୟମରେ ଟଙ୍କା ଦେବା ପରେ ଜାଣିଲେ ଯେ ତାଙ୍କଠାରୁ ୬ ଟଙ୍କା ଅଧିକ ନିଆଯାଇଛି। କ୍ୟାରି ବ୍ୟାଗ ନେବାକୁ ପଚାରିବାବେଳେ ଏଥିପାଇଁ ୬ ଟଙ୍କା ଦେବାକୁ ପଡ଼ିବ ବୋଲି ତାଙ୍କୁ କେହି କହି ନ ଥିଲେ କି ମଲ୍ ମଧ୍ୟରେ ଏ ସମ୍ପର୍କିତ କୌଣସି ଲେଖା ମଧ୍ୟ ନ ଥିଲା। ସେ ଏ କଥା ପଚାରିବାରୁ କୌଣସି ସନ୍ତୋଷଜନକ ଉତ୍ତର ପାଇ ନ ଥିଲେ। ସେ ମାନସିକ ଭାବେ ଆଘାତ ପାଇ ଫେରିଆସିଥିଲେ। ପରେ ଉକ୍ତ ଶପିଂ ମଲ୍ ଦାୟିତ୍ୱରେ ଥିବା ଅଧିକାରୀଙ୍କୁ ଲିଗାଲ ନୋଟିସ ପଠାଇଥିଲେ। ନିର୍ଦ୍ଧାରିତ ଦିନ ସପିଂ ମଲ୍ ତରଫରୁ କେହି କାଉନସେଲିଂ ସେଣ୍ଟରକୁ ଆସି ନ ଥିଲେ। ଫଳରେ ପଦ୍ମଲୋଚନ ରାଉତ ଏନେଇ ଜିଲା ଖାଉଟି ଅଦାଲତଙ୍କ ଦ୍ୱାରସ୍ଥ ହୋଇଥିଲେ। ସେ କ୍ଷତିପୂରଣ ୬୦ ହଜାର ଟଙ୍କା, ମାନସିକ ନିର୍ଯାତନା ନିମନ୍ତେ ୧୫ ହଜାର ଟଙ୍କା ଓ ମାମଲାଜନିତ ଖର୍ଚ୍ଚ ବାବଦରେ ୧୫ ହଜାର ଟଙ୍କା ପ୍ରଦାନ ପାଇଁ ଦାବି କରିଥିଲେ। ତେବେ ବିଚାରପତିଙ୍କ ଖଣ୍ଡପୀଠ ତାଙ୍କ ରାୟରେ ମାନସିକ ନିର୍ଯାତନାଜନିତ କ୍ଷତିପୂରଣ ବାବଦରେ ୧୦ ହଜାର ଟଙ୍କା ଓ ମାମଲା ଖର୍ଚ୍ଚଜନିତ ୧୫ ହଜାର ଟଙ୍କା ଶପିଂ ମଲ୍ ପକ୍ଷରୁ ଆବେଦନକାରୀଙ୍କୁ ପ୍ରଦାନ କରିବା ପାଇଁ ଆଦେଶ ଦେଇଛନ୍ତି।
