କର୍ଲାମୁଣ୍ଡା,୨୩।୯(ପ୍ରଦୀପ କୁମାର ସାହୁ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ଅନ୍ତର୍ଗତ ପୌରକେଲା ଗ୍ରାମର ଶ୍ରୀରାମ ମଣ୍ଡପ ପରିସରରେ ମା’ ସୁନାମୁଖୀ ଯୁବ ସଂଗଠନ, ପୌରକେଲା ପକ୍ଷରୁ ମଙ୍ଗଳବାର ଏକ ବିଶିଷ୍ଟ ପ୍ରତିଭା ସମ୍ବର୍ଦ୍ଧନା ସମାରୋହ ଅନୁଷ୍ଠିତ ହୋଇଯାଇଛି। ଗ୍ରାମର ଦୁଇ ପ୍ରତିଭାବାନ ସନ୍ତାନ ଡ଼ଃ. ସରସ୍ବତୀ ସୁନା ଓ ଡ଼ଃ. ଜିତେନ୍ଦ୍ର ସୁନାଙ୍କ ଉଚ୍ଚଶିକ୍ଷା ଓ ଗବେଷଣା କ୍ଷେତ୍ରର ସଫଳତାକୁ ସମ୍ମାନ ଜଣାଇ ଏହି ସମ୍ବର୍ଦ୍ଧନା ସମାରୋହ ଆୟୋଜିତ ହୋଇଥିଲା।
କାର୍ଯ୍ୟକ୍ରମର ମୁଖ୍ୟ ଆକର୍ଷଣ ଡ଼ଃ. ସରସ୍ବତୀ ସୁନା ଓ ତାଙ୍କ ପରିବାରବର୍ଗ ଥିଲେ। ଡ଼ଃ. ସରସ୍ବତୀ ସୁନା ୨୦୨୪ ମସିହାରେ ଅଷ୍ଟ୍ରେଲିଆର ଦି ୟୁନିଭର୍ସିଟି ଅଫ ସିଡନୀରୁ ଶିକ୍ଷା (Education) ବିଷୟରେ ପିଏଚ.ଡି. ଡିଗ୍ରୀ ଅର୍ଜନ କରି ଏକ ଅନନ୍ୟ କୃତିତ୍ୱ ହାସଲ କରିଛନ୍ତି। ଆୟୋଜକଙ୍କ ପ୍ରଦତ୍ତ ସୂଚନା ଅନୁସାରେ, ସେ କଳାହାଣ୍ଡି ଜିଲାର ପ୍ରଥମ ମହିଳା ଭାବେ ସିଡନୀ ବିଶ୍ୱବିଦ୍ୟାଳୟରୁ ପିଏଚ.ଡି. ଅର୍ଜନ କରିଥିଲେ। ସମାରୋହରେ ସରସ୍ବତୀ ତାଙ୍କ ଶିକ୍ଷା ଜୀବନ, ସଂଘର୍ଷ ଓ ସଫଳତାର ଅନୁଭୂତି ଉପସ୍ଥିତ ଛାତ୍ରୀଛାତ୍ର ଓ ଗ୍ରାମବାସୀଙ୍କ ସହ ବାଣ୍ଟିଥିଲେ। ଉଚ୍ଚଶିକ୍ଷା ହାସଲ କରିବାର ଯାତ୍ରାରେ ଆସିଥିବା ବିଭିନ୍ନ ଆହ୍ବାନ ଓ ତାହାକୁ ଅତିକ୍ରମ କରି ସଫଳତା ପାଇବାର ଅନୁଭବ ସମ୍ପର୍କରେ ସେ ବିସ୍ତୃତ ଭାବେ କହିଥିଲେ। ଭବିଷ୍ୟତରେ ଅଞ୍ଚଳର ଛାତ୍ରୀଛାତ୍ରମାନେ ଉଚ୍ଚଶିକ୍ଷା କ୍ଷେତ୍ରରେ ଆଗକୁ ବଢ଼ିବା ପାଇଁ ସେମାନଙ୍କୁ ନିଜ ସାଧ୍ୟମତେ ସହଯୋଗ ଓ ମାର୍ଗଦର୍ଶନ କରିବାକୁ ଡ଼ଃ. ସୁନା ପ୍ରତିଶ୍ରୁତି ଦେଇଥିଲେ। ନିଜ ବକ୍ତବ୍ୟରେ ଡ଼ଃ. ସୁନା ତାଙ୍କ ଜୀବନର ଆଦର୍ଶ ଭାବେ ଭାରତୀୟ ସମ୍ବିଧାନର ପ୍ରଣେତା ବାବାସାହେବ ଡକ୍ଟର ଭୀମରାଓ ଆମ୍ବେଦକର ଏବଂ ଭାରତର ପ୍ରଥମ ମହିଳା ଶିକ୍ଷୟିତ୍ରୀ ସାବିତ୍ରୀବାଈ ଫୁଲେଙ୍କୁ ଉଲ୍ଲେଖ କରିଥିଲେ।
