ଚେନ୍ନାଇ,୨୮ା୯: ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ନିଜର ଏକ ନିର୍ବାଚନୀ ପ୍ରତିଶ୍ରୁତି ପୂରଣ କରି ନବଜାତ ଶିଶୁଙ୍କ ପାଇଁ ‘ଥାଇମାମନ୍ ଥଙ୍ଗା ମୋଥିରମ୍ ଥିଟ୍ଟମ୍’(Thaimaman Thanga Mothiram Thittam) ଯୋଜନା ଆରମ୍ଭ କରିଛନ୍ତି । ଏହାର ଅର୍ଥ ‘ମାମୁଁଙ୍କ ପକ୍ଷରୁ ସୁନା ମୁଦି’ । ମଦୁରାଇର ସରକାରୀ ରାଜାଜୀ ହସ୍ପିଟାଲରେ ସୋମବାର ଏହି ଯୋଜନାର ଶୁଭାରମ୍ଭ କରାଯାଇଛି ।ଯୋଜନାର ଶୁଭାରମ୍ଭ ସମୟରେ ମୁଖ୍ୟମନ୍ତ୍ରୀ ବିଜୟ ନବଜାତ ଶିଶୁମାନଙ୍କୁ କୋଳରେ ଧରିଥିଲେ । ଯୋଗ୍ୟ ନବଜାତ ଶିଶୁଙ୍କୁ ୨୨ କ୍ୟାରେଟ୍ର ୧ ଗ୍ରାମ୍ ଓଜନର ସୁନା ମୁଦି ବଣ୍ଟନ କରାଯାଇଛି।
ଏହି ଯୋଜନା ପାଇଁ ତାମିଲନାଡୁ ସରକାର ୭୫୫.୮୩ କୋଟି ଟଙ୍କାର ବଜେଟ୍ ବ୍ୟବସ୍ଥା କରିଛନ୍ତି । ସରକାରୀ ହସ୍ପିଟାଲରେ ଜନ୍ମ ନେଉଥିବା ଯୋଗ୍ୟ ନବଜାତ ଶିଶୁଙ୍କୁ ୧ ଗ୍ରାମ୍ର ସୁନା ମୁଦି ପ୍ରଦାନ କରାଯିବ । ସରକାରଙ୍କ ଅନୁସାରେ, ଏହି ଯୋଜନାର ଲକ୍ଷ୍ୟ ମାତୃତ୍ୱକୁ ସମ୍ମାନ ଦେବା ସହ ମହିଳାଙ୍କ ସ୍ୱାସ୍ଥ୍ୟକୁ ପ୍ରୋତ୍ସାହନ ଦେବା ଏବଂ ଅଧିକ ପରିବାରକୁ ସରକାରୀ ସ୍ୱାସ୍ଥ୍ୟସେବା ସହ ଯୋଡ଼ିବା।
ଯୋଜନା ମାଧ୍ୟମରେ ସରକାରୀ ହସ୍ପିଟାଲରେ ପ୍ରସବ ବା ସଂସ୍ଥାଗତ ପ୍ରସବକୁ ଅଧିକ ପ୍ରୋତ୍ସାହନ ଦେବାକୁ ସରକାର ଲକ୍ଷ୍ୟ ରଖିଛନ୍ତି । ଏହାର ଲାଭ କେବଳ ତାମିଲନାଡୁର ସ୍ଥାୟୀ ବାସିନ୍ଦାଙ୍କୁ ମିଳିବ। ଏଥିପାଇଁ ମା’ଙ୍କ ନାମ ରାଜ୍ୟର ଗର୍ଭଧାରଣ ଓ ଶିଶୁ ନିରୀକ୍ଷଣ ବ୍ୟବସ୍ଥାରେ ପଞ୍ଜୀକୃତ ହୋଇଥିବା ଆବଶ୍ୟକ। ସରକାରୀ ତଥ୍ୟ ଅନୁସାରେ, ତାମିଲନାଡୁରେ ପ୍ରତିବର୍ଷ ପ୍ରାୟ ୭.୮ ଲକ୍ଷ ଶିଶୁ ଜନ୍ମ ନିଅନ୍ତି। ସେଥିରୁ ପ୍ରାୟ ୪.୨ ଲକ୍ଷ, ଅର୍ଥାତ୍ ୫୩ ପ୍ରତିଶତ ପ୍ରସବ ସରକାରୀ ହସ୍ପିଟାଲରେ ହୋଇଥାଏ।
