ବଡ଼ମ୍ବା,୧୧।୯(ସ୍ବ.ପ୍ର.): ଇଂଲିଶ୍ ଶବ୍ଦକୁ ଓଡ଼ିଆରେ ଅନୁବାଦ କରିବା ସହ ବିଭିନ୍ନ ଖାଦ୍ୟ ପଦାର୍ଥ ତଥା ଜିନିଷର ନାମକୁ ଇଂଲିଶ୍ରେ କହି ଇଣ୍ଡିଆ ବୁକ ଅଫ୍ ରେକର୍ଡରେ ସ୍ଥାନ ପାଇଛନ୍ତି ଜଣେ ୨ ବର୍ଷର ବାଳକ। ସେ ହେଲେ କଟକ ଜିଲା ବଡ଼ମ୍ବା ବ୍ଲକ ଅନ୍ତର୍ଗତ ଖୁଣ୍ଟୁକଟା ଗ୍ରାମର ମାନସ ରଞ୍ଜନ ନାୟକଙ୍କ ପୁଅ ଆର୍ଚିସମାନ ନାୟକ। କିଛିଦିନ ତଳେ ତାଙ୍କ ପାଖକୁ କୋରିଅର ମାଧ୍ୟମରେ ଇଣ୍ଡିଆ ବୁକ୍ ଅଫ୍ ରେକର୍ଡ୍ସର ସାର୍ଟିଫିକେଟ୍ ଏବଂ ପଦକ ଆସି ପହଞ୍ଚିଛି। ସେ ଇଂଲିଶ୍ର ଆଲ୍ଫାବେଟ୍ ସହ ୧୩୫ ଇଂଲିଶ୍ ଶବ୍ଦର ଓଡ଼ିଆ ଅନୁବାଦ, ଦେଶର ୨୮ ରାଜ୍ୟର ନାମ, ୭ କେନ୍ଦ୍ରଶାସିତ ଅଞ୍ଚଳ, ୨୪ ଜଣ ସ୍ବାଧୀନତା ସଂଗ୍ରାମୀଙ୍କ ନାମ, ୨୨ ସଙ୍ଗୀତ ବାଦ୍ୟଯନ୍ତ୍ର, ୭ ମହାଦେଶ, ୮ ଗ୍ରହ ସମେତ ବିଭିନ୍ନ ଫୁଲ, ପନିପରିବା, ପକ୍ଷୀ, ଗାଡି, ରଙ୍ଗ, ଶରୀରର ଅଙ୍ଗ, କମ୍ପ୍ୟୁଟରର ବିଭନ୍ନ ଯନ୍ତ୍ରାଂଶ ସମ୍ପର୍କରେ କହିପାରୁଛନ୍ତି। ପୁଅ ଏପରି ସଫଳତା ନେଇ ତାଙ୍କ ମା’ ଶୁଭଲକ୍ଷ୍ମୀ ନାୟକ, ଜେଜେ ମହେନ୍ଦ୍ର ନାୟକଙ୍କ ସମେତ ପରିବାରର ସମସ୍ତ ସଦସ୍ୟ ଗର୍ବ ଅନୁଭବ କରୁଥିବା କହିଛନ୍ତି। ଏନେଇ ବଡ଼ମ୍ବା ବିଧାୟକ ଦେବୀ ପ୍ରସାଦ ମିଶ୍ର ଆର୍ଚିସମାନଙ୍କୁ ଶୁଭେଚ୍ଛା ଜଣାଇଛନ୍ତି। ଏହି ଖବର ପ୍ରଚାରିତ ହେବା ପରେ ତାଙ୍କୁ ବିଭିନ୍ନ ଅଞ୍ଚଳରୁ ଶୁଭେଚ୍ଛାର ସୁଅ ଛୁଟିଛି।
