ଲାଠୋର,୩ା୧: ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର ପ୍ରାଣୀଧନ ଚିକିତ୍ସା କେନ୍ଦ୍ର ନିକଟରେ ଥିବା ଓଭରହେଡ ଟ୍ୟାଙ୍କ ଚାବି ଖରାପ ହୋଇଯାଇଛି। ଏନେଇ ଗତ ୧୦ଦିନ ହେବ ଜଳଯୋଗାଣରେ ବ୍ୟାଘାତ ସୃଷ୍ଟି ହୋଇଛି। ମରାମତି ପାଇଁ ଲୋକେ ଦାବି କରିଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଏହି ଟ୍ୟାଙ୍କରୁ ଗ୍ରାମର ପ୍ରାୟ ୪ହଜାର ଜନସାଧାରଣଙ୍କୁ ଜଳଯୋଗାଣ ହୋଇଥାଏ। ତେବେ ଖରାପ ହୋଇଥିବା ଓଭରହେଡ ଟ୍ୟାଙ୍କ ଚାବି ମରାମତି ନ କରି ସିଧାସଳଖ ପ୍ରକଳ୍ପରୁ ମୋଟର ଯୋଗେ ଜଳଯୋଗାଣ କରାଯାଉଛି। ଯେଉଁମାନେ ପ୍ରକଳ୍ପ ପାଖରେ ରହିଛନ୍ତି ସେମାନେ ପାଣି ପାଉଥିବା ବେଳେ ଦୂରରେ ଥିବା ଗ୍ରାମବାସୀ ପାଣି ପାଇଁ ସମସ୍ୟାର ସମ୍ମୁଖୀନ ହେଉଛନ୍ତି। ଏନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ବଡକଷ୍ଟରେ ସେମାନେ ନଳକୂପ ପାଣି ସଂଗ୍ରହ କରି ବ୍ୟବହାର କରୁଛନ୍ତି। ଏ ନେଇ ଖପ୍ରାଖୋଲ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ କନିଷ୍ଠ ଯନ୍ତ୍ରୀ ସରିତା କୁଜୁରଙ୍କୁ ପଚାରିବାରୁ ଦିନେ ଦୁଇଦିନ ମଧ୍ୟରେ ସମସ୍ୟାର ସମାଧାନ ହୋଇଯିବ ବୋଲି କହିଛନ୍ତି।