ଏହି ଯୋଜନାକୁ ପ୍ରଥମେ ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ସି.ଏନ୍. ଅନ୍ନାଦୁରାଇଙ୍କ ଜୟନ୍ତୀ ଅବସରରେ ସେପ୍ଟେମ୍ବର ୧୫ରେ ଆରମ୍ଭ କରିବାର ଯୋଜନା ଥିଲା। ତେବେ ମୁଖ୍ୟମନ୍ତ୍ରୀ ବିଜୟଙ୍କ ଲଣ୍ଡନ ଗସ୍ତ କାରଣରୁ କାର୍ଯ୍ୟକ୍ରମକୁ ଆଗକୁ ଘୁଞ୍ଚାଯାଇଥିଲା। ଏବେ ମଦୁରାଇରେ ଏହାକୁ ଆନୁଷ୍ଠାନିକ ଭାବେ ଲାଗୁ କରାଯାଇଛି। ୨୦୨୬ ତାମିଲନାଡୁ ବିଧାନସଭା ନିର୍ବାଚନ ପୂର୍ବରୁ ଅନ୍ତର୍ଜାତୀୟ ମହିଳା ଦିବସ ଅବସରରେ ମହିଳା ଭୋଟରଙ୍କ ପାଇଁ ବିଜୟ ୧୨ଟି ନିର୍ବାଚନୀ ପ୍ରତିଶ୍ରୁତି ଘୋଷଣା କରିଥିଲେ । ଏଥିରେ ମହିଳା ମୁଖ୍ୟଙ୍କୁ ମାସିକ ଆର୍ଥିକ ସହାୟତା, ମାଗଣା ବସ୍ ଯାତ୍ରା ଏବଂ ବିବାହ ପାଇଁ ସୁନା ସହ ଆର୍ଥିକ ସହାୟତା ଭଳି ପ୍ରସ୍ତାବ ରହିଥିଲା। ନିର୍ବାଚନ ସମୟରେ ବିଜୟ କହିଥିଲେ ଯେ, ତାଙ୍କ TVK ସରକାର ଗଠନ କଲେ ରାଜ୍ୟ ଓ କେନ୍ଦ୍ର ସରକାରୀ କର୍ମଚାରୀଙ୍କ ପରିବାରକୁ ବାଦ୍ ଦେଇ ଅନ୍ୟ ପରିବାରର ମହିଳା ମୁଖ୍ୟଙ୍କୁ ପ୍ରତିମାସ ୨,୫୦୦ ଟଙ୍କା ଦିଆଯିବ।
ମୁଖ୍ୟମନ୍ତ୍ରୀ ହେବା ପରେ ବିଜୟ ‘ଅନ୍ନପୂର୍ଣ୍ଣି ସୁପର ୬’ ଯୋଜନା ମଧ୍ୟ ଆରମ୍ଭ କରିଥିଲେ। ଏହା ଅଧୀନରେ ପରିବାରଗୁଡ଼ିକୁ ପ୍ରତିବର୍ଷ ୬ଟି ମାଗଣା LPG ସିଲିଣ୍ଡର ଦେବାକୁ ଘୋଷଣା କରାଯାଇଥିଲା।ନବଜାତ ଶିଶୁଙ୍କ ପାଇଁ ସୁନା ମୁଦି ଯୋଜନା ଲାଗୁ ହେବା ପରେ ମଦୁରାଇରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମକୁ ନେଇ ବ୍ୟାପକ ସୁରକ୍ଷା ବ୍ୟବସ୍ଥା ମଧ୍ୟ କରାଯାଇଥିଲା।
