ଭୁବନେଶ୍ୱର, ୯।୨ (ବ୍ୟୁରୋ): ଆସନ୍ତା ୧୦ ତାରିଖରୁ ପ୍ରାଚୀ ପରିକ୍ରମା ପଦଯାତ୍ରା ଆରମ୍ଭ ହେବ। ଶ୍ରୀ ଅନ୍ଧକପିଳେଶ୍ୱର ମନ୍ଦିର, କପିଳେଶ୍ୱରପୁର, ଅଡଶପୁରଠାରୁ ଆରମ୍ଭ ହେବାକୁ ଥିବା ଏହି ପରିକ୍ରମାରେ ଓଡ଼ିଶାର ବରେଣ୍ୟ ସନ୍ଥବୃନ୍ଦ ପ୍ରାଚୀ ନଦୀକୂଳରେ ଅବସ୍ଥିତ ଦ୍ୱାଦଶ ମାଧବ, ଦ୍ୱାଦଶ ମଠ, ଦ୍ୱାଦଶ ଋଷିଙ୍କ ଆଶ୍ରମ, ଦ୍ୱାଦଶ ଶକ୍ତିପୀଠ, ଦ୍ୱାଦଶ ଶମ୍ଭୁ ତଥା ଅନେକ ତୀର୍ଥକ୍ଷେତ୍ର ପରିକ୍ରମା କରିବେ। ଏନେଇ ବୁଧବାର ସ୍ବାମୀ ସମର୍ପଣାନନ୍ଦ ଗିରି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ୧୦ ତାରିଖରେ ପଦଯାତ୍ରୀମାନେ ରାଧାକାନ୍ତ ମଠ, ନୂଆଗାଁ, ୧୧ରେ ଶ୍ରୀମାଧବାନନ୍ଦ ମନ୍ଦିର, ମାଧବ, ୧୨ରେ ଦେଉଳି ମଠ, କାକଟପୁର, ୧୩ରେ କେଲୁଣି ମୁହାଣ ଓ କେଉଟଜଙ୍ଗା, ୧୪ରେ ପ୍ରାଚୀଗୁରୁ ଧର୍ମ କ୍ଷେତ୍ର, ନୂଆମଠ, ନୟାହାଟ, ୧୫ରେ ବୁଦ୍ଧିକେଶ୍ୱର ମନ୍ଦିର, ଦେଉଳିଧରପୁର ଠାରେ ରାତ୍ରି ଯାପନ କରିବେ। ଶେଷରେ ୧୬ରେ ଶ୍ରୀ ଅନ୍ଧକପିଳେଶ୍ୱର ମନ୍ଦିର, କପିଳେଶ୍ୱରପୁରଠାରେ ପୂର୍ଣ୍ଣାହୂତି ଦିଆଯିବ। ଏହି ଅବସରରେ ୧୦ରୁ ୧୬ ତାରିଖ ପର୍ଯ୍ୟନ୍ତ ପ୍ରତ୍ୟହ ପ୍ରାଚୀ ନଦୀରେ ଆଳତି ଅନୁଷ୍ଠିତ ହେବ ବୋଲି ସୂଚନା ଦିଆଯାଇଛି। ଅବକ୍ଷୟମୁଖୀ ନଦୀ ମାତୃକାର ପୁନରୁଦ୍ଧାର ଉଦ୍ଦେଶ୍ୟରେ ୨୦୧୨ରୁ ପରମହଂସ ପ୍ରଜ୍ଞାନାନନ୍ଦ ମହାରାଜଙ୍କ ମାର୍ଗଦର୍ଶନ ଓ ପ୍ରେରଣାରେ ଏହି ପ୍ରାଚୀ ପରିକ୍ରମା ପଦଯାତ୍ରା ଓ ପ୍ରାଚୀ ନଦୀ ପୁନରୁଦ୍ଧାର ଦିଗରେ ଜନଜାଗରଣ ଆଣିବା ପାଇଁ ବଳିଷ୍ଠ ପଦକ୍ଷେପ ନିଆଯାଉଛି।
