ନୂଆଦିଲ୍ଲୀ,୩।୭: ଭାରତୀୟ ପାଣିପାଗ ବିଭାଗ (IMD) ଅନୁସାରେ, ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେଉଛି। ଉତ୍ତର ଓଡ଼ିଶା ଉପକୂଳ ନିକଟରେ ଏକ ଘୂର୍ଣ୍ଣିବଳୟ ସକ୍ରିୟ ରହିଛି। ଦକ୍ଷିଣ ଗୁଜରାଟରୁ କର୍ଣ୍ଣାଟକ ପର୍ଯ୍ୟନ୍ତ ଅଫ୍-ସୋର୍ ଟ୍ରଫ୍ ଏବଂ ପଶ୍ଚିମା ଝଡ଼ ମିଶି ମୌସୁମୀ ଟ୍ରଫ୍କୁ ଅଧିକ ଶକ୍ତିଶାଳୀ କରୁଛନ୍ତି। ଆସନ୍ତା ୨-୩ ଦିନ ମଧ୍ୟରେ ଏହି ସିଷ୍ଟମ୍ ଆହୁରି ମଜଭୁତ ହେବ, ଯାହାଫଳରେ ଉତ୍ତର ଏବଂ ପୂର୍ବ ଭାରତରେ ବଜ୍ରପାତ ଓ ଝଡ଼ ପବନ ସହ ବର୍ଷାର ପରିମାଣ ଆହୁରି ବଢ଼ିଯିବ।
IMD ଅନୁସାରେ, ଆଜି ରାତି ସୁଦ୍ଧା ଦିଲ୍ଲୀ, ଉତ୍ତର ପ୍ରଦେଶ, ବିହାର, ଝାଡ଼ଖଣ୍ଡ, ପଶ୍ଚିମବଙ୍ଗ, ରାଜସ୍ଥାନ, ମଧ୍ୟପ୍ରଦେଶ, ମହାରାଷ୍ଟ୍ର, ପଞ୍ଜାବ, ଉତ୍ତରାଖଣ୍ଡ, ହିମାଚଳ ପ୍ରଦେଶ ଏବଂ ଜମ୍ମୁ-କାଶ୍ମୀର ସମେତ ୧୬ଟି ରାଜ୍ୟରେ ବର୍ଷା ପାଇଁ ଆଲର୍ଟ ଜାରି କରାଯାଇଛି। ଘଡ଼ଘଡ଼ି ସହ କେଉଁଠି ହାଲୁକା ତ ଆଉ କେଉଁଠି ପ୍ରବଳ ବର୍ଷା ହୋଇପାରେ। ଏହି ସମୟରେ ଘଣ୍ଟାପ୍ରତି ୮୦ ରୁ ୮୫ କିଲୋମିଟର ବେଗରେ ପବନ ବହିବାର ଅନୁମାନ କରାଯାଇଛି। କେତେକ ସ୍ଥାନରେ ବଜ୍ରପାତ ନେଇ ମଧ୍ୟ ଚେତାବନୀ ଦିଆଯାଇଛି।
IMD ଅନୁସାରେ, ଦିଲ୍ଲୀ-ଏନସିଆରରେ ମୌସୁମୀ ସମ୍ପୂର୍ଣ୍ଣ ଭାବେ ସକ୍ରିୟ ହୋଇଯାଇଛି। ଆଜି ୩ ଜୁଲାଇରେ ରାଜଧାନୀରେ ପ୍ରବଳ ବର୍ଷା ଏବଂ ଝଡ଼ତୋଫାନର ଆଲର୍ଟ ରହିଛି। ଘଣ୍ଟାପ୍ରତି ୭୦ କିଲୋମିଟର ବେଗରେ ପବନ ବହିପାରେ। ଆସନ୍ତାକାଲି ୪ ଜୁଲାଇରେ ଛତିଶଗଡ଼, ତେଲେଙ୍ଗାନା, ଓଡ଼ିଶା, କେରଳ, ଗୋଆ, ତାମିଲନାଡୁ, ଅରୁଣାଚଳ ପ୍ରଦେଶ, ଆସାମ, ମେଘାଳୟ, ପଶ୍ଚିମବଙ୍ଗ ଏବଂ ସିକିମରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ବିହାର, ମଧ୍ୟପ୍ରଦେଶ, ଓଡ଼ିଶା, ରାଜସ୍ଥାନ ଏବଂ ତାମିଲନାଡୁ ସମେତ ଅନେକ ରାଜ୍ୟରେ ଘଣ୍ଟାପ୍ରତି ୫୦ ରୁ ୬୦ କିଲୋମିଟର ବେଗରେ ପବନ ବହିପାରେ।
ପରଦିନ ୫ ଜୁଲାଇରେ ଆନ୍ଧ୍ରପ୍ରଦେଶ, ଝାଡ଼ଖଣ୍ଡ ଏବଂ ଓଡ଼ିଶାରେ ମଧ୍ୟ ପ୍ରବଳ ବର୍ଷା ପାଇଁ ଚେତାବନୀ ଦିଆଯାଇଛି। ଆସାମ, ମେଘାଳୟ, ପଶ୍ଚିମବଙ୍ଗ, ସିକିମ, ଗୋଆ, ତେଲେଙ୍ଗାନା ଏବଂ କର୍ଣ୍ଣାଟକର କେତେକ ଅଞ୍ଚଳରେ ପ୍ରବଳ ବର୍ଷା ହୋଇପାରେ।
