ନୂଆଦିଲ୍ଲୀ/ଔରଙ୍ଗାବାଦ,୪/୧୧: କଂଗ୍ରେସ ସାଂସଦ ରାହୁଲ ଗାନ୍ଧୀ ମଙ୍ଗଳବାର ଏକ ବିବାଦୀୟ ମନ୍ତବ୍ୟ ଦେଇ ଚର୍ଚ୍ଚାରେ ଆସିଛନ୍ତି। ବିହାର ବିଧାନସଭା ନିର୍ବାଚନ ପୂର୍ବରୁ ଔରଙ୍ଗାବାଦରେ ଏକ ପ୍ରଚାର କାର୍ଯ୍ୟକ୍ରମରେ ସେ କହିଛନ୍ତି ଯେ ଭାରତୀୟ ସେନା ‘ଦେଶର ୧୦ ପ୍ରତିଶତ ଜନସଂଖ୍ୟା’ (ତଥାକଥିତ ଧନୀ ବ୍ୟକ୍ତି)ଙ୍କ ନିୟନ୍ତ୍ରଣରେ ଅଛି।
ରାହୁଲ୍ ଗାନ୍ଧୀ କହିଛନ୍ତି, “ଦେଶର ମାତ୍ର ୧୦ ପ୍ରତିଶତ ଜନସଂଖ୍ୟା (ଧନୀ ବ୍ୟକ୍ତି) କର୍ପୋରେଟ୍ ସେକ୍ଟର, ଅମଲାତନ୍ତ୍ର ଏବଂ ନ୍ୟାୟପାଳିକାରେ ସୁଯୋଗ ପାଉଛନ୍ତି… ଏପରିକି ସେନା ମଧ୍ୟ ସେମାନଙ୍କ ନିୟନ୍ତ୍ରଣରେ ଅଛି।”
ସେ ଦାବି କରିଛନ୍ତି ଯେ ଅବଶିଷ୍ଟ ୯୦ ପ୍ରତିଶତ – ପଛୁଆ ବର୍ଗ, ଦଳିତ, ଅନୁସୂଚିତ ଜନଜାତି ଏବଂ ଅନ୍ୟାନ୍ୟ ସଂଖ୍ୟାଲଘୁ – କୌଣସି କ୍ଷେତ୍ରରେ ନାହାନ୍ତି। ସେ କହିଛନ୍ତି ଯେ ଜାତୀୟ ଜାତିଗତ ଜନଗଣନା ଦ୍ୱାରା ଏହି ୯୦ ପ୍ରତିଶତ ଲୋକଙ୍କୁ ଚିହ୍ନଟ କରାଯାଇ ସେମାନଙ୍କ ଅଧିକାର ଓ ସାମ୍ବିଧାନିକ ଗ୍ୟାରେଣ୍ଟି ସୁରକ୍ଷିତ କରାଯାଇପାରିବ।
“ଆମେ ତଥ୍ୟ ଚାହୁଁଛୁ। କେତେ ଦଳିତ, ଓବିସି (ଅନ୍ୟାନ୍ୟ ପଛୁଆ ବର୍ଗ), ମହିଳା, ସଂଖ୍ୟାଲଘୁ… ଅଛନ୍ତି। ଜାତିଗତ ଜନଗଣନା ଦାବି ମାଧ୍ୟମରେ ଆମେ ସମ୍ବିଧାନକୁ ସୁରକ୍ଷା ଦେବାକୁ ଚେଷ୍ଟା କରୁଛୁ।”
ଏହା ପ୍ରଥମ ଥର ନୁହେଁ ଯେ ରାହୁଲ ଗାନ୍ଧୀ ସେନାକୁ ନେଇ ବିବାଦୀୟ ମନ୍ତବ୍ୟ ଦେଇଛନ୍ତି। ପୂର୍ବରୁ ଅଗଷ୍ଟ ମାସରେ ‘ଭାରତ ଯୋଡୋ ଯାତ୍ରା’ ସମୟରେ ସେନା ଉପରେ ଦେଇଥିବା ଏକ ମନ୍ତବ୍ୟ (‘ଚାଇନା ସୈନ୍ୟ ଅରୁଣାଚଳ ପ୍ରଦେଶରେ ଭାରତୀୟ ସୈନିକମାନଙ୍କୁ ପିଟୁଛନ୍ତି’) ପାଇଁ ସୁପ୍ରିମକୋର୍ଟ ତାଙ୍କୁ ତାଗିଦ୍ କରିଥିଲେ।
ସେ ସେତେବେଳେ କହିଥିଲେ ଯେ ଚୀନ ୨,୦୦୦ ବର୍ଗ କିଲୋମିଟର ଭାରତୀୟ ଅଞ୍ଚଳ ଦଖଲ କରିଛି ଏବଂ ସେ ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାରଙ୍କୁ ଦାୟୀ କରିଥିଲେ। ମେ ମାସରେ ଆହ୍ଲାବାଦ ହାଇକୋର୍ଟ କହିଥିଲେ ଯେ ବାକ୍ ସ୍ୱାଧୀନତା ଅର୍ଥ ସେନାକୁ ‘ବଦନାମ’ କରିବାର ଅଧିକାର ନୁହେଁ।