ଶିକ୍ଷା, ସମାନତା, ସାମାଜିକ ନ୍ୟାୟ ଓ ନାରୀ ଶିକ୍ଷା ପ୍ରତି ଏହି ମହାନ ବ୍ୟକ୍ତିତ୍ୱମାନଙ୍କ ଅବଦାନ ତାଙ୍କୁ ନିଜ ଜୀବନରେ ଆଗକୁ ବଢ଼ିବାକୁ ପ୍ରେରଣା ଦେଇଥିବା ସେ ପ୍ରକାଶ କରିଥିଲେ। ସରସ୍ବତୀଙ୍କ ଭାଇ ଡ଼ଃ. ଜିତେନ୍ଦ୍ର ସୁନା ମଧ୍ୟ ୨୦୨୨ ମସିହାରେ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ(JNU), ନୂଆଦିଲ୍ଲୀରୁ ଇତିହାସ ବିଷୟରେ ପିଏଚ.ଡି. ଡିଗ୍ରୀ ଅର୍ଜନ କରିଛନ୍ତି। ବର୍ତ୍ତମାନ ସେ ରମାଦେବୀ ମହିଳା ବିଶ୍ୱବିଦ୍ୟାଳୟରେ ଅଧ୍ୟାପନା କ୍ଷେତ୍ରରେ କାର୍ଯ୍ୟରତ ଅଛନ୍ତି। ଏକ ଗ୍ରାମରୁ ଦୁଇ ଭାଇ-ଭଉଣୀଙ୍କ ଉଚ୍ଚଶିକ୍ଷା ଓ ଗବେଷଣା କ୍ଷେତ୍ରର ଏହି ସଫଳତା ଅଞ୍ଚଳବାସୀଙ୍କ ପାଇଁ ଗୌରବର ବିଷୟ ହୋଇଛି।
କାର୍ଯ୍ୟକ୍ରମରେ ପୌରକେଲା ସରପଞ୍ଚ ଯଶସ୍ବିନୀ ଧାରୁଆ ଓ ସମିତି ସଭ୍ୟ ସୁଧୀର ଭୋଇ ଅତିଥି ଭାବେ ଯୋଗଦେଇଥିଲେ। ଗ୍ରାମର ବିଶିଷ୍ଟ ଶିକ୍ଷାବିତ୍ ତଥା ଅବସରପ୍ରାପ୍ତ ଶିକ୍ଷକ ଯୁଧିଷ୍ଠିର ଭୋଇ ଓ ହଜାରୁ ଦଣ୍ଡସେନାଙ୍କ ସମେତ ବରୁଣ ଭୋଇ, ଗୋବିନ୍ଦ ଭୋଇ, ଶ୍ରୀ ବବୃବାହନ ଭୋଇ ଓ ବୈବସୁତ ସୁନା ପ୍ରମୁଖ ବିଶିଷ୍ଟ ଭଦ୍ରବ୍ୟକ୍ତି ଓ ସମାଜସେବୀ ଉପସ୍ଥିତ ଥିଲେ। ଯୁବ ସଂଗଠନର ଅଧ୍ୟକ୍ଷ ଲକ୍ଷପତି ରଣା ସ୍ବାଗତ ଅଭିଭାଷଣ ପ୍ରଦାନ କରିଥିବାବେଳେ ସଚିବ ତରୁନସେନ ସାହୁ ଧନ୍ୟବାଦ ଅର୍ପଣ କରିଥିଲେ। କୋର୍ କମିଟି ସଦସ୍ୟ ପ୍ରଦୀପ କୁମାର ବେହେରା ମଞ୍ଚ ପରିଚାଳନା କରିଥିଲେ। ଉପସଚିବ ପ୍ରଭଞ୍ଜନ ଦାସ, ଜନସମ୍ପର୍କ ସଂଯୋଜକ ଭୋଳା ରଣା ଏବଂ କୋର୍ କମିଟି ସଦସ୍ୟ ଧନେଶ୍ୱର ଭୋଇ, ଲୋଚନ ପାତ୍ର, ହଂଶଧ୍ୱଜ ଦଣ୍ଡସେନା, ଲମ୍ବୋଦର ନାଏକ ଓ ବରୁଣ ଭୋଇଙ୍କ ସମେତ ସଂଗଠନର ଅନ୍ୟ ସଦସ୍ୟମାନେ କାର୍ଯ୍ୟକ୍ରମକୁ ସଫଳ କରିବାରେ ସହଯୋଗ କରିଥିଲେ।
ପୌରକେଲା ଭଳି ଏକ ଛୋଟ ମଫସଲ ଗ୍ରାମରୁ, ଯେଉଁ ଗାଁ ରେ ଗମନାଗମନ ସୁବିଧା ନାହିଁ, ସ୍ବାସ୍ଥ୍ୟ ସୁବିଧା ନାହିଁ, ସେ ଗାଁରୁ ଦୁଇ ଜଣ ପ୍ରତିଭା ଦେଶ ତଥା ବିଦେଶର ପ୍ରତିଷ୍ଠିତ ବିଶ୍ୱବିଦ୍ୟାଳୟରୁ ପିଏଚ.ଡି. ଡିଗ୍ରୀ ଅର୍ଜନ କରି ଶିକ୍ଷା ଓ ଗବେଷଣା କ୍ଷେତ୍ରରେ ନିଜର ସ୍ଥାନ ସୃଷ୍ଟି କରିଥିବାରୁ ସମଗ୍ର ଅଞ୍ଚଳରେ ଗର୍ବ ଓ ଆନନ୍ଦର ପରିବେଶ ସୃଷ୍ଟି ହୋଇଛି। ଏଭଳି ପ୍ରତିଭାଙ୍କୁ ସମ୍ମାନିତ କରିବା ସହ ଯୁବପିଢ଼ିଙ୍କୁ ଉଚ୍ଚଶିକ୍ଷା, ଗବେଷଣା ଓ ସମାଜସେବା ପ୍ରତି ପ୍ରୋତ୍ସାହିତ କରୁଥିବାରୁ ମା’ ସୁନାମୁଖୀ ଯୁବ ସଂଗଠନର ଏହି ପଦକ୍ଷେପକୁ ଅଞ୍ଚଳବାସୀ ପ୍ରଶଂସା କରିଛନ୍ତି।
Dharitri – Odisha’s No.1 Odia Daily
