କୋଲକାତା, ୧୬।୮ : ପଶ୍ଚିମବଙ୍ଗର ହାଓ୍ବଡ଼ା ଜିଲାର ଉଲବେଡିୟାରେ ଏକ ଆବର୍ଜନା ଗଦାରୁ ୧୭ ମାନବ ଭ୍ରୁଣ ଉଦ୍ଧାର କରାଯାଇଛି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ଗଣମାଧ୍ୟମ ରିପୋର୍ଟ ଅନୁସାରେ ଉଲବେଡିୟା ଓ୍ବାର୍ଡ ନମ୍ବର ୩୧ର ବନିତଲ୍ଲା ଖାନପାଡାରେ ଡ୍ରପିଂ ଗ୍ରାଉଣ୍ଡରେ ଏସବୁ ଭ୍ରୁଣ ପଡ଼ିଥିଲା। ଆବର୍ଜନା ଉଠାଇବାକୁ ନଗରପାଳିକା କର୍ମଚାରୀ ସେଠାକୁ ଯାଇଥିଲେ। ସେମାନେ ସେଠାରେ ଭ୍ରୁଣ ଗୁଡ଼ିକ ଏକ ପ୍ଲାଷ୍ଟିକ ବ୍ୟାଗରେ ବନ୍ଧା ଯାଇଥିବା ଦେଖିଥିଲେ। ସ୍ଥାନୀୟ ଲୋକେ ଏନେଇ ପୋଲିସକୁ ଖବର ଦେଇଥିଲେ।
ଭ୍ରୁଣଗୁଡ଼ିକ ମଧ୍ୟରେ ୧୦ଟି ଶିଶୁକନ୍ୟାଙ୍କର ଥିବାବେଳେ ୭ଟି ଶିଶୁପୁତ୍ରଙ୍କର ବୋଲି ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଛି। ଗର୍ଭପାତ ପରେ ଏସବୁକୁ ଫିଙ୍ଗି ଦିଆଯାଇଥିବା ପୋଲିସ ଅନୁମାନ କରୁଛି। ଏନେଇ ଅଧିକ ତଦନ୍ତ ଜାରି ରହିଛି।
