କରୋନା ସଂକ୍ରମଣକୁ ନେଇ ସମଗ୍ର ବିଶ୍ୱ ଏବେ ଚିନ୍ତାରେ। ସଂକ୍ରମଣକୁ ରୋକିବା ପାଇଁ ସବୁଆଡେ ଲକ୍ଡାଉନ୍ ଜାରି କରାଯାଇଛି। ଏହି ସମୟରେ ଛୋଟ ପିଲାମାନେ ଘରେ ବସି ବସି ମୋବାଇଲ ଫୋନ୍ ଏବଂ କମ୍ପ୍ୟୁଟରରେ ଗେମ୍ ଖେଳିବାରେ ଅଧିକ ସମୟ ବିତାଉଛନ୍ତି। ଏହାକୁ ନେଇ ମା’ବାପା ଚିନ୍ତାରେ। ତେବେ ଲକ୍ଡାଉନ୍ରେ ମୋବାଇଲରେ ଭିଡିଓ ଗେମ୍ ଖେଳି ଖେଳି ଜଣେ ବାଳକର ଗୋଟିଏ ହାତ ପାରାଲିସିସ୍ ହୋଇଯାଇଛି। ଏହା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ। ଘଟଣାଟି ଘଟିଛି ଦକ୍ଷିଣ ଚାଇନାରେ ରହୁଥିବା ୧୫ ବର୍ଷୀୟ ଜୋବିନ୍ଙ୍କ କ୍ଷେତ୍ରରେ।
ଘରେ ବସି ପାଠ ପଢ଼ିବା ପାଇଁ ମା’ ଜୋବିନ୍ଙ୍କୁ ଏକ ସ୍ମାର୍ଟ ଫୋନ୍ ଦେଇଥିଲେ। ମାତ୍ର ଅନ୍ଲାଇନ୍ କ୍ଲାସ୍ ପରିବର୍ତ୍ତେ ସେ ମୋବାଇଲ୍ରେ ଗେମ୍ ଖେଳିବା ଆରମ୍ଭ କରିଦେଲେ। ପରେ ଏହା ତାଙ୍କର ଅଭ୍ୟାସ ହୋଇଗଲା। ଜୋବିନ୍ ଦିନରେ ୨୨ ଘଣ୍ଟା ଭିଡିଓ ଗେମ୍ ଖେଳୁଥିବା ବେଳେ ମାତ୍ର ୨ ଘଣ୍ଟା ଶୋଉଥିଲେ। ଏଥିପାଇଁ ସେ ଖାଇବା ପିଇବା ମଧ୍ୟ ଛାଡ଼ି ଦେଇଥିଲେ। କେବଳ ସ୍ନାକ୍ସ ଖାଉଥିଲେ। ଥିରେ ଥିରେ ତାଙ୍କ ହାତ ଆଉ କାମ କଲା ନାହିଁ। ଡାକ୍ତରଙ୍କ ପାଖକୁ ନେବାରୁ ପାରାଲିସ ହୋଇଥିବା ଜଣାପଡ଼ିଲା। ପୋଷକତ୍ତ୍ୱ ସାଙ୍ଗକୁ ମସ୍ତିସ୍କରେ ବ୍ଲଡ ଏବଂ ଅକ୍ସିଜେନ୍ ଅଭାବରୁ ଏପରି ଘଟିଥିବା କୁହାଯାଉଛି। ତେବେ ସେ ପୂର୍ବପରି ଠିକ୍ ହୋଇପାରିବେ କି ନାହିଁ ତାହା କହିବା କଷ୍ଟକର ବୋଲି ଡାକ୍ତର କହିଛନ୍ତି।
ଜୋବିନ୍ଙ୍କ ମା’ଙ୍କ କହିବାନୁଯାୟୀ, ସେ ଏବଂ ତାଙ୍କ ସ୍ବାମୀ ସବୁଦିନ ସକାଳୁ ଅଫିସ ପଳାଉଥିଲେ। ସନ୍ଧ୍ୟା ୬ଟାରେ ଘରକୁ ଫେରୁଥିଲେ। ଜୋବିନ୍ ଏକାକି ଘରେ ରହୁଥିଲେ। ଏହି ସମୟରେ ସେ ଭିଡିଓ ଗେମ୍ ଖେଳିବା ଆରମ୍ଭ କରିଥିଲେ। ରାତିସାରା ଅନିଦ୍ରା ରହି ସେ ଗେମ୍ ଖେଳୁଥିଲେ। ପଚାରିବାରୁ ସେ ପାଠ ପଢ଼ୁଥିବା କହୁଥିଲେ।
