ବଲାଙ୍ଗୀର, ୧୨ା୧(ବୀରେନ୍ଦ୍ର କୁମାର ଝାଙ୍କର):ଦାଦନ ଖଟିବାକୁ ଯାଉଥିବା ଶ୍ରମିକମାନେ କିଭଳି ଦୁର୍ଦ୍ଦଶାର ସମ୍ମୁଖୀନ ହୁଅନ୍ତି ତାହାର ଅନେକ ଦୃଷ୍ଟାନ୍ତ ପୂର୍ବରୁ ଦେଖିବାକୁ ମିଳିଛି। ସାଧାରଣତଃ ସେମାନଙ୍କୁ ଶ୍ରମ ତୁଳନାରେ ପାରିଶ୍ରମିକ ମିଳି ନ ଥାଏ। ଏହାର ପ୍ରତିବାଦ କଲେ ସେମାନେ ପଣବନ୍ଦୀ, ଅଙ୍ଗଚ୍ଛେଦ ଓ ହତ୍ୟାର ଶିକାର ହୋଇଥାନ୍ତି। ତେବେ ଉମେଶ ଓ କୁନୁଙ୍କୁ ହତ୍ୟା ପଛର କାରଣ କ’ଣ ତାହା ଜଣାପଡ଼ି ନ ଥିବାବେଳେ ତା’ର ପର୍ଦ୍ଦାଫାଶ୍ କରିବାକୁ ପରିବାର ଲୋକେ ଦାବି କରିଛନ୍ତି।
ମିଳିଥିବା ସୂଚନା ଅନୁଯାୟୀ, ରେଳଧାରଣା କଡ଼ରୁ ଦୁହିଁଙ୍କ ମୃତଦେହ ମିଳିଥିବା ଶନିବାର ସକାଳେ ଉମେଶଙ୍କ ସମ୍ପର୍କୀୟ ଭଉଣୀ ଦ୍ରୌପଦୀଙ୍କୁ ଚେନ୍ନାଇର ଜଣେ ରେଲୱେ ପୋଲିସ ଅଧିକାରୀ ଫୋନ୍କରି ସୂଚନା ଦେବା ସହ ମୃତଦେହର ଫଟୋ ପଠାଇଥିଲେ। ଉମେଶଙ୍କ ମା’ ବାସନ୍ତୀ ପାଣ୍ଡେ କହିଛନ୍ତି, ପ୍ରାୟ ୪ବର୍ଷ ହେବ ଉମେଶ ତାମିଲନାଡୁର ତ୍ରିଶୂରକୁ ଦାଦନ ଖଟିବାକୁ ଯାଉଥିଲେ। ପ୍ରାୟ ଦେଢ଼ ମାସ ତଳେ ସେ ଘରକୁ ଫେରିଥିଲେ। ଚଳିତ ବର୍ଷ ଉମେଶଙ୍କ ବାହାଘର ପାଇଁ ଝିଅ ଦେଖିଥିଲେ। ବିବାହ ସ୍ଥିର ହେବା ପରେ କିଛି ଟଙ୍କା ଉପାର୍ଜନ କରିବା କଥା କହି ଗତ ୧ ତାରିଖ ରାତିରେ ଘର ପାଖ କୁନୁ ବନ୍ଛୋରଙ୍କ ସହ ସେ ଚେନ୍ନାଇ ଅଭିମୁଖେ ଯାଇଥିଲେ। ଗତ ୩ ତାରିଖ ଉଭୟେ ଚେନ୍ନାଇରେ ପହଞ୍ଚତ୍ଥିବା ଉମେଶ ତାଙ୍କ ଭଉଣୀ ଜ୍ୟୋତ୍ସ୍ନାଙ୍କୁ ଜଣାଇଥିଲେ ବୋଲି ବାସନ୍ତୀ କହିଛନ୍ତି। ଉମେଶଙ୍କ ବାପା ଗୁହାଲୁ ପାଣ୍ଡେ ଜଣେ ଦିନ ମଜୁରିଆ। ମା’ ବାସନ୍ତୀ ବିଭିନ୍ନ ଲୋକଙ୍କ ଘରେ କାମ କରନ୍ତି। ଗୁହାଲୁଙ୍କ ଜଣେ ଝିଅ ଜ୍ୟୋତ୍ସ୍ନା ଓ ୨ ପୁଅ ଉମେଶ ଓ ବନମାଳୀ। ଜ୍ୟୋତ୍ସ୍ନା ବିବାହ କରିସାରିଛନ୍ତି। ଉମେଶଙ୍କ ରୋଜଗାରରେ ସରକାରୀ ଜାଗାରେ ଘର ଖଣ୍ଡେ କରି ରହୁଥିଲେ। ଏବେ ରୋଜଗାରିଆ ପୁଅକୁ ହରାଇ ଏହି ପରିବାର ସମ୍ପୂର୍ଣ୍ଣ ଭାଙ୍ଗି ପଡ଼ିଛନ୍ତି। ଅନ୍ୟପକ୍ଷରେ କୁନୁ ପ୍ରଥମକରି