ଚେନ୍ନାଇ, ୨୪।୪- ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରେ ନିଜ ଘରୋଇ ଫ୍ରାଞ୍ଚାଇଜ୍ ପକ୍ଷରୁ ଖେଳିବାକୁ ସବୁ ଖେଳାଳିଙ୍କର ଇଚ୍ଛା ଥାଏ। ମାତ୍ର ଏପରି କେତେଜଣ ତାରକା ଖେଳାଳି ଅଛନ୍ତି ଯିଏକି ଏହି ସୁଯୋଗ ପାଇ ନାହାନ୍ତି। ସେପରି ଜଣେ କ୍ରିକେଟର ହେଲେ ଦୀନେଶ କାର୍ତ୍ତିକ। ସେ ୬ଟି ଦଳ ପକ୍ଷରୁ ପ୍ରତିନିଧିତ୍ୱ କରି ସାରିଥିଲେ ହେଁ ନିଜ ଘରୋଇ ଫ୍ରାଞ୍ଚାଇଜ୍ ଚେନ୍ନାଇ ସୁପରକିଙ୍ଗ୍ସ ପକ୍ଷରୁ ଖେଳିପାରିନାହାନ୍ତି। ଚେନ୍ନାଇ ପକ୍ଷରୁ ଖେଳିବା ତାଙ୍କର ଇଚ୍ଛା, ଏଥିପାଇଁ ସେ ୧୩ ବର୍ଷ ଧରି ଅପେକ୍ଷା କରିଛନ୍ତି ବୋଲି କାର୍ତ୍ତିକ କହିଛନ୍ତି।
୨୦୦୪ରେ ମହେନ୍ଦ୍ର ସିଂ ଧୋନୀ ଅନ୍ତର୍ଜାତୀୟ କ୍ରିକେଟରେ ପଦାର୍ପଣ କରିବାପରେ କାର୍ତ୍ତିକଙ୍କ ପାଇଁ ସୁଯୋଗ କମି ଯାଇଛି। ତାଙ୍କ କ୍ୟାରିୟର ଉତ୍ଥାନ ପତନ ମଧ୍ୟଦେଇ ଗତି କରିଛି। ଆଇପିଏଲ ଇତିହାସରେ ସେ ଜଣେ ସଫଳ ଖେଳାଳି। ଏଥିପାଇଁ ବିଭିନ୍ନ ଫ୍ରାଞ୍ଚାଇଜ୍ ପକ୍ଷରୁ ଖେଳିବା ପାଇଁ ସୁଯୋଗ ସୃଷ୍ଟି ହେଉଛି। ମାତ୍ର ସମ୍ଭବତଃ ଧୋନୀଙ୍କ ଉପସ୍ଥିତି ଯୋଗୁ ଚେନ୍ନାଇ ସୁପରକିଙ୍ଗ୍ସ ଏପର୍ଯ୍ୟନ୍ତ ଆଗ୍ରହ ଦେଖାଇନାହିଁ। ଫଳରେ କାର୍ତ୍ତିକଙ୍କ ପାଇଁ ଚେନ୍ନାଇ ପକ୍ଷରୁ ଖେଳିବାକୁ ଭାଗ୍ୟରେ ଜୁଟିନାହିଁ। ଆଇପିଏଲର ଉଦ୍ଘାଟନୀ ସଂସ୍କରଣ ବେଳକୁ କାର୍ତ୍ତିକ ଭାରତୀୟ ଦଳର ଜଣେ ନିୟମିତ ସଦସ୍ୟ ଥିଲେ। ତେଣୁ ଅଧିନାୟକ ହେବାନେଇ ନିଶ୍ଚିତ ନ ଥିଲେ ହେଁ ଖେଳାଳି ନିଲାମରେ ସୁପରକିଙ୍ଗ୍ସ ତାଙ୍କୁ କିଣିବ ବୋଲି ଆଶା ରଖିଥିଲେ। ୨୦୦୮ରେ ଖେଳାଳି ନିଲାମ ସମୟରେ କାର୍ତ୍ତିକ ଅଷ୍ଟ୍ରେଲିଆରେ ଥିଲେ। ସେଠାରେ ଥିବା ଧୋନୀ ଦ୍ୱିତୀୟ ପର୍ଯ୍ୟାୟରେ କିଣା ହେବାନେଇ ଆଶା ରଖିଥିଲେ। ମାତ୍ର ଚେନ୍ନାଇ ଫ୍ରାଞ୍ଚାଇଜ୍ ଧୋନୀଙ୍କୁ ୬ କୋଟି(ପ୍ରଥମ ସଂସ୍କରଣରେ ସର୍ବାଧିକ ବିଡ୍) ଟଙ୍କାରେ କିଣିବା ତାଙ୍କୁ ଆଶ୍ଚର୍ଯ୍ୟ କରିଥିଲା ବୋଲି କାର୍ତ୍ତିକ ପ୍ରକାଶ କରିଛନ୍ତି। ଏହି ଘଟଣାରେ ଗଭୀର ଆଘାତ ପାଇଥିବା କାର୍ତ୍ତିକ ପରେ ଚେନ୍ନାଇ ପକ୍ଷରୁ ଖେଳିବାକୁ ଆଶା ରଖିଥିଲେ। ମାତ୍ର ଇତିମଧ୍ୟରେ ୧୩ ବର୍ଷ ବିତି ଯାଇଥିଲେ ହେଁ ଚେନ୍ନାଇ ପକ୍ଷରୁ ସେ କେବେହେଲେ ଡାକରା ପାଇ ନାହାନ୍ତି ।
