ଅନୁଗୋଳ ଅଫିସ, ୧୦।୯- ଅନୁଗୋଳ ସହର ପଞ୍ଚମହଲାଠାରେ ଏକ ଘରୋଇ ବିଦ୍ୟାଳୟରୁ ଫେରୁଥିବାବେଳେ ଦୁର୍ଘଟଣାରେ ଜଣେ ଛାତ୍ରୀଙ୍କ ମୃତ୍ୟୁ ହୋଇଛି। ଅନ୍ୟ ୨ଜଣ ଗୁରୁତର ହୋଇଛନ୍ତି। ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଏ ନେଇ ନଂ. ୭୦୭/୧୯ରେ ପୋଲିସ ଏକ ମାମଲା ରୁଜୁ କରି ତଦନ୍ତ ଚଲାଇଛି।
ପ୍ରକାଶ ଯେ, ନୂଆମୌଜା ଗ୍ରାମର ବନବିହରୀ ନାଏକ ବାଇକ୍ରେ ପୁଅ ସୌମ୍ୟରଞ୍ଜନ ନାଏକ ଓ ଭାଣିଜୀ ଜ୍ୟୋତିର୍ମୟୀ ପ୍ରିୟଦର୍ଶନୀ ନାଏକଙ୍କୁ ସ୍କୁଲରୁ ଘରକୁ ଆଣୁଥିଲେ। ତେବେ ପକ୍କା ରାସ୍ତା ତଳକୁ ଗାଡ଼ି ଚକା ଖସିଯିବାରୁ ଭାରସ୍ୟାମ ହରାଇ ସେମାନେ ପଡ଼ିଯାଇଥିଲେ। ସ୍ଥାନୀୟ ଲୋକେ ୩ଜଣଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଡାକ୍ତର ଛାତ୍ରୀ ଜ୍ୟୋତିର୍ମୟୀଙ୍କୁ ମୃତ ଘୋଷଣା କରିଥିଲେ। ଜ୍ୟୋତିର୍ମୟୀଙ୍କ ଘର ବଅଁରପାଳ ଥାନା ଟେଣ୍ଟୋଲୋଇ ହୋଇଥିବା ବେଳେ ସେ ମାମୁ ବନବିହାରୀଙ୍କ ଘରେ ରହି ପଢ଼ୁଥିଲେ। ମୃତ ଛାତ୍ରୀଙ୍କ ବାପା ଥାନାରେ ଏତଲା ଦେବା ପରେ ପୋଲିସ ମାମଲା ରୁଜୁ କରିଥିବା ସୂଚନା ମିଳିଛି।
