ନୂଆଦିଲ୍ଲୀ,୩।୧୨ : କିଶୋର ବୟସ ସମ୍ପର୍କରେ ସୁପ୍ରିମ୍କୋର୍ଟର ପୂର୍ବତନ ବିଚାରପତି ମଦନ ବି, ଲୋକୁର କହିଛନ୍ତି ଯେ, ୧୬-୧୮ ବର୍ଷ ବୟସ୍କ ସେମାନଙ୍କ ଅନ୍ତରଙ୍ଗ ସମ୍ପର୍କରେ କ’ଣ କରୁଛନ୍ତି ତାହା ଭଲ ଭାବେ ଜାଣନ୍ତି। ଏହାର ଫଳଫଳା ନେଇ ମଧ୍ୟ ସେମାନଙ୍କୁ ଜଣା। ଏଭଳି କ୍ଷେତ୍ରରେ ଜୁଭେନାଇଲ ଜଷ୍ଟିସ ଆକ୍ଟରେ ଏକ ସ୍ବତନ୍ତ୍ର ଧାରା ରହିଥିବାବେଳେ ପୋକ୍ସୋ କ୍ଷେତ୍ରରେ କାହିଁକି ସମାନ ଧାରା ଲାଗୁ କରାଯାଉ ନାହିଁ। ଏହା ଦ୍ୱାରା ପୋକ୍ସୋ ମାମଲା କ୍ଷେତ୍ରରେ କେତେକ ସମସ୍ୟା ଉପୁଜିବା ସହିତ ବିଚାରରେ ମନ୍ଥର ସ୍ଥିତି ସୃଷ୍ଟି ହେଉଛି। ଦିଲ୍ଲୀ କମିଶନ ଫର୍ ପ୍ରୋଟେକଶନ ଅଫ୍ ଚାଇଲ୍ଡ ରାଇଟ୍ସ କାର୍ଯ୍ୟକ୍ରମରେ ଯୋଗଦେଇ ସେ ଏଭଳି କହିଛନ୍ତି।
କିଶୋର ବୟସରେ ଯୁବକ ଯୁବତୀମାନଙ୍କ ଅନ୍ତରଙ୍ଗ ସମ୍ପର୍କ କ୍ଷେତ୍ରରେ ସେମାନଙ୍କର ବିଚାର ପ୍ରଚଳିତ ଆଇନ ଅନୁସାରେ କରାଯାଉଛି। ଏହା କେତେଦୂର ଯୁକ୍ତିଯୁକ୍ତ ବୋଲି ସେ ପ୍ରଶ୍ନ କରିଛନ୍ତି। ଯେତେବେଳେ ଦେଶରେ ସମଲିଙ୍ଗୀ ସମ୍ପର୍କକୁ ଅପରାଧ ଭାବେ ପରିଗଣିତ କରାଯାଉ ନାହିଁ ସେତେବେଳେ କିଶୋର ବୟସରେ ଯୁବକ ଯୁବତୀମାନଙ୍କ ଅନ୍ତରଙ୍ଗ ସମ୍ପର୍କ ଆଇନ ଆଖିରେ ଅପରାଧ କାହିଁକି ବୋଲି ସେ ପ୍ରଶ୍ନ କରିଛନ୍ତି।
ପୋକ୍ସୋ ମାମଲାରେ ନ୍ୟାୟ, ବିଚାର, ନ୍ୟାୟିକ ପ୍ରକ୍ରିୟା ଏବଂ ବିଚାରାଧୀନ ମାମଲା ପଡ଼ି ରହିବା ନେଇ ସେ ଉଦ୍ବେଗ ପ୍ରକାଶ କରିଛନ୍ତି। ପୋକ୍ସୋ ମାମଲା କ୍ଷେତ୍ରରେ ସ୍ବତନ୍ତ୍ର କୋର୍ଟ ସ୍ଥାପନ ପରେ ଏବେ ଫାଷ୍ଟ ଟ୍ରାକ୍ କୋର୍ଟ ଏବଂ ସ୍ପତନ୍ତ୍ର ଫାଷ୍ଟ ଟ୍ରାକ୍ କୋର୍ଟର ଆବଶ୍ୟକତା ଦେଖାଦେଇଛି। ସେହିପରି ପୀଡ଼ିତା ଅବା ପୀଡ଼ିତଙ୍କ କ୍ଷେତ୍ରରେ କ୍ଷତିପୂରଣ ପ୍ରଦାନ ନେଇ ସେ କହିଛନ୍ତି ଯେ, ୫ ଲକ୍ଷ ଅବା ୧୦ ଲକ୍ଷ ଟଙ୍କା ପ୍ରଦାନ କରିବା ଦ୍ୱାରା ସମସ୍ୟାର ସମାଧାନ ହୋଇଗଲା ଭାବିବା ଠିକ ନୁହେଁ। ସେହିପରି କ୍ଷତିପୂରଣ ଏକା ସମୟରେ ନ ମିଳି ବର୍ଷ ପରେ ବର୍ଷ ବିତି ଯାଉଥିବାରୁ କୌଣସି ସୁଫଳ ମିଳୁ ନଥିବା ସେ କହିଛନ୍ତି।
