ଭଞ୍ଜନଗର,୪।୮(ଡି.ଏନ.ଏ.) -ବାଇକ୍ ଓ କାର ଚାଳକଙ୍କ ଉପରେ ଏଣିକି କଡ଼ା ନଜର ରଖିବ ପ୍ରଶାସନ। ଯେଉଁମାନେ ବିନା ହେଲମେଟ୍ରେ ବାଇକ୍ ଚଳାଉଥିବେ ସେମାନଙ୍କ ବିରୁଦ୍ଧରେ ଜରିମାନା ସହ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। କାର ଚାଳକ ମଧ୍ୟ ସିଟ୍ ବେଲ୍ଟ ନବାନ୍ଧିଲେ ଜରିମାନା ଗଣିବେ। ରାଜ୍ୟର ଅନ୍ୟ ଜିଲା ଅପେକ୍ଷା ଗଞ୍ଜାମ ଜିଲାରେ ଦୁର୍ଘଟଣାଜନିତ ମୃତ୍ୟୁହାର ଅଧିକ। ତେଣୁ ପ୍ରଶାସନ ବେନିୟମ ଗାଡ଼ି ଚାଳକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନେବାକୁ ଯାଉଛି। ବିଗତ ୩ ବର୍ଷ ହେବ ଗଞ୍ଜାମ ଜିଲା ଦୁର୍ଘଟଣାଜନିତ ମୃତ୍ୟୁହାରରେ ରାଜ୍ୟରେ ପ୍ରଥମ ରହୁଛି। ଭଞ୍ଜନଗର ଉପଖଣ୍ଡରେ ଗତବର୍ଷ ଅପେକ୍ଷା ଚଳିତବର୍ଷ ପ୍ରଥମ ୭ମାସରେ ୩୦ ପ୍ରତିଶତ ମୃତ୍ୟୁହାର କମିଛି। ଯାହାକି ଭଞ୍ଜନଗର ପ୍ରଶାସନ ପାଇଁ ଆଶ୍ୱସ୍ଥ ହୋଇଥିଲେ ମଧ୍ୟ ଜିଲାରେ ମୃତ୍ୟୁହାର ଅଧିକ ରହୁଥିବାରୁ ଜିଲା ପ୍ରଶାସନର ଚିନ୍ତା ବଢ଼ାଇଛି। ଏହିଭଳି ପରିସ୍ଥିତିରେ ଶୁକ୍ରବାରଠାରୁ ହେଲମେଟ୍ ନ ପିନ୍ଧିଥିଲେ ଭଞ୍ଜନଗର ଉପ ଜିଲାପାଳଙ୍କ କାର୍ଯ୍ୟାଳୟକୁ ବାଇକ୍ ଚାଳକଙ୍କୁ ଛଡ଼ାଯାଉନାହିଁ। ଏଥିସହ କାର ଚାଳକ ମଧ୍ୟ ସିଟ୍ ବେଲଟ୍ ପିନ୍ଧି ନ ଥିଲେ କାର ଛଡ଼ାଯାଉନାହିଁ। ଉପ ଜିଲାପାଳଙ୍କ କାର୍ଯ୍ୟାଳୟ କର୍ମଚାରୀ କାର୍ଯ୍ୟାଳୟ ସମୟରେ ଲୋକଙ୍କୁ ମୁଖ୍ୟ ଫାଟକ ନିକଟରେ ସଚେତନ କରାଉଛନ୍ତି।
ଜାନୁୟାରୀରୁ ଜୁଲାଇ ମଧ୍ୟରେ ଭଞ୍ଜନଗର ଉପଖଣ୍ଡରେ ୬୫ଟି ଦୁର୍ଘଟଣା ଘଟିଥିବାବେଳେ ୫୩ ଜଣ ମୃତ୍ୟୁବରଣ କରିଥିଲେ। ସେହିଭଳି ଚଳିତବର୍ଷ ଜାନୁୟାରୀରୁ ଜୁଲାଇ ମଧ୍ୟରେ ୫୪ ଦୁର୍ଘଟଣା ଘଟିଥିବାବେଳେ ୩୯ ଜଣ ମୃତ୍ୟୁବରଣ କରିଛନ୍ତି। ପ୍ରକାଶ ଯେ, ଜନସଂଖ୍ୟା ଦୃଷ୍ଟି କୋଣରୁ ଗଞ୍ଜାମ ଜିଲା ରାଜ୍ୟରେ ପ୍ରଥମ। ତେଣୁ ଏଠାରେ ଦୁର୍ଘଟଣା ହାର ମଧ୍ୟ ଅନ୍ୟ ଜିଲା ଅପେକ୍ଷା ଅଧିକ ରହୁଛି। ବେପାରୁଆ, ଦ୍ରୁତ ଗାଡ଼ି ଚାଳନା, ହେଲମେଟ୍, ସିଟ୍ ବେଲଟ୍ ବ୍ୟବହାର ନ କରିବା, ନିଶାସକ୍ତ ଅବସ୍ଥାରେ ଗାଡ଼ି ଚଳାଇବା ପ୍ରମୁଖ କାରଣ ଯୋଗୁ ଦୁର୍ଘଟଣା ବଢୁଛି। ଜିଲାରେ ଦୁର୍ଘଟଣାଜନିତ ମୃତ୍ୟୁହାର କମିବାନେଇ ୩ବର୍ଷ ହେବ ପ୍ରଶାସନ ଅନେକ ଯୋଜନା କରିଛି। ତଥାପି ମୃତ୍ୟୁହାର କମୁନାହିଁ। ୨୦୧୭ରେ ୩୮୧ ଜଣ ଦୁର୍ଘଟଣାରେ ମୃତ୍ୟୁ ଘଟିଥିବାବେଳେ ୨୦୧୮ରେ ୪୦୪ ଜଣ ମୃତ୍ୟୁ ଘଟିଥିଲା।
ଏନେଇ ଭଞ୍ଜନଗର ଆଞ୍ଚଳିକ ପରିବହନ ଅଧିକାରୀ(ଆରଟିଓ) ଏସ୍. ରୟଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ, ବେନିୟମ ଗାଡ଼ି ଚାଳକଙ୍କ ବିରୁଦ୍ଧରେ ଆଗାମୀ ଦିନରେ କଡ଼ା କାର୍ଯ୍ୟାନୁଷ୍ଠାନ ପାଇଁ ଯୋଜନା ଅଛି। ରାଷ୍ଟ୍ରପତିଙ୍କ ଅନୁମୋଦନ ପରେ ନୂଆ ପରିବହନ ନିୟମ ଲାଗୁ ହେବ। ଏହି ନିୟମ କାର୍ଯ୍ୟକାରୀ ହେଲେ ସିଟ୍ ବେଲଟ୍ ନପିନ୍ଧିଲେ ୧ ହଜାର ଟଙ୍କା ଜରିମାନା, ମଦ ପିଇ ଗାଡ଼ି ଚଳାଇଲେ ୧୦ ହଜାର, ହେଲ୍ମେଟ ନ ପିନ୍ଧିଲେ ୧ ହଜାର ଜରିମାନା ଓ ୩ ମାସ ଲାଇସେନ୍ସ ରଦ୍ଧ କରାଯିବ। ନାବାଳକ ଗାଡ଼ି ଚଳାଇଲେ ଅଭିଭାବକ ୨୫ ହଜାର ଜରିମାନା ଗଣିବା ସହ ୩ ବର୍ଷ ଜେଲ ଭୋଗିପାରନ୍ତି। ମୋବାଇଲ ଫୋନ୍ରେ କଥା ହୋଇ ଗାଡ଼ି ଚଳାଇଲେ ୫ ହଜାର ଟଙ୍କା ଜରିମାନା, ଆପତକାଳୀନ ଗାଡ଼ି ଯଥା ଆମ୍ବୁଲାନ୍ସ, ଦମକଳ ଗାଡ଼ିକୁ ରାସ୍ତା ନଛାଡ଼ିଲେ ୧୦ ହଜାର ଜରିମାନା, ଦ୍ରୁତ ଗତି କିମ୍ବା ବିନା ଲାଇସେନ୍ସରେ ଗାଡ଼ି ଚଳାଇଲେ ୫ ହଜାର ଟଙ୍କା ଜରିମନା ନେଇ ନୂଆ ଆଇନରେ ବ୍ୟବସ୍ଥା ଅଛି ବୋଲି ସୂଚନା ଦେଇଛନ୍ତି।
ଭଞ୍ଜନଗର ଉପ ଜିଲାପାଳ ରାଜେନ୍ଦ୍ର କୁମାର ମିଞ୍ଜଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ, ଲୋକଙ୍କ ମଧ୍ୟରେ ସଚେତନତା କରିବା ଲକ୍ଷ୍ୟନେଇ ଏହିଭଳି ପଦକ୍ଷେପ ନିଆଯାଇଛି। ଆଗାମୀଦିନରେ ମଧ୍ୟ ଏହି ପ୍ରକ୍ରିୟା ଚାଲିବ। ବିଭିନ୍ନ ରାସ୍ତାରେ ଯାନବାହାନ ଯାଞ୍ଚ କଡ଼ାକଡ଼ି କରାଯିବ।
