ଜେନେଭା, ୧୮।୫: ଆହୁରି ବଢ଼ିବ ବୈଶ୍ୱିକ ତାପମାତ୍ରା। ସବୁଜ ଗୃହ ଗ୍ୟାସ୍, ଏଲ୍ ନିନୋ ପ୍ରଭାବରେ ଆସନ୍ତା ୫ ବର୍ଷ ସବୁଠୁ ଉତ୍ତପ୍ତ ଅବଧି ହେବ ବୋଲି ଜାତିସଂଘର ବିଶ୍ୱ ପାଣିପାଗ ଅର୍ଗାନାଇଜେଶନ୍ (ଡବ୍ଲ୍ୟୁଏମ୍ଓ) ପକ୍ଷରୁ ସତର୍କ କରାଯାଇଛି। ୨୦୨୩ରୁ ୨୭ ମଧ୍ୟରେ ତାତି ବୃଦ୍ଧି ପାଇବା ନେଇ ଦୁଇ-ତୃତୀୟାଂଶ ଆଶଙ୍କା ଥିବା ଡବ୍ଲ୍ୟୁଏମ୍ଓ କହିଛି।
ବୈଶ୍ୱିକ ତାପମାତ୍ରା ବୃଦ୍ଧିକୁ ନେଇ ବିଶେଷଜ୍ଞମାନଙ୍କ ଆକଳନ ଅନୁସାରେ ଆସନ୍ତା ୫ ବର୍ଷ (୨୦୨୩ରୁ-୨୭)ରୁ ଗୋଟିଏ ବର୍ଷରେ ତାତି ରେକର୍ଡ କରିବ। ରିପୋର୍ଟ ଅନୁଯାୟୀ ଆନୁଆଲ ଗ୍ଲୋବାଲ୍ ସର୍ଫେସ୍ ଟେମ୍ପରେଚର୍ସ ୧.୫ ଡିଗ୍ରୀ ସେଲ୍ସିୟସ୍ ବୃଦ୍ଧି ପାଇବା ନେଇ ୬୬% ଆଶଙ୍କା ଥିବା କୁହାଯାଇଛି। ସେହିପରି ୨୦୨୩-୨୭ ମଧ୍ୟରେ ପ୍ରତିବର୍ଷ ତାପମାତ୍ରା ୧.୧ ଡିଗ୍ରୀ ସେଲ୍ସିୟସ୍ରୁ ୧.୮ ଡିଗ୍ରୀ ସେଲ୍ସିୟସ୍ ପର୍ଯ୍ୟନ୍ତ ବୃଦ୍ଧି ଘଟିବ। ପ୍ୟାରିସ୍ରେ ତାପମାତ୍ରା କ୍ରମାଗତ ଭାବେ ବୃଦ୍ଧି ପାଉଥିବାବେଳେ ବିଶ୍ୱରେ ସମାନ ସ୍ଥିତି ଉପୁଜିବ ନାହିଁ। କିନ୍ତୁ ସାଧାରଣ ଭାବେ ପ୍ରତିବର୍ଷ ଯେଉଁଭଳି ତାପମାତ୍ରା ୧.୫ ଡିଗ୍ରୀ ସେଲ୍ସିୟସ୍ ବୃଦ୍ଧି ଘଟୁଛି ସେ ଅନୁସାରେ ବୈଶ୍ୱିକ ତାପମାତ୍ରା ବୃଦ୍ଧି ପାଇବ ବୋଲି ଏଜେନ୍ସି ମୁଖ୍ୟ ପିଟରି ତଲାସ୍ କହିଛନ୍ତି।
ଆସନ୍ତା ମାସରେ ସମୁଦ୍ରପତ୍ତନରେ ଏଲ୍ ନିନୋ ସୃଷ୍ଟି ହେବାକୁ ଥିବାବେଳେ ଏହା ମନୁଷ୍ୟକୃତ ଜଳବାୟୁ ପରିବର୍ତ୍ତନ ସହ ମିଶି ତାପମାତ୍ରା ବୃଦ୍ଧି ଲାଗି ଇନ୍ଧନ ଯୋଗାଇବ। ଏହାର ପ୍ରଭାବ ସ୍ବାସ୍ଥ୍ୟ, ଖାଦ୍ୟ ସୁରକ୍ଷା, ଜଳ ପରିଚାଳନା ଏବଂ ପରିବେଶ ଉପରେ ପଡ଼ିବ, ଯେଉଁଥିଲାଗି ଆମକୁ ଆଗୁଆ ପ୍ରସ୍ତୁତ ରହିବାକୁ ପଡ଼ିବ। ବୈଶ୍ୱିକ ତାପମାତ୍ରା ବୃଦ୍ଧି ପାଇବା ନେଇ ସବୁଜଗୃହ ଗ୍ୟାସ୍ କାର୍ବନ୍ ଡାଇଅକ୍ସାଇଡ୍, ମିଥେନ୍ ଓ ନାଇଟ୍ରସ୍ ଅକ୍ସାଇଡ୍ର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଉଭୟ ସ୍ଥଳ ଓ ସମୁଦ୍ର ଭାଗର ତାପମାତ୍ରା ୧୯୬୦ରୁ କ୍ରମଶଃ ବୃଦ୍ଧିପାଇବାରେ ଲାଗିଛି। ସେହିପରି ୧୮୫୦ରୁ ୧୯୯୦ ମଧ୍ୟରେ ବୈଶ୍ୱିକ ତାପମାତ୍ରା ୧.୫ ଡିଗ୍ରୀ ସେଲ୍ସିଅସ୍ ବଢ଼ିଥିବାବେଳେ ୨୦୧୫ ପର୍ଯ୍ୟନ୍ତ ତାପମାତ୍ରା ଧୀରେ ଧୀରେ ବୃଦ୍ଧି ପାଇଥିବା କୁହାଯାଇଛି।
ବ୍ରିଟେନର ନ୍ୟାଶନାଲ ଓ୍ବେଦର ସର୍ଭିସ୍ ‘ମେଟ୍ ଅଫିସ୍’ ଜଳବାୟୁ ସମ୍ପର୍କରେ ବାର୍ଷିକ ଏବଂ ୧୦ ବର୍ଷିଆ ଆକଳନ କରିଥାଏ। ମେଟ୍ର ଆକଳନ ଅନୁସାରେ ୨୦୨୩ରୁ ୨୭ ଲଗାତର ୫ ବର୍ଷ ବୈଶ୍ୱିକ ତାପମାତ୍ରା ବୃଦ୍ଧି ପାଇବା ନେଇ ୩୨% ଆଶଙ୍କା ରହିଛି। ଆଲାସ୍କା, ଦକ୍ଷିଣ ଆଫ୍ରିକା, ଦକ୍ଷିଣ ଏସିଆ, ଅଷ୍ଟ୍ରେଲିଆର କିଛି ଅଞ୍ଚଳରେ ଚଳିତବର୍ଷ ସର୍ବାଧିକ ତାପମାତ୍ରା ଅନୁଭୂତ ହେବ। ସାରା ବିଶ୍ୱ ତାପମାତ୍ରା ବୃଦ୍ଧିଜନିତ ସମସ୍ୟା ଭୋଗୁଥିବାବେଳେ ଦକ୍ଷିଣ ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଅପେକ୍ଷାକୃତ ଥଣ୍ଡା ଅନୁଭୂତ ହେବ ବୋଲି ମେଟ୍ ଅଫିସ୍ ସୂଚନା ଦେଇଛି।
