ଗୁଣପୁର,୧୩ା୮(ସୁଜାତା ପାଢ଼ୀ): ଅଖିଳ ଭାରତୀୟ କୃଷି ଓ ଗ୍ରାମୀଣ ଶ୍ରମିକ ସଂଘ ତରଫରୁ ଦେଶ ବ୍ୟାପୀ ଅନଶନ ଓ ସତ୍ୟାଗ୍ରହ ଗୁରୁବାର କରାଯାଇଥିବାବେଳେ ଗୁଣପୁର ନୂଆ ବସ୍ଷ୍ଟାଣ୍ଡଠାରୁ ଏକ ଶୋଭାଯାତ୍ରା ବାହାରି ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲା। ସେଠାରେ ୨୪ ଘଣ୍ଟିଆ ଅନଶନ, ସତ୍ୟାଗ୍ରହ କରିବା ସହ ଏକ ପ୍ରତିବାଦ ସଭା ହୋଇଥିଲା। ଜିଲା କମିଟି ସଭ୍ୟ ଅନାସୀମ ଶବର, କୈଳାସ ଶବର, ବୃନ୍ଦାବନ ବିଡ଼ିକା ଓ ଅନ୍ୟାନ୍ୟ ନେତା ଗଣ ବକ୍ତବ୍ୟ ରଖିଥିଲେ। ସମାନ କାମକୁ ସମାନ ମଜୁରୀ ଯୋଗାଇବା, ଗରିବ, ଭୂମିହୀନଙ୍କ କୁଡ଼ିଆ ଘରଗୁଡ଼ିକୁ ବୁଲଡୋଜର ଲଗେଇ ଘର ଭଙ୍ଗା ବନ୍ଦ, ରହିବା ଘରକୁ ପଟ୍ଟା ପ୍ରଦାନ,
ସମସ୍ତ ପଞ୍ଚାୟତରେ ଭୂମିହୀନଙ୍କ ପାଇଁ ସରକାରୀ ବାସଗୃହ କଲୋନୀ ନିର୍ମାଣ, ପ୍ରଧାନମନ୍ତ୍ରୀ ଆବାସ ଯୋଜନାରେ ୭ ଲକ୍ଷ ନଗଦ ପ୍ରଦାନ, ଭିବିଜି ରାମ ଜୀ ଯୋଜନାରେ ୧୨୫ ଦିନର କାମ ଗ୍ୟାରେଣ୍ଟି ଦେବା ସହ ସର୍ବନିମ୍ନ ୭୦୦ ମଜୁରୀ ପ୍ରଦାନ, କୌଣସି କାମ ନାହିଁ, ତେବେ ବେକାରୀ ଭତ୍ତା ପାଇଁ ଏକ ବ୍ୟବସ୍ଥା ପ୍ରଣୟନ କରିବା, ଏସ୍ଆଇଆର ଆଧାରରେ ରାଶନକାର୍ଡରୁ ଗରିବ ଭୂମିହୀନ ଲୋକଙ୍କୁ ବାଦ୍ ବନ୍ଦ କରିବା, ସମସ୍ତ ଗରିବ ଭୂମିହୀନ ପରିବାରର ପିଲାମାନଙ୍କ ପାଇଁ ମାଗଣା ଉଚ୍ଚଶିକ୍ଷାର ଗ୍ୟାରେଣ୍ଟି ଦେବା, ସାମାଜିକ ସୁରକ୍ଷା ପେନସନରୁ ନାମ ବାଦ ଦେବା ବନ୍ଦ, ସମସ୍ତ ବୃଦ୍ଧଙ୍କୁ ୫୦୦୦ ସାମାଜିକ ସୁରକ୍ଷା ପେନସନ ପ୍ରଦାନ, ସାଟେଲାଇଟ ଟାଉନଶିପ୍ ଆଧାରରେ ଚାଷୀଙ୍କ ଜମିକୁ ଜୋରଦାର ହଡ଼ପ ବନ୍ଦ, ପଞ୍ଚାୟତ ଗୃହ, ରାସ୍ତା, ପାଣି ଇତ୍ୟାଦି ଉପରେ ବେଆଇନ ଟିକସ ଲାଗୁ କରିବା ବନ୍ଦ କରିବା ପାଇଁ ଜିଲା କମିଟି ସଭ୍ୟ ଅନାସୀମ ଶବର ସରକାରଙ୍କୁ ଚେତାବନୀ ଦେଇଛନ୍ତି।
