ଯାଜପୁର ଅଫିସ,୧୬ା୧୦- ଦୀର୍ଘ ବର୍ଷ ହେଲା ବ୍ୟାସନଗର ସହରର ବିଭିନ୍ନ ସମସ୍ୟା ଅସମାହିତ ହୋଇରହିଛି। ବାର୍ଷିକ କୋଟିକୋଟି ଟଙ୍କା ବ୍ୟୟବରାଦ ହେଉଥିଲେ ସୁଦ୍ଧା ଆଜି ବି ସହରର ଡ୍ରେନେଜ ବ୍ୟବସ୍ଥା ସୁଧୁରି ପାରି ନାହିଁ। ବ୍ୟାସନନଗର ପୌରାଞ୍ଚଳର ୭ ନମ୍ବର ୱାର୍ଡ ଆମ୍ବେଦକର କଲୋନୀ (ରାମଦାସ କଲୋନୀ)ର ମୁଖ୍ୟ ରାସ୍ତାରେ ଥିବା ସରକାରୀ ଡ୍ରେନକୁ ଏହାର ଉଦାହରଣ ଭାବେ ନିଆଯାଇ ପାରେ। ଏହି ଡ୍ରେନକୁ ଜଣେ ଲୋକ ପୋତି ଦେଇଥିବାରୁ ସମ୍ପୃକ୍ତ ଅଞ୍ଚଳବାସୀ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ବାରମ୍ବାର ଜିଲାପାଳ, କଳିଙ୍ଗନଗର ଅତିରିକ୍ତ ଜିଲାପାଳ, ବ୍ୟାସନଗର ପୈାରାଧିକାରୀ, ଯାଜପୁରରୋଡ ପୋଲିସ, ବ୍ୟାସନଗର ତହସିଲଦାରଙ୍କ ନିକଟରେ ଅଭିଯୋଗ ହୋଇଛି। କିନ୍ତୁ ପ୍ରଶାସନ ଅବରୋଧ ହଟାଇବା ବଦଳରେ ନୀରବ ଦ୍ରଷ୍ଟା ସାଜିଛି।
ଡ୍ରେନେଜ ଓ ପରିମଳ କ୍ଷେତ୍ରରେ ଅବହେଳା ଯୋଗୁ ବ୍ୟାସନଗର ସହରବାସୀ ଦୀର୍ଘଦିନ ହେଲା ସମସ୍ୟାରେ ରୁନ୍ଧି ହେଉଛନ୍ତି। ବ୍ୟାସନଗର ମ୍ୟୁନିସିପାଲଟି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ତାଗିଦକୁ ମଧ୍ୟ ବେଖାତିର କରୁଛି। ଅପରପକ୍ଷେ ମ୍ୟୁନିସିପାଲଟିର ଏହି ଆଭିମୁଖ୍ୟ ପାଇଁ ସହରର ବାୟୁ ଏବଂ ଗଣ୍ଡନାଳା ଜଳ ବିଷାକ୍ତ ହେଉଛି। ସହରର ଡ୍ରେନେଜ ବ୍ୟବସ୍ଥାରେ ବର୍ହିଗମନ ପଥ ନ ଥିବାରୁ ପ୍ରାୟ ୭୦ ପ୍ରତିଶତ ବିଷାକ୍ତ ଜଳ ସହରର ବିଭିନ୍ନ ବିଲବାଡି, ପୋଖରୀ ଆଦି ସ୍ଥାନରେ ଜମା ରହୁଛି। ସହରକୁ ପ୍ରକୃତିଦତ୍ତ ପୌରାଣିକ ବ୍ୟାସସରୋବର ସମେତ ପ୍ରାକୃତିକ ଜଙ୍ଗଲ ପ୍ରତି ବିପଦ ମାଡ଼ି ଆସିିଛି। ଏହା ସହିତ ଗଣ୍ଡନାଳା ପାଣି ବ୍ରାହ୍ମଣୀର ଉପନଦୀ ଖରସ୍ରୋତାରେ ମିଶୁଥିବାରୁ ପାନୀୟ ଏବଂ ଅନ୍ୟାନ୍ୟ କାର୍ଯ୍ୟରେ ବ୍ୟବହାର କରୁଥିବା ନଦୀକୂଳିଆ ଗ୍ରାମାଞ୍ଚଳ ଅଧିବାସୀଙ୍କ ପାଇଁ ଯାଜପୁର ମ୍ୟୁନିସିପାଲଟି ଅପରାଧୀ ସାଜିଛି। ସଂପ୍ରତି ସହରର ୭ ନମ୍ବର ୱାର୍ଡର ଧବଳଗିରିସି୍ଥତ ଅକ୍ଟ୍ରାଇଗେଟ-ପାଇକିରାପୁର ମୁଖ୍ୟ ରାସ୍ତାରେ ଥିବା ସରକାରୀ ଡ୍ରେନକୁ ମୋରମ ପକାଇ ଅବରୋଧ କରାଯାଇଛି। ଫଳରେ ବର୍ଷାଜଳ ନିଷ୍କାସନ ହୋଇପାରୁ ନାହିଁ। ଏନେଇ କଲୋନୀର ମୁଖ୍ୟ ରାସ୍ତା ଉପରେ ୨ଫୁଟରୁ ଊର୍ଦ୍ଧ୍ୱ ବର୍ଜ୍ୟପାଣି ଜମୁଛି। ଗତବର୍ଷ ଉନ୍ନତି ଯୋଜନାରେ ଲାକ୍ଷାଧିକ ଟଙ୍କାରେ ନିର୍ମାଣ ହୋଇଥିବା କଂକ୍ରିଟ ରାସ୍ତାଟିରେ କଂକ୍ରିଟ ଛାଡି ଖାଲଖମା ସୃଷ୍ଟି ହେଉଛି। ଡ୍ରେନ ଅବରୋଧ ଯୋଗୁ କଲୋନୀବାସୀଙ୍କ ଦୁର୍ଦ୍ଦଶା ବଢ଼ିବାରେ ଲାଗିଛି। ଦୀର୍ଘବର୍ଷ ହେଲା ଏହି ଡ୍ରେନରେ ବର୍ଷାଜଳ ନିଷ୍କାସନ ହେଉଥିଲା। କିନ୍ତୁ ଅବରୋଧ ଯୋଗୁ ପାଣି ମୁଖ୍ୟ ରାସ୍ତା ଉପରେ ଜମି ଦୁର୍ଗନ୍ଧ ବାହାରୁଛି। ସୋମବାର ମାନସ କୁମାର ରାଉତ, ଗଦାଧର ବେହେରା, ଗଣେଶ ଚନ୍ଦ୍ର ଧୀର, କଳ୍ପନା ରାଉତ ପ୍ରମୁଖ କଲୋନୀବାସୀ ୫ମ ଥର ପାଇଁ ଅବରୋଧ ହଟାଇବାକୁ ପୌର ପ୍ରଶାସନର ଦ୍ୱାରସ୍ଥ ହୋଇଥିଲେ। ଏନେଇ ପୌରାଞ୍ଚଳର ନିର୍ବାହୀ ଅଧିକାରୀ ଶୁଭେନ୍ଦୁ ଜେନା ଦିନେଦୁଇ ଦିନ ମଧ୍ୟରେ ଘଟଣାସ୍ଥଳ ପରିଦର୍ଶନ କରି ଆବଶ୍ୟକ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିଲେ।
