ନୂଆଦିଲ୍ଲୀ,୧।୩: ଯୁଦ୍ଧଭୂମି ୟୁକ୍ରେନ୍ରେ ଫସିଥିବା ଭାରତୀୟ ଛାତ୍ରୀଛାତ୍ରଙ୍କ ଉଦ୍ଧାର ଅଭିଯାନ ଜାରି ରଖିଛନ୍ତି ଭାରତ ସରକାର। ବିନା ବିରତିରେ ଭାରତୀୟଙ୍କ ଉଦ୍ଧାର ଚାଲିଛି। ‘ମିଶନ ଗଙ୍ଗା’ ଜରିଆରେ ୬ଟି ବିମାନରେ ପ୍ରାୟ ୧୪୦୦ ଭାରତୀୟ ୟୁକ୍ରେନ ଛାଡ଼ିଥିବା ବହିର୍ବ୍ୟାପାର ସଚିବ ଅରିନ୍ଦମ ବାଗ୍ଚୀ କହିଛନ୍ତି । ୪ଟି ବିମାନ ବୁକାରେଷ୍ଟ ଏବଂ ୨ଟି ବିମାନ ବୁଦାପେଷ୍ଟରୁ ଉଡ଼ାଣ ଭରିଥିଲା। ଭରତ ପକ୍ଷରୁ ପ୍ରଥମ ଆଡଭାଇଜରି ଜାରିହେବା ପରଠାରୁ ବର୍ତ୍ତମାନ ସୁଦ୍ଧା ପ୍ରାୟ ୮ ହଜାର ଭାରତୀୟଙ୍କୁ ମିଶନ ଗଙ୍ଗା ଜରିଆରେ ଭାରତ ଅଣାଯାଇଛି। ଉଦ୍ଧାର କାର୍ଯ୍ୟ ପାଇଁ କେନ୍ଦ୍ର ସରକାର ଆଉ ତିନିଟି ବିମାନ ପ୍ରସ୍ତୁତ ରଖିଥିବା ସରକାରଙ୍କ ପକ୍ଷରୁ କୁହାଯାଇଛି। ଏୟାର ଇଣ୍ଡିଆର ସ୍ବତନ୍ତ୍ର ବିମାନ ଏଥିରେ ସାମିଲ ହୋଇଥିବାବେଳେ ବର୍ତ୍ତମାନ ସ୍ପାଇସ୍ଜେଟ୍ ଏଥିରେ ସାମିଲ ହେବ। କ୍ୱିଭ୍ ଛାଡ଼ି ହଙ୍ଗେରି ରାଜଧାନୀ ବୁଦାପେଷ୍ଟରେ ଅଟକି ରହିଥିବା ଭାରତୀୟଙ୍କ ଉଦ୍ଧାର ଲାଗି ସ୍ପାଇସ୍ଜେଟ୍ ଶୁକବ୍ରାର ନିଜର ସ୍ବତନ୍ତ୍ର ବିମାନ ବୋଇଂ ୭୩୭ ମାକ୍ସ ପଠାଇବ। ରୁଷିଆ ଆକ୍ରମଣ କାରଣରୁ ୟୁକ୍ରେନ ଗତ ୨୪ ତାରିଖରୁ ଦେଶର ସମସ୍ତ ଏୟାରସ୍ପେସ୍ ବନ୍ଦ କରିଥିବାବେଳେ ରୋମାନିଆ ଏବଂ ହଙ୍ଗେରି ଏୟାରସ୍ପେସ୍ରୁ ଭାରତୀୟଙ୍କୁ ଉଦ୍ଧାର କରାଯାଉଛି। ତେବେ କ୍ୱିଭ୍ରେ ଥିବା ଭାରତୀୟ ଦୂତାବାସ ପକ୍ଷରୁ ଭାରତୀୟଙ୍କ ପାଇଁ ସ୍ବତନ୍ତ୍ର ବସ୍ ସୁବିଧା ଯୋଗାଯିବ; ଯାହା ଦ୍ୱାରା ସେମାନେ ସହଜରେ ଗହଳି ସ୍ଥାନରୁ ବାହାରି ବିମାନ ନିକଟରେ ପହଞ୍ଚିପାରିବେ। ସେହିପରି ହଙ୍ଗେରି, ପୋଲାଣ୍ଡ ଏବଂ ରୋମାନିଆ ସୀମାରେ ଛାତ୍ରୀଛାତ୍ରଙ୍କ ପହଞ୍ଚାଇବା ପାଇଁ ସ୍ବତନ୍ତ୍ର ଟ୍ରେନ୍ ବ୍ୟବସ୍ଥା କରାଯିବ ବୋଲି ସୋମବାର ଭାରତୀୟ ଦୂତାବାସ ପକ୍ଷରୁ ଜାରି ଗାଇଡ୍ଲାଇନ୍ରେ କୁହାଯାଇଛି। ଭାରତୀୟଙ୍କୁ ଉଦ୍ଧାର କରିବାରେ ପୋଲାଣ୍ଡ ପକ୍ଷରୁ କରାଯାଉଥିବା ସହଯୋଗ ପାଇଁ ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଟୁଇଟରରେ ଏକ ପୋଷ୍ଟ ସେୟାର କରି ପୋଲାଣ୍ଡକୁ ପ୍ରଶଂସା କରିଛନ୍ତି। ସେହିପରି ଯୁଦ୍ଧ ସମୟର ୟୁକ୍ରେନର ସ୍ଥିତିକୁ ଦୃଷ୍ଟିରେ ରଖି ଭାରତ ପକ୍ଷରୁ ମେଡିକାଲ ସୁବିଧା ଯୋଗାଯିବ ବୋଲି ବାଗଚି କହିଛନ୍ତି।
