ଭୁବନେଶ୍ୱର,୧୮ା୧୧(ବ୍ୟୁରୋ): ସାଇବର ଠକମାନେ ନୂଆ ନୂଆ ତରିକା ଆପଣାଇ ଲୋକଙ୍କୁ ଠକିବାରେ ଲାଗିଛନ୍ତି। ଏଭଳି ଜଣେ ସାଇବର ଠକ ନିଜକୁ ବଡ଼ ମନ୍ତ୍ରୀଙ୍କ ପିଏ କହି ଜଣେ ବ୍ୟବସାୟୀଙ୍କ ସମେତ ୩ ଜଣଙ୍କଠାରୁ ପ୍ରାୟ ଦେଢ ଲକ୍ଷରୁ ଅଧିକ ଟଙ୍କା ଠକି ନେଇଛନ୍ତି। ଏ ନେଇ ଭୁବନେଶ୍ୱର ସାଇବର କ୍ରାଇମ୍ ଓ ଅର୍ଥନୈତିକ ଅପରାଧ ଥାନାରେ ଅଭିଯୋଗ ହେବା ପରେ ପୋଲିସ ତଦନ୍ତ କରି ଠକେଇରେ ସମ୍ପୃକ୍ତ ଥିବା ଜଣେ କିନ୍ନରଙ୍କ ସମେତ ୩ ଜଣଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି। ସେମାନେ ହେଲେ ମୁଖ୍ୟ ଅଭିଯୁକ୍ତ ବୌଦ୍ଧ ଜିଲାର ଦେବଗଡ଼ରେ ରହୁଥିବା ଅନୁଗୋଳର ଲକି ଓରଫ୍ ମନୀଷ ଓରଫ ସୌମ୍ୟରଞ୍ଜନ ପ୍ରଧାନ(କିନ୍ନର) ଏବଂ ତାଙ୍କର ୨ ସହଯୋଗୀ ଗଞ୍ଜାମ ଜିଲାର ସୁନୀଲ୍ ସାମନ୍ତରା, ଯାଜପୁରର ସନ୍ତୁ ଓରଫ୍ ତୁଷାରକାନ୍ତି ବାଇ। ସେମାନଙ୍କଠାରୁ ୬ ମୋବାଇଲ୍ ଓ ୫୦ ହଜାର ଟଙ୍କା ଜବତ ହୋଇଛି। ସୌମ୍ୟଙ୍କ ନାମରେ ପୂର୍ବରୁ ୭ଟି ଆପରାଧିକ ମାମଲା ରହିଛି। ସୂଚନାନୁସାରେ ଗତ ୧୨ ତାରିଖରେ ଭୁବନେଶ୍ୱରର ବ୍ୟବସାୟୀ ବିକାଶ ସେହେଗଲଙ୍କ ମୋବାଇଲକୁ ଏକ ଅଜଣା ନମ୍ବରରୁ କଲ୍ ଆସିଥିଲା। କଲ୍ କରିଥିବା ବ୍ୟକ୍ତି ନିଜକୁ ଜଣେ ମନ୍ତ୍ରୀଙ୍କ ପିଏ ବୋଲି ପରିଚୟ ଦେଇ ତାଙ୍କ ସହ କଥା ହୋଇଥିଲେ। ମନ୍ତ୍ରୀ ତାଙ୍କୁ ଜାଣିଥିବା କହିବା ସହ ନାନା କଥା କହି ବିଶ୍ୱାସ ଜନ୍ମାଇଥିଲେ। ପରେ କଳାହାଣ୍ଡି ଜିଲାରେ ମନ୍ତ୍ରୀ ଏକ ଯଜ୍ଞର ଆୟୋଜନ କରିଥିବା ଏବଂ ଜରୁରୀ ଦରକାର ଥିବା କହି ୪୦ହଜାର ଟଙ୍କା ପଠାଇବା ଲାଗି ଅନୁରୋଧ କରିଥିଲେ। ଯୋଗାଯୋଗ ନିମନ୍ତେ ଅନ୍ୟ ଏକ ଫୋନ ନମ୍ବର ଦେଇଥିଲେ, ଯେଉଁ ନମ୍ବରକୁ ମା’ ନାମକ ଜଣେ ପୂଜକ ବ୍ୟବହାର କରୁଥିଲେ। ତେବେ ବିକାଶ ଠକଙ୍କ କଥାରେ ବିଶ୍ୱାସ ଓ ଭରସା କରି ୩୧ ହଜାର ୫୦୦ ଟଙ୍କା ଫୋନ-ପେ କରିଥିଲେ। କିଛି ସମୟ ପରେ ସେ ଉପରୋକ୍ତ ନମ୍ବରରେ ଯୋଗାଯୋଗ କରିବାରୁ ତାହା ସୁଇଚ୍ ଅଫ୍ ଥିଲା। ଫଳରେ ଠକାମିର ଶିକାର ହୋଇଥିବା ଜାଣିପାରି ବିକାଶ ସାଇବାର ଥାନାର ଦ୍ୱାରସ୍ଥ ହୋଇଥିଲେ। ତେବେ ଥାନାରେ ସେହିଭଳି ସମାନ ଢଙ୍ଗରେ ଆଉ ୨ଜଣଙ୍କଠାରୁ ମଧ୍ୟ ପ୍ରାୟ ଲକ୍ଷେ ୨୦ହଜାର ଟଙ୍କା ଠକିଥିବା ତଦନ୍ତ ବେଳେ ଜଣାପଡିଥିଲା। ଅଭିଯୋଗ ପରେ ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନା ପୋଲିସ ମାମଲା ରୁଜୁ କରି ତଦନ୍ତ କରି ଉକ୍ତ ୩ ଅଭିଯୁକ୍ତଙ୍କୁ ଗିରଫ କରିଥିଲେ।
