ଇନ୍ଦୋର,୨୪।୨: ବିବାହରେ କନ୍ୟା ଘର ପକ୍ଷରୁ ବରଙ୍କୁ ଉପହାର ସୂରୂପ ଯୌତୁକ ଦିଆଯାଇଥାଏ। ତେବେ ମଧ୍ୟପ୍ରଦେଶ ଇନ୍ଦୋରରେ ବାସ କରୁଥିବା ଏକ ପରିବାର ଦୀର୍ଘ ୪୨ ବର୍ଷ ଧରି କନ୍ୟାଘରଙ୍କଠାରୁ କୌଣସି ଯୌତୁକ ଅବା ଅନ୍ୟ ଉପହାର ଗ୍ରହଣ କରି ନାହାଁନ୍ତି। ଇତିମଧ୍ୟରେ ପରିବାରରେ ୬ଜଣ ପୁଅଙ୍କର ବିବାହ ହୋଇଛି। ତେବେ ପ୍ରତି ବିବାହରେ ପରିବାର ପକ୍ଷରୁ କନ୍ୟା ଘରଠାରୁ ୫ କିଲୋ ମିଶ୍ରି ଏଂ ୧୧ଟି ନଡ଼ିଆ ଗ୍ରହଣ କରାଯାଇଥାଏ। ଏଭଳି ଉଚ୍ଚ ଚିନ୍ତା ଧାରା ଫତେହଚନ୍ଦାନି ପରିବାର ସଦସ୍ୟଙ୍କଠାରେ ଦେଖିବାକୁ ମିଳିଥାଏ। ପରିବାରର ୨୧ ଜଣ ସଦସ୍ୟ ଏକାଠି ଗୋଟିଏ ଛାତ ତଳେ ବାସ କରୁଛନ୍ତି। ଏକ ଘରୋଇ ସ୍କୁଲର ପରିଚାଳକ ଭାବେ କାର୍ଯ୍ୟ କରୁଥିବା ଅନୀଲ ଫତେହଚନ୍ଦାନି କୁହନ୍ତି ଆମ ଘରେ ୪ ଭାଇ ଏବଂ ୩ ଭଉଣୀ ମିଳିତ ଭାବେ ରହୁଛନ୍ତି। ପିତା ଜେଠାନନ୍ଦ ଫତେହଚନ୍ଦାନିଙ୍କର ଏକ ଫ୍ୟାକ୍ଟ୍ରି ଅଛି। ୧୯୭୮ରେ ପରିବାରର ବଡ଼ ପୁଅ କିଶୋର କୁମାରଙ୍କର ବିବାହ ହୋଇଥିଲା। ପିତା କନ୍ୟାଘରଠାରୁ ଯୌତୁକ ନ ଆଣିବାକୁ ସର୍ତ୍ତ ରଖିଥିଲେ। ଏହାପରେ ଏହି ଧାରା ଜାରି ରହିଛି। ସେହିପରି ନିମନ୍ତ୍ରଣ କାର୍ଡରେ ଅତିଥିଙ୍କୁ କୌଣସି ଉପହାର ନ ଆଣିବାକୁ ଅନୁରୋଧ କରାଯାଇଥାଏ ବୋଲି ଅନୀଲ କୁହନ୍ତି।
