କେନ୍ଦୁଝର,୨୫ା୧(ସ୍ବ.ପ୍ର.): ଚମ୍ପୁଆ ରେଞ୍ଜ ବାଲବନ୍ଧ ସେକ୍ସନ ନହବେଡା, ତୁଳସୀପୁର ଅଞ୍ଚଳରେ ବୁଧବାର ସନ୍ଧ୍ୟାରେ ପଳାଶପଙ୍ଗା ସେକ୍ସନରୁ ବାଲିବନ୍ଧ ସେକ୍ସନକୁ ଯାଉଥିବାବେଳେ ଅତର୍କିତ ବାଟରେ ଯାହାକୁ ପାରିଲା ତାକୁ କାମୁଡ଼ିଛି ଭାଲୁ। ଭୟରେ ବହୁ ଲୋକେ ଧାଇଁ ପଳାଉଥିଲେ ମଧ୍ୟ ଭାଲୁ ହାବୁଡ଼ରେ ପଡ଼ି ୧୦ ଜଣ ଆହତ ହୋଇଥିବା ଜଣାପଡ଼ିଛି। ଖବର ପାଇ ବନ ବିଭାଗ ପହଞ୍ଚି ଗ୍ରାମବାସୀଙ୍କ ସହାୟତାରେ ଆହତମାନଙ୍କୁ ଉଦ୍ଧାର ଝୁମ୍ପୁରା ଡାକ୍ତରଖାନାକୁ ନେଇଥିଲା। ଆହତମାନଙ୍କର ହାତ, ଗୋଡ଼ ଏବଂ ପେଟରେ କ୍ଷତାକ୍ତ ହୋଇଛି। ଗୁରୁତର ଥିବା ଦିଲ୍ଲୀପ କୁମାର ସୋରେନଙ୍କୁ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ବନବିଭାଗ ଭାଲୁଟି ଉପରେ ନଜର ରଖିଥିବା ବେଳେ ଉକ୍ତ ଅଞ୍ଚଳର ଲୋକେ ଭୟ ଓ ଆତଙ୍କିତ ଅବସ୍ଥାରେ ଅଛନ୍ତି। ଭାଲୁଟି ପ୍ରଥମେ ମଧ୍ୟପୂର୍ ଗ୍ରାମରେ ଜଣଙ୍କୁ ଆହତ କରିବା ପରେ ଗ୍ରାମବାସୀ ଉତ୍ତ୍ୟକ୍ତ ହୋଇ ଭାଲୁଟିକୁ ବିଲ ମଧ୍ୟରେ ମାରିବାକୁ ଦୌଡ଼ାଇଲେ। ଫଳରେ ଭାଲୁଟି ଅଧିକ ଆକ୍ରମଣାତ୍ମକ ହୋଇ ଲୋକଙ୍କୁ ଆକ୍ରମଣ କରିବାରୁ କେତେକ ଆହତ ହୋଇଥିବା ସୂଚନା ମିଳିଛି। ଏହି ଘଟଣାରେ ୫ ଜଣ ଆହତ ହୋଇଥିବା ବେଳେ ଭାଲୁଟି ମଧ୍ୟ ଆହତ ହୋଇଥିବା ଡିଏଫ୍ଓ ଧନରାଜ ଏଚ୍.ଡି ସୂଚନା ଦେଇଛନ୍ତି। ଭାଲୁ ଉପରେ ନଜର ରଖାଯାଇଥିବା କହିଛନ୍ତି।
