ଭୁବନେଶ୍ୱର,୨୯ା୧୧ (ଅନୁରାଧା ମହାରଣା): ୨୦୨୨ ଓ ୨୦୨୩ରେ ରାଜ୍ୟରେ ୨୩,୬୫୫ ସଡ଼କ ଦୁର୍ଘଟଣା ଘଟିଛି। ୨୦୨୨ରେ ୧୧,୬୬୩ଟି ଦୁର୍ଘଟଣା ଘଟିଥିବାବେଳେ ୨୦୨୩ରେ ଏହି ସଂଖ୍ୟାରେ ୩୨୯ ବଢ଼ିଛି, ଅର୍ଥାତ୍ ୧୧,୯୯୨ ଦୁର୍ଘଟଣା ହୋଇଛି। ଏହି ଦୁଇ ବର୍ଷରେ ଦ୍ରୁତଗତିଜନିତ ଦୁର୍ଘଟଣା ସବୁଠାରୁ ଅଧିକ ରହିଥିବାବେଳେ ୨୦୨୨ରେ ୭୩୮୩ ଓ ୨୦୨୩ରେ ୬୯୨୫ ଦୁର୍ଘଟଣା ହୋଇଛି। ମଦ୍ୟପାନଜନିତ ଦୁର୍ଘଟଣା ଓ ବିପରୀତ ଦିଗରେ ଗାଡ଼ି ଚାଳନା ଯୋଗୁ ଦୁର୍ଘଟଣା ସଂଖ୍ୟା ସାମାନ୍ୟ କମ୍ ହୋଇଛି।
୨୦୨୨ରେ ମଦ୍ୟପାନଜନିତ ଦୁର୍ଘଟଣା ୬୫୪, ବିପରୀତ ଦିଗରେ ଗାଡ଼ି ଚାଳନା ପାଇଁ ୧୧୪୦, ରେଡ୍ ସିଗ୍ନାଲ ଥିବାବେଳେ ରାସ୍ତା ଅତିକ୍ରମବେଳେ ୧୧୯, ମୋବାଇଲ ବ୍ୟବହାର କରି ଗାଡି ଚାଳନା ଯୋଗୁ ୩୪୭ ଓ ଅନ୍ୟ କାରଣରୁ ୨୦୨୦ଟି ଦୁର୍ଘଟଣା ଘଟିଛି। ସେହିପରି ୨୦୨୩ରେ ମଦ୍ୟପାନଜନିତ ଦୁର୍ଘଟଣା ସଂଖ୍ୟା ୬୪୯, ବିପରୀତ ଦିଗରେ ଗାଡ଼ି ଚାଳନା ଯୋଗୁ ୯୮୬, ରେଡ୍ ସିଗ୍ନାଲ ନ ମାନି ଗାଡ଼ି ଚାଳନାରୁ ୧୫୦, ମୋବାଇଲ ବ୍ୟବହାର କରି ଗାଡି ଚାଳନାରୁ ୪୪୩ ଓ ଅନ୍ୟାନ୍ୟ କାରଣରୁ ୮୪୯ଟି ଦୁର୍ଘଟଣା ହୋଇଛି। ବିଧାନସଭାରେ ବିଧାୟକ ସିଦ୍ଧାନ୍ତ ମହାପାତ୍ରଙ୍କ ପ୍ରଶ୍ନର ଉତ୍ତରରେ ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ଏହି ତଥ୍ୟ ରଖିଛନ୍ତି।
