ଭୁବନେଶ୍ୱର,୩୦ା୧୨(ବ୍ୟୁରୋ):ଜମିଜମା ବିବାଦକୁ ନେଇ ୨ ପୋଷା କୁକୁରଙ୍କୁ ଅପହରଣ କରାଯାଇଥିବା ଅଭିଯୋଗ ହୋଇଛି। ତେବେ ଏପରି ଅଭିଯୋଗ ନେଇ ବିଭିନ୍ନ ଥାନାର ଦ୍ୱାରସ୍ଥ ହୋଇ ନିରାଶ ହେବା ପରେ ଶେଷରେ ଏହାର ମାଲିକ ଲୋୟର ପିଏମ୍ଜିରେ ଧାରଣା ଦେଇଛନ୍ତି। ଉକ୍ତ ବ୍ୟକ୍ତିଜଣକ ହେଲେ ୟୁନିଟ୍-୬ ଭୀମପୁର ଅଞ୍ଚଳର ପ୍ରଦ୍ୟୁମ୍ନ ଚୌଧୁରୀ। ଅଭିଯୋଗ ଅନୁସାରେ, ନଭେମ୍ବର ୨୭ରେ ପ୍ରଦ୍ୟୁମ୍ନ ଘରେ ନ ଥିବାବେଳେ ତାଙ୍କର ୨ ପୋଷାକୁକୁର ଜେସି ଓ ବ୍ରୁନୋକୁ ଅପହରଣ କରାଯାଇଛି। ପ୍ରଦ୍ୟୁମ୍ନ ଓ କେୟାର ଟେକରଙ୍କ ସହ ଦୁଇ କୁକୁର ରହିଥାନ୍ତି। ତେବେ ନୟାପଲ୍ଲୀ ଅଞ୍ଚଳର ଜଣେ ବ୍ୟକ୍ତିଙ୍କ ସହ ତାଙ୍କର ଜମିଜମା ବିବାଦ ଲାଗିରହିଥିବାବେଳେ କ୍ରୋଧ ପରାୟଣ ହୋଇ ସେ ଏପରି କାଣ୍ଡ ଘଟାଇଥିବା ପ୍ରଦ୍ୟୁମ୍ନ କହିଛନ୍ତି। ବ୍ରୁନୋର ବୟସ ୭ବର୍ଷ ହୋଇଥିତ୍ବାବେଳେ ଜେସିକୁ ମାତ୍ର ୩ମାସ। ମାସେରୁ ଅଧିକ ସମୟ ହେଲା ଉଭୟଙ୍କର କୌଣସି ପତ୍ତା ମିଳୁ ନ ଥିବାବେଳେ ଡିସେମ୍ବର ୧୧ରେ ଅପହରଣକାରୀ ଦୁଇ କୁକୁରଙ୍କ ଭିଡିଓ ପଠାଇଥିବା ସେ କହିଛନ୍ତି। ଧାରଣାରତ ପ୍ରଦ୍ୟୁମ୍ନ ନିଜ ପୋଷା କୁକୁରଙ୍କୁ ଠାବ କରିବାରେ ପୋଲିସର ସହଯୋଗ ଲୋଡ଼ିଛନ୍ତି। ‘ଏବେ ମଧ୍ୟ ବିଳମ୍ବ ହୋଇନାହିଁ ଆମକୁ ବଞ୍ଚାନ୍ତୁ’, ‘ଆମର ମଧ୍ୟ ବଞ୍ଚତ୍ବାର ଅଧିକାର ଅଛି’ ଏପରି ଲେଖା ସହ ଜେସି ଓ ବ୍ରୁନୋଙ୍କ ଫଟୋ ଲଗାଇ ନ୍ୟାୟ ମାଗୁଛନ୍ତି ପ୍ରଦ୍ୟୁମ୍ନ। ତେବେ ଘଟଣା ସତ୍ୟାସତ୍ୟ ପରଖି ପୋଲିସ କାର୍ଯ୍ୟାନୁଷ୍ଠାନ ନେବା ଆବଶ୍ୟକ ବୋଲି ପ୍ରାଣୀପ୍ରେମୀମାନେ ମତ ରଖିଛନ୍ତି।
