ବନ୍ତ,୧୦।୩(ସ୍ବ.ପ୍ର.)- ଭଦ୍ରକ ଜିଲା ବନ୍ତ ବ୍ଲକ ଆଡ଼ିଆ ଆଞ୍ଚଳିକ ସାଧନକେନ୍ଦ୍ର ଅଧୀନ ୧୦୭ ବର୍ଷର ପୁରୁଣା ଅଢ଼ାଳପଙ୍କ ଯୋଗୀନ୍ଦ୍ର ପ୍ରାଥମିକ ବିଦ୍ୟାଳୟ। ଏହି ବିଦ୍ୟାଳୟରେ ଶ୍ରେଣୀଗୃହ ଅଭାବରୁ ଛାତ୍ରୀଛାତ୍ରଙ୍କୁ ଶିକ୍ଷାଦାନରେ ବାଧା ସୃଷ୍ଟି ହେଉଛି। ବିଦ୍ୟାଳୟର ମୋଟ ୮୭ ଛାତ୍ରୀଛାତ୍ରଙ୍କୁ ମାତ୍ର ୨ଟି ଶ୍ରେଣୀଗୃହ। ଦୁଇଟି ଶ୍ରେଣୀଗୃହରେ ଏତେସଂଖ୍ୟକ ପିଲା ବସି ପାଠ ପଢ଼ିବା କଷ୍ଟକର ହୋଇପଡୁଛି। ଯାହାକୁ ନେଇ ଛାତ୍ରୀଛାତ୍ର ଓ ଅଭିଭାବକ ମହଲରେ ଅସନ୍ତୋଷ ବଢ଼ିବାରେ ଲାଗିଛି।
ପ୍ରକାଶ ଯେ, ୧୯୯୧ରେ ଗାଁ ଲୋକଙ୍କ ପ୍ରଚେଷ୍ଟାରେ ସ୍ଥାପିତ ହୋଇଥିବା ଏହି ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ରହିଛି। ସର୍ବଶିକ୍ଷା ଅଭିଯାନରେ ୨୦୦୭-୦୮ରେ ୨କକ୍ଷ ବିଶିଷ୍ଟ ଶ୍ରେଣୀଗୃହ ନିର୍ମାଣ କରାଯାଇଥିଲା। ପୂର୍ବରୁ ବ୍ଲାକବୋର୍ଡ ଯୋଜନାରେ ନିର୍ମାଣ ହୋଇଥିବା ଶ୍ରେଣୀଗୃହ ଏବେ ପରିତ୍ୟକ୍ତ ଅବସ୍ଥାରେ। ଫଳରେ ଏହି ଦୁଇ ଗୃହରେ ୫ଟି ଶ୍ରେଣୀର ଛାତ୍ରୀଛାତ୍ର ବସି ପାଠ ପଢ଼ିଥାନ୍ତି। ଆବଶ୍ୟକ ଶ୍ରେଣୀଗୃହ ନ ଥିବାରୁ ପ୍ରାୟ ୩ ବର୍ଷ ହେଲା ଏଭଳି ସମସ୍ୟା ଲାଗି ରହିଛି। କୋଭିଡ୍ କଟକଣା ପାଇଁ ବର୍ତ୍ତମାନ ପିଲା ବିଦ୍ୟାଳୟକୁ ଆସୁନାହାନ୍ତି। କିନ୍ତୁ ପ୍ରଚଳିତ ଶିକ୍ଷା ବ୍ୟବସ୍ଥାର ଉଜ୍ଜ୍ୱଳ କାର୍ଯ୍ୟକ୍ରମ, ଦଳଗତ ଶିକ୍ଷାଦାନ, ଶୃଙ୍ଖଳା ରକ୍ଷା ଓ ଶିକ୍ଷାଦାନରେ ଶ୍ରେଣୀଗୃହର ଅଭାବ ବାଧକ ହେଉଥିବା ଶିକ୍ଷୟିତ୍ରୀ ଶିକ୍ଷକ ପ୍ରକାଶ କରିଛନ୍ତି। ଏ ନେଇ ପରିଳାଳନା କମିଟି ଓ ଗ୍ରାମବାସୀ ଗୋଷ୍ଠୀ ଶିକ୍ଷାଧିକାରୀ ଓ ଜିଲା ପ୍ରକଳ୍ପ ଅଧିକାରୀଙ୍କୁ ବାରମ୍ବାର ଜଣାଇ ଆସୁଥିଲେ ମଧ୍ୟ କୌଣସି ସୁଫଳ ମିଳି ନ ଥିବା କୁହାଯାଇଛି। ଏ ସମ୍ପର୍କରେ ପ୍ରଧାନ ଶିକ୍ଷକ କମଳା ଦାସ ୨ ଶ୍ରେଣୀଗୃହରେ ୮୭ ପିଲାଙ୍କୁ ଶିକ୍ଷାଦାନ କରିବା କଷ୍ଟସାଧ୍ୟ ଏବଂ ଏ ବିଷୟରେ ସେ ଉପରିସ୍ଥ ଅଧିକାରୀଙ୍କୁ ଜଣାଇବେ ବୋଲି କହିଛନ୍ତି। ବ୍ଲକ ଶିକ୍ଷାଧିକାରୀ ଅଧିର କୁମାର ତରେଇ କହିଛନ୍ତି, ଏହି ସମସ୍ୟା ବିଷୟରେ ଜଣା ନ ଥିଲା। ବର୍ତ୍ତମାନ ଏସବୁ ଶିକ୍ଷା ବିଭାଗରେ ନାହିଁ। ପଞ୍ଚାୟତିରାଜ ବିଭାଗକୁ ହସ୍ତାନ୍ତର କରାଯାଇଛି। ବିଡିଓଙ୍କୁ ଏ ବିଷୟରେ ଜଣାଇବେ ବୋଲି ସେ କହିଛନ୍ତି। ତେବେ ଉକ୍ତ ସମସ୍ୟା ପ୍ରତି ବିଭାଗୀୟ ଅଧିକାରୀ ଗୁରୁତ୍ୱ ଦେଇ ତୁରନ୍ତ ଶ୍ରେଣୀଗୃହ ଯୋଗାଇ ଦେବାକୁ ପରିଚାଳନା କମିଟି, ଛାତ୍ର, ଅଭିଭାବକ ଓ ଗ୍ରାମବାସୀ ଦାବି କରିଛନ୍ତି।