ଉମେଶଙ୍କ ସାଙ୍ଗରେ ଚେନ୍ନାଇ ଦାଦନ ଖଟିବାକୁ ଯାଇଥିଲେ। ତାଙ୍କ ବାପା ଶତ୍ରୁଘ୍ନ ବନ୍ଛୋର ଜଣେ ଦିନ ମଜୁରିଆ। ମା’ ଗୋଲାପୀ ବିଭିନ୍ନ ଲୋକଙ୍କ ଘର କାମ କରି ପରିବାର ଚଳାନ୍ତି। ତାଙ୍କର ୩ ପୁଅ। ସେମାନଙ୍କ ମଧ୍ୟରେ କୁନୁ ବଡ଼। ସେ ଛେଳି ଚରାଉଥିଲେ। ଛେଳି ବିକି ଚେନ୍ନାଇ ଯାଇଥିବା ପରିବାର ଲୋକେ କହିଛନ୍ତି। ତାଙ୍କ ରୋଜଗାରିଆ ପୁଅର ମୃତ୍ୟୁ ଖବରରେ ଏହି ପରିବାର ମଧ୍ୟ ଭାଙ୍ଗିପଡିଛନ୍ତି। ୨ ଯୁବ ଦାଦନ ଶ୍ରମିକଙ୍କ ମୃତ୍ୟୁ ଖବର ପାଇବା ପରେ ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ ପୀଡ଼ିତ ପରିବାରକୁ ଭେଟି ସମବେଦନା ଜଣାଇବା ସହ କିଛି ଆର୍ଥିକ ସହାୟତା ଦେଇଛନ୍ତି। ଏହି ୨ ପରିବାରରୁ ୪ ଜଣ ବ୍ୟକ୍ତି ସେମାନଙ୍କ ଉଦ୍ୟମରେ ମୃତଦେହ ଆଣିବାକୁ ଚେନ୍ନାଇ ଅଭିମୁଖେ ଯାଇଛନ୍ତି। ଜିଲା ଶ୍ରମ ବିଭାଗ ଏବଂ ଜିଲା ପ୍ରଶାସନର କୌଣସି ଅଧିକାରୀ ପୀଡ଼ିତ ପରିବାର ପାଖରେ ପହଞ୍ଚତ୍ ନ ଥିବା ଜଣାପଡ଼ିଛି। ଜିଲା ଶ୍ରମ ଅଧିକାରୀ ସୁକାନ୍ତ କୁମାର ସେଠୀଙ୍କୁ ଘଟଣା ସମ୍ପର୍କରେ ପଚାରିବାରୁ ତାଙ୍କ ପାଖରେ କୌଣସି ସୂଚନା ନ ଥିବା ଜଣାଇ ତଥ୍ୟ ସଂଗ୍ରହ କରାଯାଉଛି ବୋଲି କହିଛନ୍ତି। କେଉଁ ପରିସ୍ଥିତିରେ ୨ ଯୁବ ଦାଦନ ଶ୍ରମିକଙ୍କ ମୃତ୍ୟୁ ଘଟିଲା ଏବଂ ସେମାନଙ୍କ ମୃତଦେହ ରେଳଧାରଣା କଡ଼ରେ କିପରି ପଡ଼ିଲା ସେନେଇ ସ୍ପଷ୍ଟ ହୋଇନାହିଁ। ବଲାଙ୍ଗୀର ଟାଉନ ଥାନା ଅଧିକାରୀ ଅବନୀ ସାହୁ ପୀଡ଼ିତ ପରିବାର ପାଖକୁ ଯାଇ ତଥ୍ୟ ସଂଗ୍ରହ କରିବା ସହ ଚେନ୍ନାଇ ପୋଲିସ ସହିତ ଯୋଗାଯୋଗ କରାଯାଉଛି ବୋଲି କହିଛନ୍ତି। ଅନ୍ୟ ଏକ ସୂତ୍ରରୁ ମିଳିଥିବା ସୂଚନା ମୁତାବକ ପେରାମ୍ବୁର ଷ୍ଟେଶନ ନିକଟରୁ ୨ ଯୁବକଙ୍କ ମୃତଦେହ ମିଳିବା ପରେ ନିକଟସ୍ଥ ଏକ ହସ୍ପିଟାଲ ଶବାଗାରରେ ରଖାଯାଇଛି। ପରିବାର ଲୋକେ ପହଞ୍ଚତ୍ଲେ ବ୍ୟବଚ୍ଛେଦ କରାଯିବ। ମୃତକଙ୍କ ପରିବାର ନିହାତି ଗରିବ ଶ୍ରେଣୀର ହୋଇଥିବାରୁ ମୃତଦେହ କିଭଳି ଘରକୁ ଆଣିବେ ଚିନ୍ତାରେ ପଡ଼ିଛନ୍ତି।
