ଗାଜିଆଣ୍ଟେପ, ୯।୨: ତୁର୍କୀ ଓ ସିରିଆରେ ଅନୁଭୂତ ଶକ୍ତିଶାଳୀ ଭୂକମ୍ପକୁ ତିନିଦିନ ବିତିଯାଇଛି। ଦିନ ବିତିବା ସାଙ୍ଗକୁ ମୃତ୍ୟୁସଂଖ୍ୟା ମଧ୍ୟ ବଢ଼ିବାରେ ଲାଗିଛି। ବୁଧବାର ଭୂକମ୍ପଜନିତ ମୃତ୍ୟୁ ସଂଖ୍ୟା ୧୧,୨୦୦ରେ ପହଞ୍ଚିଛି। ତୁର୍କୀ ରାଷ୍ଟ୍ରପତି ରିସେପ ଟାୟିପ ଇର୍ଡୋଗାନ୍ ଭୂକମ୍ପରେ କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ କରିଛନ୍ତି। କୌଣସି ନାଗରିକଙ୍କୁ ଅସହାୟ ଭାବେ ରାସ୍ତା କଡ଼ରେ ଛଡ଼ାଯିବ ନାହିଁ ବୋଲି ଇର୍ଡୋଗାନ୍ ଭୂକମ୍ପ ସ୍ଥିତି ପରିଦର୍ଶନ ବେଳେ କହିଛନ୍ତି। ଭୂକମ୍ପରେ ତୁର୍କୀରେ ବର୍ତ୍ତମାନ ସୁଦ୍ଧା ୮,୫୦୦ ଲୋକଙ୍କ ମୃତ୍ୟୁ ଘଟିଥିବା ସେ ସୂଚନା ଦେଇଛନ୍ତି। ରେସ୍କ୍ୟୁଟିମ୍ ପକ୍ଷରୁ ଦିନରାତି ଉଦ୍ଧାର କାର୍ଯ୍ୟ ଜାରି ରହିଛି।
ଅନ୍ୟପକ୍ଷେ ସିରିଆ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସଂଗୃହୀତ ସୂଚନା ଅନୁସାରେ ୧,୨୫୦ ଜଣଙ୍କ ମୃତ୍ୟୁ ଘଟିଥିବାବେଳେ ୨,୦୫୪ ଆହତ ହୋଇଛନ୍ତି। ତୁର୍କୀରେ ବର୍ତ୍ତମାନ ୬୦,୦୦୦ ଉଦ୍ଧାରକାରୀ ଦଳ ପକ୍ଷରୁ ରେସ୍କ୍ୟୁ କାର୍ଯ୍ୟ ଚାଲିଛି। ପାଖାପାଖି ୨୪ରୁ ଊର୍ଦ୍ଧ୍ୱ ଦେଶ ତୁର୍କୀକୁ ସାହାଯ୍ୟର ହାତ ବଢ଼ାଇଛନ୍ତି। ଭଗ୍ନାବଶେଷ ତଳୁ ମୋଟ ୮୦୦୦ ଲୋକଙ୍କୁ ଉଦ୍ଧାର କରାଯାଇଥିବାବେଳେ ୩,୮୦,୦୦୦ ଜଣ ବିଭିନ୍ନ ହୋଟେଲ ଏବଂ ଆଶ୍ରୟସ୍ଥଳଗୁଡ଼ିକରେ ରହୁଛନ୍ତି।
