ଚଣ୍ଡିଗଡ଼,୧୨ା୨: ପଞ୍ଜାବ ବିଧାନସଭା ନିର୍ବାଚନ ପାଇଁ ନାମାଙ୍କନପତ୍ର ଦାଖଲ କରିଥିବା ପ୍ରାର୍ଥୀଙ୍କ ମଧ୍ୟରୁ ୨୫ ପ୍ରତିଶତଙ୍କ ବିରୋଧରେ ଆପରାଧିକ ମାମଲା ରହିଛି। ୧୧୭ ନିର୍ବାଚନମଣ୍ଡଳୀ ମଧ୍ୟରୁ ୫୭ ଆସନ (୪୯%)ରେ ୩ କିମ୍ବା ତଦୂର୍ଦ୍ଧ୍ୱ ପ୍ରାର୍ଥୀ ସେମାନଙ୍କ ନାମରେ ଆପରାଧିକ ମାମଲା ବିଚାରାଧୀନ ଥିବା ଘୋଷଣା କରିଛନ୍ତି। ତେଣୁ ସେଗୁଡ଼ିକୁ ଅତି ସମ୍ବେଦନଶୀଳ ବା ରେଡ୍ ଆଲର୍ଟ ଆସନ ଘୋଷଣା କରାଯାଇଛି। ଏଥର ମଇଦାନକୁ ୫୨୧ କୋଟିପତି ଓହ୍ଲାଇଛନ୍ତି। ନିର୍ବାଚନୀ ସଂସ୍କାର କ୍ଷେତ୍ରରେ କାର୍ଯ୍ୟରତ ଏନ୍ଜିଓ ଆସୋସିଏଶନ୍ ଫର୍ ଡେମୋକ୍ରାଟିକ୍ ଏଡିଆର୍ ବିଶ୍ଳେଷଣରୁ ଜଣାପଡ଼ିଛି ଯେ, ଆମ୍ ଆଦ୍ମୀ ପାର୍ଟି (ଏଏପି) ଟିକେଟରେ ଏସ୍ଏଏସ୍ ନଗରରୁ ପ୍ରାର୍ଥୀ ହୋଇଥିବା କୁଲଓ୍ବନ୍ତ ସିଂ ହେଉଛନ୍ତି ସବୁଠୁ ଧନୀ, ଯାହାଙ୍କର ୨୩୮ କୋଟି ଟଙ୍କାର ସମ୍ପତ୍ତି ଅଛି। ଜଲାଲାବାଦ ଆସନରୁ ଲଢ଼ୁଥିବା ଶିରୋମଣି ଅକାଳୀ ଦଳ (ଏସ୍ଏଡି) ମୁଖ୍ୟ ସୁଖବୀର ସିଂ ବାଦଲ ୨୦୨ କୋଟି ଟଙ୍କା ସମ୍ପତ୍ତିର ଅଧିକାରୀ ବୋଲି ନିଜ ସତ୍ୟପାଠରେ ଦର୍ଶାଇଛନ୍ତି। ଗତ ବିଧାନସଭା ନିର୍ବାଚନରେ ପ୍ରାର୍ଥୀମାନଙ୍କ ହାରାହାରି ସମ୍ପତ୍ତିର ମୂଲ୍ୟ ୩.୪୯ କୋଟି ଥିବାବେଳେ ଏଥର ୪.୩୧ କୋଟି ଟଙ୍କାକୁ ବୃଦ୍ଧି ପାଇଛି। ଅନ୍ୟପକ୍ଷେ ୫ ପ୍ରାର୍ଥୀ ସେମାନଙ୍କର କୌଣସି ସମ୍ପତ୍ତି ନ ଥିବା ଦର୍ଶାଇଛନ୍ତି।
ମୋଟ ୧,୩୦୪ ପ୍ରାର୍ଥୀଙ୍କ ମଧ୍ୟରୁ ୧,୨୭୬ ଜଣଙ୍କ ସତ୍ୟପାଠକୁ ଏଡିଆର୍ ବିଶ୍ଳେଷଣ କରିଥିଲା। ସେମାନଙ୍କ ମଧ୍ୟରୁ ୨୫% ଅର୍ଥାତ୍ ୩୧୫ ଜଣ ପ୍ରାର୍ଥୀଙ୍କ ବିରୋଧରେ ଆପରାଧିକ ମାମଲା ରହିଛି। ୨୧୮ ଜଣ(୧୭%) ନିଜ ବିରୋଧରେ ସଙ୍ଗିନ ମାମଲା ବିଚାରାଧୀନ ଥିବା ସତ୍ୟପାଠରେ ଦର୍ଶାଇଛନ୍ତି। ୨୨୮ ପ୍ରାର୍ଥୀ ଜାତୀୟ ଦଳର ହୋଇଥିବାବେଳେ ୨୫୬ ଆଞ୍ଚଳିକ ଓ ୩୪୫ ଜଣ ପଞ୍ଜୀକୃତ ଅଣସ୍ବୀକୃତିପ୍ରାପ୍ତ ଦଳର ପ୍ରାର୍ଥୀ। ଏହାବାଦ୍ ୪୪୭ ଜଣ ସ୍ବାଧୀନ ଭାବେ ନିର୍ବାଚନ ଲଢ଼ୁଛନ୍ତି। ଅନ୍ୟ ୨୮ ଜଣଙ୍କ ସତ୍ୟପାଠ ସମ୍ପୂର୍ଣ୍ଣ ନ ଥିବା କିମ୍ବା ସେଗୁଡ଼ିକୁ ଠିକ୍ ଭାବେ ସ୍କାନ୍ କରାଯାଇ ନ ଥିବାରୁ ନିର୍ବାଚନ କମିଶନଙ୍କ ଓ୍ବେବ୍ସାଇଟ୍ରେ ଅପ୍ଲୋଡ୍ କରାଯାଇ ନାହିଁ।
