କୋରାପୁଟ/ନନ୍ଦପୁର,୨୯ା୩ (ସ୍ବ.ପ୍ର): ଘର ଲିପାପୋଛା ପାଇଁ ଆବଶ୍ୟକ ମାଟି ସଂଗ୍ରହ କରୁଥିବା ୪ ମହିଳାଙ୍କ ଉପରେ ଅତଡ଼ା ଧସିଯାଇଛି। ଏଥିରେ ୨ଜଣଙ୍କ ମୃତ୍ୟୁ ଘଟିଥିବାବେଳେ ୨ଜଣ ଗୁରୁତର ହୋଇଛନ୍ତି। କୋରାପୁଟ ଜିଲା ନନ୍ଦପୁର ଥାନା ହିକମପୁଟ ନିକଟ ଲେଞ୍ଜିପୁଟ ନାଳ ନିକଟରେ ଏହି ଅଘଟଣ ଘଟିଛି। ମୃତକମାନେ ହେଲେ ଦଇମତି ହନ୍ତାଳ ଓ ଶଶି ହନ୍ତାଳ। ଆହତ ମୁକ୍ତା କିରିସାନି ଓ ଜ୍ୟୋତି ବଡ଼ନାୟକଙ୍କୁ କୋରାପୁଟ ଶହୀଦ ଲକ୍ଷ୍ମଣ ନାୟକ ମେଡିକାଲରେ ଚିକିତ୍ସା କରାଯାଉଛି। ମୃତାହତ ମହିଳାଙ୍କ ଘର ଘଟଣାସ୍ଥଳ ନିକଟ ଘାଗଡ଼ାପଣ୍ଡି ଗାଁରେ।
ଖବରରୁ ଜଣାପଡିଛି, ମାଟି ଖୋଳୁଥିବା ବେଳେ ହଠାତ୍ ମାଟି ଅତଡା ଧସିବାରୁ ଶଶି ଓ ଦଇମତି ମାଟି ଭିତରେ ପୋତି ହୋଇ ଯାଇଥିଲେ। ଗୁରୁତର ହୋଇଥିବା ମୁକ୍ତା ଓ ଜ୍ୟୋତି ପାଟି କରିଥିଲେ। ସେମାନଙ୍କ ପାଟି ଶୁଣି ଆଖପାଖରେ ଥିବା ଲୋକେ ଘଟଣାସ୍ଥଳକୁ ଦୌଡ଼ି ଆସି ମାଟି ଭିତରୁ ଉଭୟଙ୍କୁ ବାହାର କରିଥିଲେ। ସେତେବେଳକୁ ଶଶି ଓ ଦଇମତୀଙ୍କ ମୃତ୍ୟୁ ହୋଇସାରିଥିଲା। ଖବର ପାଇ ନନ୍ଦପୁର ଅଗ୍ନିଶମ ବାହିନୀ କର୍ମଚାରୀ ଘଟଣାସ୍ଥଳରେ ପହଞ୍ଚତ୍ ମୃତକ ଓ ଗୁରୁତରଙ୍କୁ ଉଦ୍ଧାରକରି ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ମୁକ୍ତା ଓ ଜ୍ୟୋତିଙ୍କୁ କୋରାପୁଟ ସ୍ଥାନାନ୍ତର କରାଯାଇଛି। ପୋଲିସ ପହଞ୍ଚତ୍ ମୃତଦେହ ଜବତକରି ବ୍ୟବଚ୍ଛେଦ ଲାଗି ପଠାଇଛି। ଅନ୍ୟପକ୍ଷରେ ଖବର ପାଇ ନନ୍ଦପୁର ଅତିରିକ୍ତ ତହସିଲଦାର ସୀମାଞ୍ଚଳ ପାତ୍ର, ଆରଆଇ ପାଣ୍ଡେଈ ମହାନ୍ତି, ବିଡିଓ ସୁଜିତ କୁମାର ମିଶ୍ର, ଜିପିଓ ବେଦାନ୍ତ ମାଝୀ, ଏସ୍ଡିପିଓ ସଞ୍ଜୟ ମହାପାତ୍ର,ନନ୍ଦପୁର ଥାନାଧିକାରୀ ପ୍ରଫୁଲ୍ଲ ଲାକ୍ରା ପ୍ରମୁଖ ଘଟଣାସ୍ଥଳ ପରିଦର୍ଶନ କରିଛନ୍ତି। ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସରରେ ମୃତକଙ୍କ ପରିବାରକୁ ଭେଟି ଦଇମତିଙ୍କ ସ୍ବାମୀ ଆଦୁ କନ୍ତେରି ଓ ଶଶୀଙ୍କ ଭାଇଙ୍କୁ ରେଡକ୍ରସ ତରଫରୁ ୧୦ ହଜାର ଲେଖାଏ ଏବଂ ହରିଶ୍ଚନ୍ଦ୍ର ଯୋଜନାରେ ୩ହଜାର ଲେଖାଏ ସହାୟୟତା ପ୍ରଦାନ କରାଯାଇଛି। ନନ୍ଦପୁର ଥାନାରେ ଦୁଇ ପରିବାରର ଏତଲାକ୍ରମେ ୨ଟି ଅପମୃତ୍ୟୁ ମାମଲା ୬/୨୩ ଓ ୭/୨୩ ରୁଜୁ ହୋଇଛି।
