ବୌଦ୍ଧ, ୧୬ା୭(ଡି.ଏନ୍.ଏ.): ବୌଦ୍ଧ ଜିଲା ହରଭଙ୍ଗା ବ୍ଲକ ବାଣୀଭୂଷଣପୁର ଗ୍ରାମପଞ୍ଚାୟତ ଡିଗିସିରା ଗ୍ରାମର ୧୪ ଛାତ୍ରୀଛାତ୍ର ଗୁରୁବାର ସ୍କୁଲକୁ ଯାଇ ଘରକୁ ଫେରିପାରି ନ ଥିଲେ। ଅପରାହ୍ନରେ ସ୍କୁଲରୁ ଘରକୁ ଫେରୁଥିବାବେଳେ ଲକ୍ଷ୍ମୀନାଳରେ ଉଛୁଳା ପାଣି ପ୍ରବାହିତ ହେଉଥିବାରୁ ନାଳ ପାରିହୋଇ ନ ପାରି ଅଟକି ଯାଇଥିଲେ। ତେଣୁ ନାଳ ପାର୍ଶ୍ୱରେ ଜାତୀୟ ରାଜପଥ କଡ଼ରେ ଥିବା ଏକ ଗ୍ୟାରେଜରେ ରାତିରେ ରହିବାକୁ ବାଧ୍ୟ ହୋଇଥିଲେ। ଶୁକ୍ରବାର ସକାଳୁ ନାଳରେ ପାଣି କମିବା ପରେ ସେମାନଙ୍କ ସମ୍ପର୍କୀୟ ଗ୍ୟାରେଜକୁ ଆସି ଛାତ୍ରୀଛାତ୍ରଙ୍କୁ କାନ୍ଧରେ ବୋହି ନାଳ ପାରକରି ଘରକୁ ନେଇଥିଲେ।
ହରଭଙ୍ଗା ବ୍ଲକର ହେଡକ୍ୱାର୍ଟର ପଞ୍ଚାୟତ ବାଣୀଭୂଷଣପୁର ହୋଇଥିଲେ ବି ଉକ୍ତ ପଞ୍ଚାୟତର କେତେକ ଗ୍ରାମକୁ ଏବେବି ଠିକ୍ ଭାବେ ରାସ୍ତା ନାହିଁ। ସେଥିମଧ୍ୟରେ ଡିଗିସିରା ଅନ୍ୟତମ। ଗ୍ରାମରେ ପାଖାପାଖି ୧୦୦ରୁ ଅଧିକ ଗରିବ ପରିବାର ବସବାସ କରନ୍ତି। ଗ୍ରାମଟି ଖୋର୍ଦ୍ଧା-ବଲାଙ୍ଗୀର ଜାତୀୟ ରାଜପଥ କଡ଼ରେ ଥିଲେ ମଧ୍ୟ ଗାଁକୁ ଯିବାକୁ ହେଲେ ଲକ୍ଷ୍ମୀନାଳ ପାରହେବାକୁ ପଡ଼ିଥାଏ। ଗ୍ରାମବାସୀ ନାଳ ପାରି ହେବା ପରେ ହିଁ ଦୈନନ୍ଦିନ ସାମଗ୍ରୀ କିଣିବା ପାଇଁ ବଜାରକୁ ଯାଆନ୍ତି। ପିଲାମାନେ ମଧ୍ୟ ପାଠପଢିବାକୁ ବାହାରକୁ ଯାଇଥାନ୍ତି। ଗ୍ରାମରେ କୌଣସି ବିଦ୍ୟାଳୟ ନ ଥିବାରୁ ପିଲାମାନେ ନିକଟସ୍ଥ ଯାଜପୁରଠାରେ ଥିବା ପଞ୍ଚମ ଶ୍ରେଣୀ ପର୍ଯ୍ୟନ୍ତ ସ୍କୁଲକୁ ଜଙ୍ଗଲ ରାସ୍ତାରେ ଯାଇ ପାଠ ପଢୁଥିବାବେଳେ ଉଚ୍ଚ ଶିକ୍ଷା ପାଇଁ ପୁରୁଣାକଟକ କିମ୍ବା ଚାରିଛକ ଉପରେ ନିର୍ଭର କରିଥାନ୍ତି। ପୁରୁଣାକଟକ କିମ୍ବା ଚାରିଛକ ଆସିବାକୁ ହେଲେ ଉକ୍ତ ନାଳ ପାର ହେବାକୁ ପଡ଼ିଥାଏ। ସବୁଦିନ ପରି ଗୁରୁବାର ଗ୍ରାମର ୧୪ ଛାତ୍ରୀଛାତ୍ର ପୁରୁଣାକଟକକୁ ପାଠ ପଢିବାକୁ ଆସିଥିଲେ। କିନ୍ତୁ ବିଦ୍ୟାଳୟ ଛୁଟି ପରେ ଘରକୁ ଫେରିବା ସମୟରେ ବର୍ଷା ଯୋଗୁ ଲକ୍ଷ୍ମୀନାଳରେ ଉଛୁଳା ପାଣି ପ୍ରବାହିତ ହୋଇଥିଲା। ତେଣୁ ଛାତ୍ରୀଛାତ୍ର ଘରକୁ ଫେରିପାରି ନ ଥିଲେ।
ପ୍ରକାଶ ଯେ, ବର୍ଷାଦିନେ ନାଳ ଯୋଗୁ ଗ୍ରାମର ଛାତ୍ରୀଛାତ୍ରଙ୍କ ଅଧାଦିନ ପାଠପଢିବା ବନ୍ଦ ହୋଇଯାଇଥାଏ। ପ୍ରଶାସନ ପକ୍ଷରୁ ଉକ୍ତ ଗ୍ରାମକୁ ପୋଲ ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି।
