ବ୍ରହ୍ମପୁର ଅଫିସ,୩୦ା୫: ଗଞ୍ଜାମ ଜିଲା କୁକୁଡ଼ାଖଣ୍ଡି ବ୍ଲକରେ ଏକ ବନ୍ଧକାମ ଟେଣ୍ଡର ଫାଇଲ୍ ପ୍ରୋସେସିଂ ଏବଂ ବନ୍ଧ ନିର୍ମାଣ କାର୍ଯ୍ୟ ଆରମ୍ଭ ପାଇଁ ଏଗ୍ରିମେଣ୍ଟ କରିବାକୁ ୧୦ହଜାର ଟଙ୍କା ଲାଞ୍ଚ ନେଉଥିବା ବେଳେ କ୍ଷୁଦ୍ର ଜଳସେଚନ (ଏମ୍ଆଇ)ବିଭାଗର ୨ଜଣ କନିଷ୍ଠ ଯନ୍ତ୍ରୀ ଓ ଜଣେ ସୁପରଭାଇଜର ଭିଜିଲାନ୍ସ ହାତରେ ଧରାପଡିଛନ୍ତି। ସେମାନେ ହେଲେ ଗଞ୍ଜାମ ବ୍ରହ୍ମପୁର ଡିଭିଜନ୍-୧ର କନିଷ୍ଠ ଯନ୍ତ୍ରୀ ପ୍ରସନ୍ନ କୁମାର ପାଢ଼ୀ, କୁକୁଡ଼ାଖଣ୍ଡି ବ୍ଲକ ଦାୟିତ୍ୱରେ ଥିବା କନିଷ୍ଠଯନ୍ତ୍ରୀ ତଥା ଏଷ୍ଟିମେଟର ଧୀରେନ୍ଦ୍ର କୁମାର ପଣ୍ଡା ଓ ସୁପରଭାଇଜର ଅଜୟ ପାତ୍ର। ୩ ଅଭିଯୁକ୍ତଙ୍କୁ ଭିଜିଲାନ୍ସ ଟିମ ସୋମବାର ବ୍ରହ୍ମପୁର କାର୍ଯ୍ୟାଳୟରୁ ଗିରଫ କରିଛି।
କୁକୁଡ଼ାଖଣ୍ଡି ବ୍ଲକ ମନୋହରାରେ ବଡ଼ବନ୍ଧ(ପୋଖରୀ)ର ଉନ୍ନତୀମୂଳକ କାର୍ଯ୍ୟ କରିବାକୁ ଦିଗପହଣ୍ଡିର ଜଣେ ଠିକାଦାର ଟେଣ୍ଡର ନେଇଥିଲେ। ସେ ଏହି କାମର ଫାଇଲ୍ ପ୍ରୋସେସିଂ ସହ ଏଗ୍ରିମେଣ୍ଟ କରିବାକୁ ବ୍ରହ୍ମପୁର କ୍ଷୁଦ୍ର ଜଳସେଚନ ବିଭାଗକୁ ଆସିଥିଲେ। ତେବେ ସୁପରଭାଇଜରଙ୍କ ସହ କନିଷ୍ଠ ଯନ୍ତ୍ରୀଦ୍ୱୟ ତାଙ୍କୁ ଏଥିପାଇଁ ଲାଞ୍ଚ ମାଗିଥିଲେ। ପ୍ରଥମେ ସୁପରଭାଇଜର ଅଜୟଙ୍କ ଆକାଉଣ୍ଟକୁ ଠିକାଦାର ଜଣକ ୧୪ହଜାର ଟଙ୍କା ପଠାଇଥିଲେ। ଆଉ ୧୦ହଜାର ଟଙ୍କା ଦେଲେ କାମ ହେବ ବୋଲି ସେ ଠିକାଦାରଙ୍କୁ କହିଥିଲେ। ଏ ସମ୍ପର୍କରେ ଠିକାଦାର ଜଣକ ଭିଜିଲାନ୍ସ କାର୍ଯ୍ୟାଳୟରେ ଅଭିଯୋଗ କରିଥିଲେ। ସୋମବାର ଯୋଜନା ମୁତାବକ ଠିକାଦାର ବ୍ରହ୍ମପୁର ଏମ୍ଆଇ କାର୍ଯ୍ୟାଳୟକୁ ଲାଞ୍ଚ ଟଙ୍କା ନେଇ ଯାଇଥିଲେ। କନିଷ୍ଠ ଯନ୍ତ୍ରୀ ପାଢ଼ୀଙ୍କୁ ସେ ଦେଖା କରିଥିଲେ। ପାଢ଼ୀ ତାଙ୍କ ନିକଟରେ ବ୍ଳକ ଦାୟିତ୍ୱରେ ଥିତ୍ବା ଯନ୍ତ୍ରୀ ଧୀରେନ୍ଦ୍ର ପଣ୍ଡାଙ୍କୁ ଟଙ୍କା ଦେବାକୁ କହିଥିଲେ। ଠିକାଦାର ୧୦ହଜାର ଟଙ୍କା ନେଇ ଧୀରେନ୍ଦ୍ରଙ୍କୁ ଦେଇଥିଲେ। ସେଠାରେ ପୂର୍ବରୁ ଛକି ରହିଥିବା ଭିଜିଲାନ୍ସ ଟିମ୍ ଚଢାଉ କରି ଟଙ୍କା ନେଇଥିବା ୩ ଅଭିଯୁକ୍ତଙ୍କୁ କାବୁ କରିଥିଲା। ସେମାନଙ୍କ ଠାରୁ କେମିକାଲ ବୋଳା ଟଙ୍କା ଜବତ କରାଯାଇଛି। ଏଥିସହ ଗିରଫ ୩ ଅଭିଯୁକ୍ତଙ୍କ ବ୍ରହ୍ମପୁରର ବିଭିନ୍ନ ସ୍ଥାନରେ ଥିବା ଘରେ ଭିଜିଲାନ୍ସ ଟିମ ଚଢ଼ାଉ ଜାରି ରଖିଛି।
